پاکستان و بھارت تعلقداری تا بحالی و سیاسی کمکاری آن مستفید مننگ کیرہ، امریکہ بے چیٹی ٹی کمتی کن سویلی ایشیاءنا ہڑتوم آ ہمسایہ ملک آتا است بڈی ئِ کیک، امریکہ محکمہ خارجہ نا ترجمان نا پریس بریفنگ

واشنگٹن۔ 23 اگست (اے پی پی) امریکہ پارینے کہ پاکستان و بھارت تعلقداری تا بحالی و سیاسی کمکاری آن مستفید مننگ کیرہ ، امریکہ بے چیٹی ٹی کمتی کن سویلی ایشیانا ہڑتوم آ ہمسایہ ملک آتا است بڈی ئِ کیک۔ امریکی محکمہ خارجہ نا ترجمان تدوک آ دے واشنگٹن اٹی پریس بریفنگ نا وخت آ پارے کہ نن پاکستان و بھارت نا نیام اٹ تعلقداری تا بحالی کن کوشست آتا مخ تفی ئِ کینہ و نن سمجھنہ کہ ہڑتوم آ ملک آتا نیام اٹ تعلقداری تا بحالی آن سوگوی و شونہالی ڈیہہ نا اڈتننگ ئِ ممکن جوڑ کننگ مریک۔ امریکہ پاکستان وبھارت نا کمامدارآتا وخت آ ہرکہول انا عہدیدار آتا وخت آ اوڑدہی تا پورو مخ تفی ئِ کیک۔ ترجمان پارے کہ امریکہ نا دا دیرینہ موقف ئِ کہ پاکستان و بھارت ئِ تعلقداری تے معمول آ تخنگ آن دوئی مروک آ فائدہ غاتیان استفادہ کروئی مرے و امریکہ بے چیٹی ٹی کمتی کن ہڑتوم آ ملک آتا نیام اٹ براہ راست مذاکرات نا است بڈی ئِ کیک۔ بھارت اٹی انسانی حق انا تنظیم ایمنسٹی انٹرنیشنل آ بغاوت نا دوبہ غاتیان بابت معاملہ غا سوج انا ورندی ٹی محکمہ خارجہ نا ترجمان پارے کہ امریکہ آجوئی اظہار و کانودی اجتماع نا حق انا پورو مخ تفی ئِ کیک ہراٹی سول سوسائٹی نا اجتماع اوارے۔ اوپارے کہ امریکہ ایمنسٹی انٹرنیشنل و ایلو تنظیم تا کنڈآن آجوئی اظہار نا شرف ئِ کیک۔