اوورسیز پاکستانی ملک ءَ سرمایہ کاری بہ کن انت، پاکستان جہانی تک ءَ وتی سفارتی ذمہ واری ءَ سرجمیں رنگ ءَ پیلو کنگ ءَ انت، اسحاق ڈار

لندن۔29اگست  (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ گوشت کہ پاکستان ءِ سفارتکاری ءُ معیشت ءِ تہ ءَ جوانیں بدلی اتکگ، اوورسیز پاکستانی آناں ملک ءَ سرمایہ کاری کنگی اِنت، پاکستان وتی سفارتی ذمہ واری آناں جھان ءِ تک ءَ یک جامع رنگ ءَ پیلو کنگ ءَ اِنت، ءُ سوبمند بوتگ۔ اے ھیالانی درشانی نائب مزن وزیر ءَ لندن ءَ پاکستانی کمیونٹی ءَ گوں تران کنان ءَ کت اَنت۔ نائب مزن وزیر ءَ گوشت کہ پاکستان گپ ءُ تران ءُ سفارتکاری ءَ را جیڈھ آنی گیواری لیک ایت، جیڈھ جنگ ​​ءَ گوں گیش ءُ گیوار نہ بنت، گپ ءُ تران ءُ سفارتکاری ءِ گیواری ءِ یکیں راہ انت۔ آئی ءَ گوشت کہ امریکہ ءُ ایران ءِ جیڈھ ءَ پاکستان ءَ مھکمیں سفارتی کوشست کتگ ءُ دوئیں ملک آناں یک میز ءِ سر ءَ آرگ ءِ واستہ ھاسیں کرد پیلو کتگ، دگنیا پاکستان ءِ سفارتی کوشست آناں ساڑاھگ ءَ اِنت، پاکستان ءَ را مرچی دمگ ءَ امن ءِ دیمروئی کنوکیں ملک ءِ رنگ ءَ چارگ بوھگ ءَ اِنت۔ آئی ءَ گوشت کہ پاکستان ءَ را گلوبل اسٹیج ءِ سر ءَ ھاسیں جاگہ ​​حاصل کتگ، پاکستان ءِ سلاھ بندیں اُرد ءَ گوستگیں سال ءَ جوانیں بہادری ءِ درشان کتگ۔ سینیٹر محمد اسحاق ڈار ءَ گشتگ کہ آ پاکستان ءُ برطانیہ ءِ سیادی ءَ را نوکیں کونڈ ءُ بالاد ءَ سر کنگ لوٹ انت، ءُ پاکستان ءِ سیادی ءَ را گیش مھکم کنگ ءِ ھاتر ءَ برطانوی واکدارانی گوما یک تپاکی یے بوتگ۔ نائب مزن وزیر ءَ گوشت کہ پاکستان ءِ معیشت نوں برجم بوتگ، پالیسی ءِ شرح 22درسد ءَ چہ 11درسد ءَ کم بوتگ۔ آئی ءَ گوشت کہ اقتصادی استحکام ءَ پد حکومت ءِ دلگوشی نوں دیمروئی ءُ شرح ءِ شرح ءِ سر ءَ انت۔ اقتصادی دیمروئی ءِ گوما یک مردمی آمدنی ءُ زندمان ءِ کچ ءُ کساس گہتر بیت ۔ نائب مزن وزیر ءَ گوشت کہ پاکستان ءَ دولت مشترکہ ءِ تہ اصلاحات ءِ ضلورت ءِ سر ءَ زور داتگ، وھدیکہ پاکستان ءَ موسمی مٹ ءُ بدل ءَ گوں گر ءُ چیل بوھگ ءِ واستہ دولت مشترکہ ءِ ملک آناں کمک ءِ پیشکش کتگ۔ سینیٹر محمد اسحاق ڈار ءَ گوشت کہ پاکستان ءَ را 2017ءِ اقتصادی اشارہ آنی نیمگ ءَ برگی اِنت، مول ءُ مراد پاکستان ءَ را دگنیا ءِ 24می مزنیں معیشت جوڑ کنگ ءُ جی ٹوئنٹی ءِ تہ ءَ ھوار کنگ اِنت۔ آئی ءَ گوشت کہ پاکستان ڈیفالٹ ءِ ھترہ ءَ چہ دراتکگ، وھدیکہ ملک ءِ زرّ ءِ ذخیرہ ءَ باز گہتری بوتگ۔ آئی ءَ گوشت کہ مہنگائی 30درسد ءَ چہ یک ہندسہ ءَ اتکگ۔ نائب مزن وزیر ءَ گوشت کہ پاکستان ءَ را خطہ ءِ نیٹ سیکورٹی پروائیڈر ءِ رنگ ءَ بیان کنگ بوھگ ءَ انت۔ آئی ءَ درملکیں پاکستانی آناں ملک ءِ مزنیں سرمایہ ءِ رنگ ءَ گوشت کہ درملکیں پاکستانی آنی نیمگ ءَ چہ دیم دیگ بوتگیں زرّ ملک ءِ معیشت ءِ تہ ءَ ھاسیں کرد پیلو کن اَنت۔ نائب مزن وزیر ءَ گوشت کہ درملک ءَ پاکستانی آنی نیمگ ءَ چہ زرّ دیم دیگ سالانہ 40 ارب ڈالر ءَ چہ گیش بوھگ ءَ انت۔ آئی ءَ اوورسیز پاکستانی آں چہ لوٹ کتگ کہ آ ملک ءَ سرمایہ کاری بہ کن اَنت ءُ روشن ڈیجیٹل اکاؤنٹ ءِ وسیلگ ءَ پاکستان ءَ زرّ روان بہ کن اَنت۔ آئی ءَ گوشت کہ پاکستان ءِ سفارتکاری ءُ معیشت ءِ تہ ءَ جوانیں بدلی اتکگ، بازیں ملک پاکستان ءِ گوما کار کنگ ءِ واھشت مند اَنت ءُ پاکستان ءَ را جتاجتائیں ملک آنی نیمگ ءَ چہ دعوت ھم رستگ اَنت۔