کراکس۔ 31 اگست (اے پی پی) یمن اٹی اقوام متحدہ نا انسان دوستانہ امور نا کوارڈینیٹر جمی مک گلڈریک تصدیق کرینے کہ یمن اٹی ہژدہ توآن جاری جنگ اٹی ہزار آ بندغ آک خلنگانو۔ داکان مست یمن نا ہندی ذرائع نا پاننگ ئس کہ سعودی عرب و اونا اتحادی تا جلہو آتیٹی دہ ہزار بندغ خلنگانوولے اقوام متحدہ نا کنڈآن کہوک آتا کچ شش ہزار پاننگاکہ۔ واہم داسا یمن اٹی اقوام متحدہ نا انسان دوستانہ امور نا کوارڈینیٹر جمی مک گلڈریک صنعاٹی پریس کانفرنس اٹی داہیت انا تصدیق ئِ کرینے کہ یمن اٹی ہسپتال نا ذرائع ہرا حساب و کتاب ئِ پیش کرینے اوفتا رداٹ یمن نا جنگ اٹی داوخت اسکان دہ ہزار بندغ خلنگانو۔ اوداہم پارے کہ جنگ یمن اٹی خلوک آتا کچ داکان ہم زیات مننگ کیک۔ اقوام متحدہ نا ہندا عہدیدار نا پاننگ ئِ کہ چونکہ یمن نا گڑاس علاقہ غاتیٹی طبی بنجا اف ہنداخاطران دا علاقہ غاتیٹی کہوک آتا اندراج مننگ کتنے۔ اونا پاننگ ئس کہ گڑاس علاقہ غاتیٹی کہوک آتا خاہوت تینا رشتہ دار آتا جنازہ غاتے تعلقدار سرکاری ادارہ غاتے احوال تننگ آن بیدس ہی دفن کیرہ۔
