آئی ٹی برآمدات ءِ تہا 25 ارب ڈالر ءِ ٹارگٹ ءِ سرا پابندیں ورنا ءُ زالبولیں ٹیلنٹ پاکستان ءِ ڈیجیٹل معیشت ءِ ریڑھ ءِ ہڈ انت، شزہ فاطمہ خواجہ

اسلام آباد۔28ستمبر  (اے پی پی): انفارمیشن ٹیکنالوجی ءُ ٹیلی کمیونیکیشن ءِ وفاقی وزیر شزہ فاطمہ خواجہ ءَ گوشت کہ پاکستان ءِ آئی ٹی برآمدات ءَ سالانہ 20درسد ءَ چہ گیش گیشی بوھگ ءَ اِنت ءُ حکومت مزن وزیر ءِ نیمگ ءَ ایر کتگیں 25ارب ڈالر ءِ برآمدات ءِ ٹارگٹ ءِ سر ءَ سر بوھگ ءِ نیمگ ءَ سنجیدگی ءَ گوں گامگیج زورگ ءَ اِنت۔ ملک ءِ 240ملین آبادی ءِ تہ ءَ چہ 68درسد ورنا ءُ 50درسد کارکن زالبول اَنت کہ ایشی ءِ بنیاد ءَ ملک ءِ ڈیجیٹل سروسز ءِ شوبگ جھان ءِ مارکیٹ آنی تہ ءَ مقابلہ کنگ ءَ اِنت ءُ نوں ملک ءِ معیشت روایتی کارگو ءُ جہاز ءِ بدل ءَ نوکیں زانت ءِ سر ءَ بنیات ءِ سروسز ءِ نیمگ ءَ رھادگ بوھگ ءَ اِنت۔ آئی ءَ اے گپ دو شمبے ءِ روچ ءَ اسلام آباد ءَ ہواوے گلوبل سروس سینٹر ءِ تر ءُ تاب ءِ موہ ءَ میڈیا ءَ گوں تران ءُ مراگش ءِ ساھت ءَ کت۔ آئی ءَ گوشت کہ باصلاحیتیں آئی ٹی ٹیلنٹ دگنیا ءِ ھمک دمگ ءَ وتی توانائی ءَ را ثابت کنگ ءَ اِنت۔ آئی ءَ گوشت کہ ایوک ءَ وفاقی دارالحکومت ءَ نشتگیں 2500ورنا انجینئر دگنیا ءِ 100 ءَ چہ گیش میاں اوستمانی مارکیٹ آنی تہ ءَ ٹیلی کام ءُ آئی ٹی نیٹ ورک چلائینگ ءَ اَنت ایشی ءِ تہ ءَ میاں اوستمانی، افریقہ ءُ لاطینی امریکہ ھوار اِنت ایشی ءَ چہ دگنیا ءِ تہ ءَ پاکستان ءِ یک مھکم ءُ نامداریں امیج ءِ جوڑ کنگ بوھگ ءَ اِنت۔ شزہ فاطمہ خواجہ ءَ گوشت کہ حکومت ملک ءَ ڈیجیٹل انقلاب ءُ ورنا آناں نوکیں ازم ءِ تربیت ءِ سر ءَ ھاسیں دلگوشی دیگ ءَ انت۔ اے درگت ءَ سئے لکھ نودربر آناں نوکیں ٹیکنالوجی ءَ چہ لیس کنگ ءِ پروگرام ءِ چیر دستی ءَ 200 ءَ چہ گیش ملکی یونیورسٹی آنی تہ ءَ نوکیں آئی سی ٹی اکیڈمی جوڑ کنگ بوتگ، ایشی ءَ چہ تربیت زرتگیں 400 ءَ چہ گیش پاکستانی ماہرین درملک ءَ میاں اوستمانی مارکیٹ آنی تہ ءَ ھاسیں ازمت آناں پیلو کنگ ءَ اَنت۔ وفاقی وزیر ءَ گوشت کہ پاکستان ڈیجیٹل کنیکٹوٹی ءُ ٹیلی کام انفراسٹرکچر ءِ ھوالگ ءَ نوکیں دور ءِ تہ ءَ داشتگ۔ ملک ءَ حالی ءَ 480 میگاہرٹز ءِ تاریخی ءُ دنیا ءِ مزنیں سپیکٹرم نیلامی سوبمندیں رنگ ءَ برجم داشتگ ات کہ ایشی ءَ چہ 5 جی ءُ آیوکیں نوکیں ٹیکنالوجی آنی بنیات ءِ دیم ءَ آرگ بیت۔ آئی ءَ گوشت کہ حکومت میاں اوستمانی ٹیک کمپنی آنی گوما شریکداری ءَ را ایوک ءَ سروسز ءَ را محدود نہ کنگ ءَ اِنت بلکیں ملک ءَ ریسرچ اینڈ ڈویلپمنٹ سنٹر آنی جوڑ کنگ ءَ را ھم دل یکیمی کنگ ءَ اِنت تانکہ پاکستانی ورنا جھان ءِ تک ءَ نوکیں منصوبگ آنی سروکی ءَ بہ کن اَنت۔