پاکستان ءَ مصر ءِ سفیر ءَ راجی وردن ءُ وراک ءِ سلامتی ءُ پٹ ءُ پول ءِ وفاقی وزیر ءَ گوں گند ءُ نند کت، کشت ءُ کشاری کمک، کپاس ءِ پیداوار، کوالٹی ءَ را گہتر کنگ ءِ سر ءَ تپاک

اسلام آباد۔17اگست  (اے پی پی): پاکستان ءَ مصر ءِ سفیر ڈاکٹر ایہاب محمد عبدالحمید حسن  ءَ راجی فوڈ سیکیورٹی ءُ پٹ ءُ پول ءِ وفاقی وزیر رانا تنویر حسین ءَ گوں گند ءُ نند کت، ایشی ءِ تہ ءَ کشت ءُ کشاری، فوڈ سیکیورٹی ءُ نوکیں ٹیکنالوجی ءِ پڑ ءَ دو نیمگی کمک ءَ را گیش دیمروئی دیگ ءِ جیڈھ آنی سر ءَ گپ ءُ تران کنگ بوت۔ وزارت ءِ راجی فوڈ سیکیورٹی ءُ پٹ ءُ پول ءِ رد ءَ گند ءُ نند ءِ ساھت ءَ وفاقی وزیر ءَ گوشت کہ پاکستان مصر ءِ گوما وتی دیریں ءُ براتی سیادی ءَ را ارزشت دنت۔ آئی ءَ نوکیں کشت ءُ کشاری، آپ ءِ گہتریں بندوبست، موسمیاتی لچکداریں کاشتکاری ءُ کشت ءُ کشاری ٹیکنالوجی ءِ پڑ ءَ مصر ءِ مزنیں پیشرفت ءِ توسیپ کت ءُ گوشت کہ مصر ءِ کشت ءُ کشاری دیمروئی ءُ مشکلیں جاور ھال آنی تہ ءَ کشت ءُ کشاری پیداوار ءَ را گیش کنگ ءِ تجربگ ءَ چہ آ ماچ  بوتگ۔ رانا تنویر حسین ءَ مصر ءِ تکنیکی مہارت ءُ تجربگ ءَ چہ فائدہ چست کنگ ءِ واھشت ءِ درشانی کت ھاسیں رنگ ءَ پاکستان ءَ کپاس ءِ پیداوار ءُ کوالٹی ءَ را گہتر کنگ ءِ واھشت ءِ درشانی کت۔ آئی ءَ گوشت کہ کپاس ءِ گہتریں وڑ ءُ پیم، کوالٹی ءِ بیج، نوکیں پیداوار ءِ رھبند، فصل ءِ بندوبست ءُ ویلیو ایڈیشن ءِ تہ ءَ مصر ءِ تجربگ پاکستان ءِ واستہ سک باز کارآمد بوت کنت۔ وفاقی وزیر ءَ پاکستانی ءُ مصر ءِ کشت ءُ کشاری پٹ ءُ پولی ادارگ آنی نیام ءَ کمک ءَ را گیش کنگ، ماہرین آنی تبادلہ، یکجائی پٹ ءُ پولی منصوبگ، تربیتی پروگرام ءُ نوکیں کشت ءُ کشاری رھبند آنی تبادلہ ءِ ھم تجویز پیش کتگ۔ آئی ءَ آپ ءِ بچت ءِ آبپاشی، کوالٹی ءِ بیج ءِ پیداوار، بائیو ٹیکنالوجی، موسمیاتی لچکداریں کشت ءُ کشاری، کشت ءُ کشاری مشینری، لائیو سٹاک، باغبانی ءُ کشت ءُ کشاری پٹ ءُ پول ءِ شوبگ آنی تہ ءَ کمک ءَ را گیش کنگ ءِ سر ءَ ھم زور پر دات۔ وفاقی وزیر رانا تنویر حسین ءَ گوشت کہ حکومت زرعی پیداوار ءَ را گیش کنگ، پیداوار ءِ ھرچ ءُ درچ ءَ را کم کنگ ءُ کشت ءُ کشاری ءِ آمدنی ءَ را گہتر کنگ ءِ واستہ نوکیں ٹیکنالوجی، کوالٹی زرعی ان پٹ ءُ پٹ ءُ پول ءُ توسیپ ءِ سروسز ءِ نیام ءَ مھکمیں سیادی ءِ سر ءَ دلگوشی دیگ ءَ اِنت۔ گند ءُ نند ءِ ساھت ءَ مصر ءِ سفیر ڈاکٹر ایہاب محمد عبدالحمید حسن  ءَ پاکستان ءُ مصر ءِ نیام ءَ کشت ءُ کشاری کمک ءَ را گیش مھکم کنگ ءِ جزم ءِ درشان کت ءُ گوشت کہ سیادی داروکیں مصر ءِ ادارگ وت مہ وتی سیت ءِ شوبگ آنی تہ ءَ کمک ءِ امکان آناں پٹ ءُ پول بہ کن اَنت۔ سفیر ءَ کپاس، آپ ءِ رسگ، زرعی پٹ ءُ پول، ءُ آپ ءِ کمی ءِ دمگ آنی تہ ءَ کشت ءُ کشاری ءِ پڑ ءَ مصر ءِ تجربگ آناں شیئر کت ءُ پاکستانی ءُ مصری ماہرین ءُ پٹ ءُ پولی ادارگ آنی نیام ءَ رابطہ ءُ تجربگ آنی تبادلہ ءَ را وش آتک کت۔ دیوان ءَ اے گپ ءِ سر ءَ ھم تپاک کنگ بوت کہ دوئیں ملک آنی نیام ءَ کشت ءُ کشاری کمک ءَ را گیش موثر ءُ پیداواری جوڑ کنگ ءِ واستہ یکے دومی ءَ گوں رابطہ برجاہ دارگ بیت ءُ عملی دمگ آنی نشاندہی کنگ بیت کہ آ دوئیں ملک آنی تہ ءَ کشت ءُ کشاری، کشت ءُ کشاری پیداوار ءُ فوڈ سیکیورٹی ءَ را فائدہ مند بوت کن اَنت۔