اے پی پی ءَ آجوئی ءِ روچ ءِ درگت ءَ ھاسںن مراگش ءِ بندوبست کتگ، ادارُکی ایم ڈی سبین عثمان خٹک ءَ اے پی پی ءَ را یک مھکم ءُ جوانیں راجی ادارگ جوڑ کنگ ءِ واستہ یکوئی ءُ یکجائی کوشست آنی ارزشت ءِ سر ءَ زور پر داتگ

اسلام آباد۔17اگست  (اے پی پی): راجی ھال رسانکی ادارگ  ایسوسی ایٹڈ پریس آف پاکستان ءَ ماتیں وطن ءِ آجوئی ءِ روچ ءِ موہ ءَ یک ھاسیں مراگشے ءِ برجم داشتگ ات کہ ایشی ءِ تہ ءَ کارندہ آں وتی جوش ءُ جزبگ ءِ درشان کتگ ات کہ آ وتی کاراں گوں محنت، ایمانداری ءُ لگن ءِ گوما درآمد ءِ سر ءَ دلگوش بہ کن انت، وھدیکہ ادارُکی منیجنگ ڈائریکٹر  سبین عثمان خٹک  ءَ اے پی پی ءَ را یک مھکم ءُ کارآمدیں راجی ھال رسانکدر ءِ جوڑ کنگ ءِ ھاترا اجتماعی کوشست کنگ ءَ انت۔ ادا انفارمیشن سروس اکیڈمی ءَ برجم داشتگیں آجوئی ءِ روچ ءِ مراگش ءَ گوں گشتانک دیان ءَ ادارُکی ایم ڈی سبین عثمان خٹک  ءَ گوشت کہ آجوئی ءِ روچ مارا پاکستان ءِ جوڑیشت ءِ واستہ داتگیں مزنیں قربانی آنی یات ءَ دنت ءُ لوٹ کنت کہ ھمک شہری ساپ دلی، کزبی کار ءُ   محنت ءُ وتی ازم  آناں کارمرد کنان ءَ ملک ءِ دیمروئی ءِ تہ ءَ کرد پیلو بہ کنت۔ آئی ءَ گوشت کہ آجوئی ایوک ءَ شاتکامی  ءِ گپ نہ انت بلکینگ ءَ ایمانداری، یکوئی ءُ جزم ءِ گوما وتی وتی پڑ آنی تہ ءَ ملک ءِ ازمت ءِ ذمہ واری انت۔

سبین عثمان خٹک   ءَ گوشت کہ اے پی پی ءِ ذمہ واری اِنت کہ یک راجی ھال رسانکی ادارگے ءِ بستار ءَ الس ءَ را راستیں، وھد ءِ سر ءَ ءُ پکوئیں  ھال ءُ اھوال آناں سر بہ کنت ءُ دروگیں ھال ءُ اھوال ءُ گمراہ کنوکیں ھال آنی شنگ ءُ تالان ءِ گر ءُ دار ءِ تہ ءَ جوانیں کرد پیلو بہ کنت۔ ادارُکی ایم ڈی ءَ اے پی پی ءِ کارندہ آنی وشھالی ءِ واستہ چست کتگیں گامگیج آنی ذکر کنان ءَ گوشت کہ بورڈ آف ڈائریکٹرز ءَ وتی گوستگیں دیوان آنی تہ ءَ پگار ءُ آسراتی آنی تہ ءَ کل ءَ 112درسد گیشی ءِ منظوری داتگ۔ آئی ءَ گوشت کہ اسپیشل پرسن الاؤنس ءَ را گیش کنگ بوتگ پگار ءَ را 10ہزار کلدار ءَ گیش کنگ ءِ منظوری ھم دیگ بوتگ، وھدیکہ وزارت ءِ اھوالکاری ءُ وزارت ءِ ھزانگ ءِ کمک ءَ کارمند آناں گیش مالی ریلیف دیگ ءِ واستہ کوشست کنگ بوھگ ءَ اِنت۔ سبین عثمان خٹک  ءَ گوشت کہ اے پی پی یک ھاندان ءِ وڑ ءَ اِنت پمیشکا کارمند یک دومی ءِ احترام ءَ بہ کن اَنت، وتی ھمکار آنی کمک ءَ بہ کن اَنت ءُ یکجاھیں رنگ ءَ دیم ءَ بہ رو اَنت۔ اقلیت ءِ کارندہ آناں یک وڑیں موہ دیگ ءِ ھاترا تنظیم ءِ جزم ءِ پدا پدر کنان ءَ آئی ءَ گوشت کہ اے پی پی اقلیت ءِ کمیونٹیز ءِ  نیک راھی  میلہ ھم یک شلی ءَ  برجم دار ایت ایشی ءِ تہ ءَ کرسمس ھم ھوار اِنت۔ مراگش ءِ ساھت ءَ وزارت ءِ اھوالکاری ءُ شنگکاری ءِ سیکرٹری اشفاق احمد خلیل، پرنسپل انفارمیشن آفیسر رئیسہ عادل  ءُ  ادارُکی ایم ڈی سبین عثمان خٹک  ءَ ھم آجوئی ءِ روچ ءِ ھوالگ ءَ ویڈیو کلوہ ءِ پیش دارگ بوت۔ مراگش ءِ تہ ءَ نعمان عادل، ناہید تاج  ءُ  عبدالرحمان  ءَ  گشتانک دات۔ وھدیکہ قاسم ملک ءَ نعت رسول پاک ﷺ ونت۔   جتا جتائیں دمگی زبان آنی تہ ءَ آجوئی ءِ  کلوہ پیش کنگ بوت اَنت۔ کاشف رضوی ءَ اردو ، ثمینہ چوہدری ءَ پنجابی۔

شوکت چونڈیو ءَ سندھی، فرحت  اللہ خٹک  ءُ  ڈاکٹر واحد اللہ ایوب  ءَ  پشتو،  ڈاکٹر سعدیہ کمال  ءَ  سرائیکی  ءَ   آجوئی ءِ  روچ ءِ ھوالگ ءَ وتی ھیال آنی درشان کت۔

رخشندہ تاج  بلوچ ءَ  بلوچی وھدیکہ مراگش ءَ دار چین ءِ زمہ واری شمائلہ نورین ءُ صنم جونیجو ءَ  پیلو کت اَنت۔ مراگش ءَ  ڈائریکٹر نیوز شمائلہ عندلیب، ڈائریکٹر اردو نیوز  سروس عبدالجبار ذکریا، ڈائریکٹر ویڈیو نیوز رب نواز باجوہ، انفارمیشن افسران عدنان اکرم  باجوہ  ءُ  فارینہ مغل  ءَ ھوار ’’اے پی پی ‘‘  ءِ  کارندہ آنی مزنیں کساسے ءَ بھر زوری کت۔ مراگش ءِ گڈ  ءَ ادارُکی  منیجنگ ڈائریکٹر سبین عثمان خٹک  ءَ  ’’اے پی پی ‘‘ ءِ جتا جتائیں شوبگ آں گوں سیادی داروکیں کارندہ آنی ھمبراھی ءَ   آزاتی  ءِ روچ ءِ کیک کپ کُت۔