موسمیاتی بدلی پاکستان ءِ واستہ مزنیں چیلنج اِنت، موثر ءُ دراجیں مدتی حکمت عملی ءِ سرا عمل کنگ المی اِنت، مصدق ملک

اسلام آباد۔29اگست  (اے پی پی): موسمی بدلی ءُ چاگردی رابطہ کاری ءِ وفاقی وزیر ڈاکٹر مصدق ملک ءَ گوشت کہ موسمیاتی بدلی پاکستان ءِ واستہ مزنیں چیلنج جوڑ بوتگ، ملک ءَ را سیلاب ءُ ایندگر قدرتی آفت آنی ھترہ آنی گوما گر ءُ چیل بوھگ ءِ واستہ یک جوانیں، یکجاھیں ءُ دراجیں مدتی حکمت عملی ءِ زورگ لوٹ ایت۔ شمبے ءِ روچ ءَ مراگش ءَ گوں گشتانک دیان ءَ آئی ءَ گوشت کہ پاکستان موسمی مٹ ءُ بدلی ءِ رد ءَ سک باز آماچ بوھگ ءَ اِنت ءُ اے آسر آنی آماچیں ملک آنی تہ ءَ نامدار اِنت۔ اے چیلنج ءَ گوں گر ءُ چیل بوھگ ءِ ھاترا درستیں سیادی داروکیں ادارگاں یکجاھی ءَ کار کنگی اِنت، وھدیکہ جھان ءِ کمک ءُ وسیلگ ھم لوٹ اَنت۔ وفاقی وزیر ءَ گوشت کہ موسمی مٹ ءُ بدلی ءِ آسر آنی گوما گر ءُ چیل بوھگ ءُ ایشی ءَ را کم کنگ ءِ واستہ اجتماعی گامگیج المی انت۔ موسمیاتی بدلی ءِ گوں گر ءُ چیل بوھگ ءِ صلاحیت ءُ وسیلگ ءِ واھندیں ملک اے درگت ءَ وتی کرد ءَ پیلو بہ کن اَنت۔ آئی ءَ گوشت کہ پاکستان موسمیاتی انصاف ءِ ھاترا جھان ءِ تک ءَ وتی کیس ءَ را زبردستی پیش کنگ ءَ اِنت، وھدیکہ موسمیاتی مٹ ءُ بدلی ءَ چہ آماچیں ملک آناں میاں اوستمانی براتی ءِ سرجمیں کمک ءِ ضلورت اِنت تانکہ آ موسمی رسک آنی گوما جوانیں رنگ ءَ دیم پہ دیم بوت کن اَنت۔ ڈاکٹر مصدق ملک ءَ چاگردی رکھینگ ءُ موسمیاتی ردوم ءِ واستہ یکجاھیں پالیشی آنی ضلورت ءِ سر ءَ زور پر دیان ءَ گوشت کہ قدرتی آفت آنی تاوان ءَ را کم کنگ ءِ واستہ دمگی آبادی ءِ گنجائش ءَ را گیش کنگ لوٹ ایت، وھدیکہ آفت آنی گوما گر ءُ چیل بوھگ ءِ واستہ پیشگی تیاری ءُ موثر منصوبگ بندی ءَ را دل یکیمی کنگ ھم المی اِنت۔ آئی ءَ گوشت کہ موسمی بدلی یک مشترکہ جھان ءِ چیلنج اِنت، ایشی ءَ را راجی تک ءَ یکجاھیں گامگیج آنی وسیلگ ءَ گیواری کنگ لوٹ ایت، ایشی ءِ ھوار ءَ میاں اوستمانی کمک، وسیلگ ءُ یکجائی کوشست آناں دیمروئی دیگ لوٹ ایت۔