مالدیپ ءِ پارلیمانی ڈل ءَ پاکستان انسٹی ٹیوٹ فار پارلیمانی سروسز ءِ تر ءُ تاب

اسلام آباد۔24ستمبر  (اے پی پی): وفاقی وزیر کانود ءُ انصاف، سینیٹر  اعظم نذیر  تارڑ ءَ گوشت کہ آئین ءَ ریاست ءِ تہ ءَ قانون ساز، ایگزیکٹو ءُ عدلیہ ءِ نیام ءَ اختیارات ءِ بہر ءُ بانگ ءِ اصول ایر کنگ بوتگ وھدے کہ پارلیمانی نگرانی ءُ ادارگ آنی نیام ءَ اختیارات آنی توازن جمہوری نظام ءِ یک ھاسیں بھرے ۔ وزارت ءِ کانود ءُ انصاف ءِ جارکش ءِ رد ءَ آ پنچ شمبے ءِ روچ ءَ پاکستان انسٹی ٹیوٹ فار پارلیمانی سروسز ءِ تر ءُ تاب ءِ موہ ءَ مالدیپ ءِ پارلیمانی ڈل ءَ گوں گشتانک دیگ ءَ ات۔ مالدیپ ڈل ءِ تر ءُ تاب ءِ وھد ءَ پارلیمانی تجروبت ءُ زانتکاری آنی مٹ ءُ بدلی ءِ پروگرام ءِ رد ءَ ھاسیں دیوان ءِ برجم دارگ بیت۔ وفاقی کانود ءِ وزیر ءَ مالدیپ ءِ پارلیمانی ڈل ءَ را پاکستان ءِ پارلیمانی نظام ءِ جتا جتائیں تک ءُ پہنات آنی بابت ءَ سرپد کت۔ آئی ءَ قومی اسمبلی ءُ قائمہ کمیٹی ءِ کار ءُ کرد، کانود سازی ءِ جتاجتائیں پڑ ءُ قائمہ کمیٹی آنی کرد ءِ بابت ءَ ڈل ءَ را سرپد کت۔ واجہ اعظم نذیر  تارڑ ءَ گوشت کہ پاکستان ءِ آئین ءِ نظام ءِ بنیات ءَ اقتدار ءِ یکجا کنگ ءُ ریاستی ادارگ آنی نیام ءَ چیک اینڈ بیلنس ءِ بنیاد ءِ سر ءَ ایر کنگ بوتگ۔ آئی ءَ پارلیمانی نگرانی ءِ ارزشت ءُ کانود سازی ءِ عمل ءَ پارلیمانی کمیٹی ءِ کرد ءِ سر ءَ ھم زور پر دات۔ وفاقی کانود ءِ وزیر ءَ مالدیپ ءِ ڈل ءَ را پاکستان کوڈ ءِ ویب سائٹ ءُ موبائل ایپ ءِ وسیلگ ءَ آئین ءُ کانود آنی تہ ءَ دسترس ءِ دعوت دات ءُ گوشت کہ پاکستان کوڈ وزارت ءِ کانود ءُ انصاف ءِ نیمگ ءَ چہ ملک ءِ کانود آنی تہ ءَ آسانی ءَ گوں دسترس ءِ واستہ جوڑ کتگیں پلیٹ فارم اِنت۔ مالدیپ ءِ پارلیمانی ڈل ءَ پاکستان ءِ پارلیمانی ءُ قانون سازی ءِ عمل ءِ تہا سک باز دلچسپی ءِ درشانی کت۔ فرینک ءَ پاکستان ءُ مالدیپ ءِ نیام ءَ پارلیمانی تجربگ ءُ زانتکاری آنی تبادلہ ءَ را برجاہ دارگ ءِ سر ءَ تپاک کتگ۔