وزیر صحت ءِ وفاق ءِ چیر دستیں توامیں سرکاری ہسپتال آنی تہ  ءَ فائر سیفٹی آڈٹ  زوت بندات کنگ ءِ  پنت ءُ شون

اسلام آباد۔29اگست  (اے پی پی): وفاقی جان سلامتی ءِ وزیر مصطفیٰ کمال ءَ وفاق ءِ چیر دستیں   سرکاری ہسپتال آنی تہ ءَ فائر سیفٹی آڈٹ ءِ زوت بندات کنگ ءِ پنت ءُ شون کتگ۔ شمبے ءِ روچ ءَ وزارت ءِ جان سلامتی ءِ جارچین ءِ نیمگ ءَ جاڑی بوتگیں بیان ءِ رد ءَ وزیر جان سلامتی مصطفیٰ کمال ءِ پنت ءُ شون ءِ پد ءَ اے درگت ءَ نمدی ءِ جاڑی کتگ ۔ وزارت ءِ جان سلامتی ءِ جارکش ءَ گوشت کہ یک مجاز ءُ ماہریں فائر سیفٹی کمپنی ءِ وسیلگ ءَ فائر سیفٹی ءِ سرجمیں آڈٹ کنگ ءِ پیسلہ کنگ بوتگ۔ آئی ءَ گوشت کہ آڈٹ ءِ تہ ءَ فائر الارم، آتش سوزی ءِ سامان، ایمرجنسی دروازگ ءُ یلہ کنگ ءِ راہ آنی چار ءُ تپاسی کنگ بیت۔ ایشی ءَ ابید ہسپتال آنی تہ ءَ بجلی، دگہ بوت کنوکیں آس لگگ ءِ ھترہ، ایمرجنسی ءِ رد ءَ رد ءُ بند ءُ کارندہ آنی تیاری ءِ سر ءَ ھم چار ءُ تپاسی کنگ بیت۔ آتش نشانی ءِ آڈٹ ءَ پدر بوتگیں کوتاہی کہ جان ءُ مال ءِ ھاترا زوتیں ھترہ ءِ سبب بنت آ اولیت ءِ بنیاد ءَ گیش ءُ گیوار کنگ بنت۔ ترجمان ءَ گشتگ کہ درستیں ہسپتال آناں پنت ءُ شون کنگ بوتگ کہ آڈٹ ءِ بندات ءِ بابت ءَ وزارت جان سلامتی ءَ را زوت سرپد بہ کن انت، سیادی داروکیں کمپنی ءِ نام ءُ سرجمی ءِ متوقع روچ ءِ بابت ءَ سرپدی بہ دنت۔ اسلام آباد ہیلتھ کیئر ریگولیٹری اتھارٹی ءَ را سرکاری ءُ نجی جان سلامتی ادارگ آنی تہ ءَ آس لگگ ءِ آڈٹ ءِ بندات ءُ تصدیق کنگ ءِ ھم پنت ءُ شون کنگ بوتگ۔ وزارت جان سلامتی ءِ جارکش ءَ گشتگ کہ آڈٹ ءِ رد ءَ عمل کنگ ءِ بابت ءَ یک سرجمیں رپورٹے وزارت جان سلامتی ءَ را پیش کنگ بیت، ایشی ءِ تہ ءَ آڈٹ ءِ بندات کتگیں ادارگ آنی پجار کنگ بیت ءُ آڈٹ ءِ رد ءَ زیر التوا انت۔