پاکستان جہانی تک ءَ وتی سفارتی ذمہ واریاں سرجمیں رنگ ءَ پیلو کنگ ءَ انت، ملک ءِ معیشت گامگیج بندات کتگ، نائب مزن وزیر اسحاق ڈار لندن ءَ پاکستانی کمیونٹی ءَ گوں تران

لندن۔29اگست  (اے پی پی): نائب مزن وزیر ءُ درئی کارانی وزیر سینیٹر محمد اسحاق ڈار ءَ گوشت کہ پاکستان جھان ءِ تک ءَ وتی سفارتی ذمہ واری آنی سر ءَ سرجمیں رنگ ءَ پیلو کنگ ءَ اِنت، ملک ءِ معیشت ءِ تہ ءَ گامگیج بندات بوتگ، برطانیہ ءِ تر ءُ تاب سک باز جوانیں ءُ سوبمند بوتگ۔ اے ھیالانی درشانی آئی ءَ لندن ءَ پاکستانی کمیونٹی ءَ گوں تران کنان ءَ کت انت۔ نائب مزن وزیر ءَ گوشت کہ امریکہ ءُ ایران ءِ جیڈھ ءَ پاکستان ءَ مھکمیں سفارتی کوشست کتگ ءُ دوئیں ملک آناں یک ٹیبل ءِ سر ءَ آرگ ءَ ھاسیں کرد پیلو کتگ۔ آئی ءَ گوشت کہ جھان ءِ تک ءَ پاکستان ءَ را ھاسیں جاگہ ​​رس اِتگ، پاکستان ءِ سلاھ بندیں اُرد ءَ گوستگیں سال ءَ مزنیں بہادری ءِ درشان کتگ۔ سینیٹر محمد اسحاق ڈار ءَ گوشت کہ آ پاکستان ءُ برطانیہ ءِ نیام ءَ سیادی ءَ را نوکیں بالاد ءَ سر کنگ لوٹ اَنت، پاکستان ءِ سیادی ءَ را گیش مھکم کنگ ءِ واستہ برطانیہ ءِ واکدار آنی گوما یک تپاکی یے بوتگ۔ نائب مزن وزیر ءَ گوشت کہ پاکستان ءِ معیشت نوں برجم بوتگ، پالیسی ءِ شرح 22درسد ءَ چہ 11درسد ءَ کم بوتگ۔ آئی ءَ گوشت کہ اقتصادی استحکام ءَ پد حکومت ءِ دلگوشی نوں دیمروئی ءُ شرح ءِ شرح ءِ سر ءَ انت۔ اقتصادی دیمروئی ءِ گوما یک مردمی آمدنی ءُ زندمان ءِ کچ ءُ کساس گہتر بیت ۔ نائب مزن وزیر ءَ گوشت کہ پاکستان ءَ دولت مشترکہ ءِ تہ اصلاحات ءِ ضلورت ءِ سر ءَ زور داتگ، وھدیکہ پاکستان ءَ موسمی مٹ ءُ بدل ءَ گوں گر ءُ چیل بوھگ ءِ واستہ دولت مشترکہ ءِ ملک آناں کمک ءِ پیشکش کتگ۔ سینیٹر محمد اسحاق ڈار ءَ گوشت کہ پاکستان ءَ را 2017ءِ اقتصادی اشارہ آنی نیمگ ءَ برگی اِنت، مول ءُ مراد پاکستان ءَ را دگنیا ءِ 24می مزنیں معیشت جوڑ کنگ ءُ جی ٹوئنٹی ءِ تہ ءَ ھوار کنگ اِنت۔ آئی ءَ گوشت کہ پاکستان ڈیفالٹ ءِ ھترہ ءَ چہ دراتکگ، وھدیکہ ملک ءِ زرّ ءِ ذخیرہ ءَ باز گہتری بوتگ۔ مہنگائی 30درسد ءَ چہ سنگل ڈیجیٹل ءَ اتکگ۔