مزن وزیر شہباز شریف ءَ سعودی عرب ءِ سرا حوثی ملیشیا ءِ ناشرکاری اُرش مذمت کتگ

اسلام آباد۔9اکتوبر  (اے پی پی): مزن وزیر محمد شہباز شریف ءَ سعودی عرب ءِ ھلاپ ءَ حوثی ملیشیا ءِ ناشرکاری اُرش آنی سک باز مذمت کتگ ءُ سعودی سروکی ءُ الس ءِ گوما بے دروریں یکوئی ءِ درشان کتگ۔ جمعہ ءِ روچ ءَ سوشل نیٹ ورکنگ ءِ ویب سائٹ ’’ایکس‘‘ ءِ سر ءَ جاڑی بوتگیں بیان ءِ تہ ءَ مزن وزیر ءَ گوشت کہ سعودی عرب ءِ بادشاھی ءِ سر ءَ حوثی ملیشیا ءِ نیمگ ءَ چہ بار باریں ناشرکاری اُرش آنی سر ءَ سک باز مذمت کنگ بیت، ایشی ءِ تہ ءَ ریاض ءِ کنگ خالد میاں اوستمانی بالی پٹ ءُ ابھا میاں اوستمانی بالی پٹ ءَ را نشانگ جوڑ کنگ ھوار اِنت کہ ایشی ءِ آسر ءَ بازیں مردم بیران ءُ بازیں مردم ٹپیگ بوتگ اَنت۔ مزن وزیر ءَ سعودی سلاہ بندیں اُرد ءُ اتحادی اُرد ءِ تیاری ءُ پیشہ وارانہ لیکہ ءَ را ساڑات ءُ گوشت کہ آہاں راہ ءَ بازیں بیلسٹک میزائل تباہ کتگ۔ آئی ءَ بے گناھیں جانانی رکھینگ ءُ بادشاھی ءِ ایمنی ءِ ھاترا آھانی برجاھیں کوشست آناں ھم داد دات۔ مزن وزیر ءَ گوشت کہ پاکستان سعودی عرب ءِ بادشاہی ءِ سروکی ءُ الس ءِ گوما بے دروریں یکوئی ءِ تہ ءَ اوشتاتگ۔ مکہ ءِ یکجائی دفاعی معاہدہ ءُ آئی ءِ اسٹریٹجک سیاسی ءُ دفاعی کمیٹی ءِ نوکیں پیسلہ آنی رد ءَ سعودی عرب ءِ حاکمیت، سرزمین ءِ یکوئی ءُ ایمنی ءِ واستہ پاکستان ءِ جزم بے درور انت۔ ما سعودی عرب ءِ وتی راج ءِ دفاع ءُ وتی شہر ءُ زندگیں تنصیبات ءِ رکھینگ ءِ جائزیں حق ءَ ھم سرجمی ءَ حمایت کنیں۔ مزن وزیر ءَ گوشت کہ حوثی ملیشیا ءَ را اے اُرش زوت بند کنگ لوٹ اَنت ءُ ما اے ھترہ آنی دیم ءَ سعودی عرب ءِ گوما شانہ پہ شانک ءَ اوشتگ ءَ برجاہ دار ایں ۔