پاکستان ءُ آذربائیجان ءِ دوستی یکے دومی ءِ سر ءَ بھروسہ ءُ بے دروریں یکوئی ءِ درشان اِنت، ما دو نیمگی کمک ءَ را گیش گیش کنگ ءَ ایں، شزہ فاطمہ خواجہ

اسلام آباد۔4نومبر  (اے پی پی): انفارمیشن ٹیکنالوجی ءُ ٹیلی کمیونیکیشن ءِ وفاقی وزیر شزہ فاطمہ خواجہ ءَ گوشت کہ پاکستان ءُ آذربائیجان ءِ نیام ءَ دوستی ءِ سیادی براتی، وت مہ وتی بھروسہ ءُ بے شرطیں یکوئی ءِ مھکمیں بنیات آنی سر ءَ اِنت۔ دوئیں براتیں ملکاں مدام ہر میاں اوستمانی فورم ءَ یکے دومی ءِ اصولی موقف ءِ حمایت کتگ ءُ اے دوستانہ سیادی ءَ نوں تجارت، سرمایہ کاری، دفاع ءُ ھاسیں رنگ ءَ ڈیٹا ٹرانسفارمیشن ءِ نوکیں پڑ آنی تہ ءَ یک فعالیں شریکداری ءِ شکل زرتگ۔ آئی ءَ چار شمبے ءِ روچ ءَ اسلام آباد ءَ جمہوریہ آذربائیجان ءِ ”فتح ءِ روچ“ ءِ سالروچ ءِ موہ ءَ برجم داشتگیں مزنیں مراگش ءَ ھاسیں مہمان ءِ بستار ءَ گوں تران کنگ ءَ ات۔ آذربائیجان ءِ سفیر عرفان داودوف ءِ میزبانی ءَ اے مراگش ءَ کمانڈر آرمی ایئر ڈیفنس لیفٹیننٹ جنرل سرفراز، وفاقی کابینہ ءِ باسک، پارلیمنٹ ءِ باسک، دوستیں ملک آنی سفیر، مزنیں فوجی ءُ سول حکام ءُ نامداریں مردم آنی بھر زوری بوتگ۔ وفاقی وزیر شزہ فاطمہ خواجہ ءَ پاکستان ءِ حکومت ءُ الس ءِ نیمگ ءَ آذربائیجان ءِ صدر الہام علیف، آذربائیجان ءِ حکومت ءُ الس ءَ را سوبمندی ءِ روچ ءِ درگت ءَ دل ءِ جہلانکی ءَ چہ مبارک بات دات ءُ پاکستان ءَ نوک نامینتگیں سفیر عرفان داودوف ءَ را پاکستان ءَ وتی زمہ واری ءِ سر ءَ زورگ ءِ سر ءَ دل ءِ جہلانکی ءَ چہ مبارک بات دات۔ وتی گشتانک ءِ تہ ءَ شزہ فاطمہ خواجہ ءَ گوشت کہ پاکستان ءَ مدام آذربائیجان ءِ حاکمیت ءُ سرزمین ءِ یکوئی ءِ بے شرطیں حمایت کتگ، وھدیکہ باکو ءَ ھم میاں اوستمانی دیوان آنی تہ ءَ مقبوضہ کشمیر ءِ جھیڑوی سرزمین ءَ ھوار ھرچ میاں اوستمانی جیڈھ ءِ سر ءَ پاکستان ءِ موقف ءِ سرجمیں حمایت کتگ۔ آئی ءَ باکو ءَ سوبمندی ءِ روچ ءِ پریڈ ءَ مزن وزیر محمد شہباز شریف ءِ راجدپتری بھر زوری ءِ ذکر کت ءُ گوشت کہ دوئیں ملک آنی سرود آنی گونج ءُ اُرد آنی یکجائی کارروائی ءَ چہ اے روچ ءَ وت مہ وتی یکوئی ءِ ثبوت رست۔ وفاقی وزیر ءَ تفصیلی کمک ءِ سر ءَ رژنائی ءِ شنگ کنگ ءَ گوشت کہ اسلام آباد ءَ آذربائیجان ءِ صدر ءِ نیمگ ءَ جوڑ کتگیں ’’آسن خدمت مرکاز‘‘ براتی سیادی ءِ یک چمکداریں مثال اِنت کہ ایشی ءِ وسیلگ ءَ یکیں بام ءِ چیر ءَ شہری آناں سرجمیں سرکاری ازمت پجارینگ بوھگ ءَ اَنت۔ حکومت اے نوکیں ماڈل ءَ را آزاد جموں ءُ کشمیر، گلگت بلتستان، خیبر پختونخوا ءُ سرجمیں ملک ءَ سر کنگ ءِ ھاترا جزم اِنت۔ جولائی 2024 ءَ دوئیں ملک آنی نیام ءَ انفارمیشن اینڈ کمیونیکیشن ٹیکنالوجی ءِ ھوالگ ءَ دستخط بوتگیں مفاہمت نامہ ءِ رد ءَ آئی ءَ گوشت کہ ڈیجیٹل معیشت، آئی سی ٹی ءُ ٹیکنالوجی ءِ پڑ ءَ دوئیں ملک آنی دیمروئی سک باز دلبڈی ءِ گپ اِنت۔ مراگش ءِ گڈسرا وفاقی وزیر ءَ آذربائیجان ءِ برجاھیں دیمروئی، حاکمیت، امن ءُ ایمنی ءِ ھاتر ءَ وتی نیکیں واھگ آنی درشانی کت ءُ   نہردگ جت کہ ’’پاکستان آذربائیجان دوستی زندہ باد!‘‘۔