مزن وزیر محمد شہباز شریف ءَ ریاض ءِ بادشاہ خالد ءِ انٹرنیشنل ایئرپورٹ  ءِ سر ءَ حوثی ملیشیا ءِ اُرش ءِ سک باز مذمت کتگ ، سعودی سروکی ءُ براتیں راج ءِ گوما بے مٹیں یکوئی ءِ درشانی  

اسلام آباد۔11اکتوبر  (اے پی پی): مزن وزیر محمد شہباز شریف ءَ ریاض ءِ بادشاہ خالد انٹرنیشنل ایئرپورٹ  ءِ سر ءَ حوثی ملیشیا ءِ اُرش ءِ سک باز مذمت کتگ ءُ سعودی سروکی ءُ براتیں راج ءِ گوما بے دروریں یکوئی ءِ درشانی کتگ۔ یک شمبے ءِ روچ ءَ سوشل میڈیا پلیٹ فارم ایکس ءِ سر ءَ جاڑی بوتگیں بیان ءِ تہ ءَ مزن وزیر ءَ گوشت کہ ریاض ءِ بادشاہ خالد میاں اوستمانی بالی پٹ ءِ سر ءَ حوثی ملیشیا ءِ نیمگ ءَ چہ زھرناکیں اُرش ءِ سک باز مذمت کنت، بیران بوتگیں مردمانی کھول ءِ گوما دلپدردی ءِ درشان کنت ءُ بیران بوتگیں مردم آنی زوت ءُ سرجمیں جان سلامتی ءِ دعا کنت۔ مزن وزیر ءَ گوشت کہ شہری ءُ ھاسیں تنصیبات آناں نشانگ جوڑ کنگ ءَ اُرش کجام ھم رنگ ءَ منگ نہ بنت ءُ دمگی امن ءُ ایمنی ءِ واستہ مزنیں ھترہ ءِ جوڑ بنت۔ میان استمانی کانود ءِ بے دروریں خلاف ورزی ءِ بنیاد ءَ اے وڑیں زوراکی ءِ کار زوت بند کنگ بہ بنت۔ آئی ءَ گوشت کہ پاکستان سعودی عرب ءِ بادشاھی، آئی ءِ سروکی ءُ براتیں راج ءِ گوما بے دروریں یکوئی ءِ تہ ءَ اوشتاتگ۔ مکہ ءِ یکجائی دیمپانی منوگری ءُ دوئیں ملکانی نیام ءَ دیریں براتی سیادی ءِ رد ءَ ما سعودی عرب ءِ حاکمیت، سرزمین ءِ یکوئی ءُ ایمنی ءِ ھاتر ءَ وتی بے مٹیں عزم ءِ  درشان ءَ کناں۔