نوکیں ٹیکنالوجی ءِ وسیلگ ءَ پارلیمنٹ گس ءُ لاج آنی سیکورٹی ءَ را گیش موثر جوڑ کنگ بیت، سیدال خان ناصر

اسلام آباد۔4نومبر  (اے پی پی): سیکورٹی کمیٹی ءِ ڈپٹی چیئرمین سیدال  خان ناصر ءَ نوکیں ٹیکنالوجی ءِ وسیلگ ءَ پارلیمنٹ ہاؤس ءُ پارلیمنٹ لاج آنی سیکورٹی ءَ را گیش موثر جوڑ کنگ ءُ پارلیمنٹرین آنی رکھینگ ءِ واستہ سیکورٹی بندوبست آناں گہتر کنگ ءِ ہدایت کتگ۔ سیکرٹریٹ ءِ رد ءَ آئی ءَ اے گپ چار شمبے ءِ روچ ءَ پارلیمنٹ گس ءَ ڈی آئی جی سیکورٹی اسلام آباد عمر فاروق ءِ گوما گند ءُ نند ءِ ساھت ءَ کت، ایشی ءِ تہ ءَ سیکورٹی ءِ جیڈھ ءُ وفاقی دارالحکومت ءَ امن ءُ ایمنی ءِ جاورھال ءِ سر ءَ سرجمیں رنگ ءَ ھیال ءُ لیکہ ءِ مٹ ءُ بدلی کنگ بوت۔ اے موہ ءِ سر ءَ سیدال  خان ناصر  ءَ گوشت کہ پارلیمنٹ گس ءُ پارلیمنٹ لاج راجی ارزشت ءِ جاھ اَنت کہ اودا ایمنی ءِ بالادستیں تک ءَ را دل یکیمی کنگ بہ بیت ءُ اے درگت ءَ ھچ وڑیں سمجھوتہ کنگ مہ بیت۔ آئی ءَ ہدایت کت کہ نوکیں ٹیکنالوجی ءَ را نوکیں سامان، موثر نگرانی ءُ ترندیں پسو ءِ نظام ءِ گوما یکجا کنگ ءَ سیکورٹی ءُ نگرانی ءِ نظام ءَ را گیش مھکم کنگ بہ بیت۔ آئی ءَ گوشت کہ راجی اسمبلی ءِ کارندہ ءُ باسک ءُ عام شہری آنی جان ءُ مال ءِ رکھینگ ریاست ءِ بنجاہی ذمہ واری انت، ایمن ءُ پرامنیں چاگرد کاروبار، تجارت ءُ ھمک روچی چست ءُ ایر آناں دیمروئی دیگ ءَ مزنیں کردے پیلو کنت۔ ڈپٹی  چیئرمین ءَ وفاقی دارالحکومت ءَ امن ءُ ایمنی ءِ جاور ھال ءِ گہتری ءَ را وش اتک کت ءُ اسلام آباد پولیس ءُ سیکورٹی ادارگ آنی کارکردگی ءَ را ساڑات۔ آئی ءَ گوشت کہ سیف سٹی منصوبگ ءِ گوما نوکیں ٹیکنالوجی ءُ جوانیں نگرانی ءِ نظام ءَ را گیش مھکم کنگ، توامیں سیادی داروکیں ادارگ آنی نیام ءَ ھمگرنچیں کمک المی اِنت تانکہ اسلام آباد ءَ را ایمن ءُ پرامنیں شہر جوڑ کنگ بہ بیت۔ ڈی آئی جی سیکورٹی عمر فاروق ءَ وفاقی دارالحکومت ءِ سرجمیں سیکورٹی ءِ جاور ھال، امن ءُ ایمنی ءِ تک ءُ شہری آنی رکھینگ ءِ واستہ چست کتگیں گامگیج آنی بابت ءَ ڈپٹی چیئرمین ءَ را سرجمیں بریفنگ داتگ۔ آئی ءَ گوشت کہ استیں حکومت ءِ کوشست، سیکورٹی ادارگ آنی موثر نگرانی ءُ ھمگرنچیں حکمت عملی ءِ سبب ءَ اسلام آباد ءِ سیکورٹی ءِ جاور گہتر بوھگ ءَ انت۔