منصوبہ بندی ءِ وفاقی وزیر ءَ دیوان ءِ سروکی کتگ، ضروری چیزانی نرخانی استحکام ءِ ھاتر ءَ ترندیں گامگیج آنی پنت ءُ شون کتگ، الس ءَ را ریلیف داتگ

اسلام آباد۔9اکتوبر  (اے پی پی): منصوبگ بندی، دیمروئی ءُ ھاسیں گامگیج آنی وفاقی وزیر پروفیسر احسن اقبال ءَ گوشت کہ الس ءَ را ریلیف ءِ پجارینگ ءُ المی چیز آنی نرخ آنی تہ ءَ استحکام ءِ برجائی حکومت ءِ اولی ترجی اِنت، ایشی ءِ واستہ مارکیٹ ءِ سر ءَ مدام نگرانی ءُ ناجائزیں منافع ءِ ھلاپ ءَ موثر گامگیج ءِ ضمانت دیگ بوھگ ءَ اِنت۔ جمعہ ءِ روچ ءَ وفاقی وزیر ءِ سروکی ءَ راجی نرخ آنی نگرانی ءِ ھوالگ ءَ دیوان ءَ افراط زر ءِ جاور ھال ءُ مارکیٹ آنی تہ ءَ المی چیز آنی نرخ آنی سر ءَ چار ءُ تپاسی کنگ بوت۔ اے موہ ءِ سر ءَ وفاقی وزیر ءَ صوبائی ءُ ضلعی انتظامیہ ءَ را پنت ءُ شون کت کہ آ ہول سیل ءُ خوردہ نرخ آنی نیام ءَ فرق ءِ سر ءَ نزیکیں نگرانی ءَ بہ کن اَنت ءُ گندم ءِ آٹہ، ضروری وردن ءُ مائع پٹرولیم گیس (ایل پی جی) ءِ ذخیرہ کنگ، منافع چست کنگ ءُ ناجائزیں نرخ آنی تہ ءَ گیشی ءِ ھلاپ ءَ ترندیں ءُ سکیں گامگیج بہ زور اَنت۔ پروفیسر احسن اقبال ءَ گوشت کہ گلوبل مارکیٹ ءَ نرخانی کمی ءِ میوہ آناں پاکستانی کشت ءُ کشاری ءُ الس ءَ را براہ راست سر کنگ ءِ واستہ گامگیج کنگ بوھگ ءَ انت۔ ڈی اے پی کھاد ءِ عالمی نرخ آنی تہ ءَ کمی ءِ ھال ءَ آئی ءَ گوشت کہ میاں اوستمانی مارکیٹ ءَ چہ رستگیں ریلیف ءَ را بنجاہی تک ءَ دیم دیگ المی اِنت تانکہ کشت ءُ کشاری ءَ را ایشی ءِ راستیں نپ رس ایت۔ وفاقی وزیر ءَ گیش ءَ چہ گیش پدر کت کہ پٹرولیم ءِ چیز آنی نرخ آنی تہ ءَ بدلی ءَ پد ٹرانسپورٹ ءِ کرایہ آنی تہ ءَ نا منصفانہ گیشی برداشت کنگ نہ بیت۔ سیادی داروکیں واکداراں پنت ءُ شون کنگ بوتگ کہ آ کرایہ ءِ سر ءَ نگرانی بہ کن اَنت ءُ الس ءِ سر ءَ گیشیں مالی بار ءِ ایر کنوکیں مردمانی ھلاپ ءَ رھبندانی رد ءَ کارروائی ءَ را دل یکیمی بہ کن اَنت۔ آئی ءَ گوشت کہ السی سیت آنی رکھینگ، المی چیز آنی منوگریں نرخ آنی تہ ءَ دست کپگ ءُ ناجائزیں منافع ءِ گر ءُ دار حکومت ءِ اولی ترجی آنی تہ ءَ ھوار انت۔ اے مول ءُ مراد ءِ واستہ مارکیٹ ءِ جوانیں نگرانی ءُ بہا آنی کنٹرول ءِ گامگیج برجاہ دارگ بنت۔