زالبول  اول آصفہ بھٹو زرداری ءَ ضلع محمد ءَ پولیس ءِ کارندہ آنی سر ءَ اُرش ءِ مذمت کتگ ، شہیدانی آناں  توسیپ ءُ ستا

اسلام آباد۔3نومبر  (اے پی پی): زالبول  اول بی بی آصفہ بھٹو زرداری ءَ ضلع محمد ءَ پولیو ٹیم آنی رکھینگ ءِ ھاترا دیم داتگیں پولیس ءِ کارندہ آنی سر ءَ اُرش ءِ سک باز مذمت کتگ ءُ وتی کار آنی پیلو کنگ ءِ وھد ءَ بیران بوتگیں کارندہ آنی سر ءَ شگر ءُ منت گپتگ۔ سئے شمبے ءِ روچ ءَ سوشل میڈیا پلیٹ فارم ’’ایکس‘‘ ءِ سر ءَ جاڑی بوتگیں بیان ءِ تہ ءَ بی بی آصفہ بھٹو زرداری ءَ گوشت کہ پولیس ءِ کارندہ زھگاں پولیو ءِ وڑیں مہلکیں نادراھی ءَ چہ رکھینگ ءِ واستہ وتی راجی ذمہ واری ءَ پیلو کنگ ءَ اَنت۔ آئی ءَ شہیدیں کارندہ آنی دلیری، بہادری ءُ قربانی آناں ساڑاتگ ءُ گوشت کہ راج ایشانی ازمت ءُ قربانی آناں ارزشت داریت۔ بانُک اول ءَ شہیدانی کھول ءِ گوما دلپدردی ءِ درشانی کتگ ءُ پولیس ءِ ٹپیگیں کارندہ آنی زوت جان سلامتی ءِ دعا کتگ۔ آئی ءَ گوشت کہ اے وڑیں بزدلیں اُرش پاکستان ءِ وتی زھگاں پولیو ءَ چہ رکھینگ ءِ کوشست آناں ھچ وڑ ءَ یلہ دات نہ کن اَنت۔