جموں ءُ کشمیر ءِ جیڑھ ءِ انصاف ءُ پرامنیں گیواری پاکستان ءِ پالیسی ءِ بُن ھشت اِنت، شزہ فاطمہ خواجہ

اسلام آباد۔5اگست  (اے پی پی): آئی ٹی ءُ ٹیلی کمیونیکیشن ءِ وفاقی وزیر شزہ فاطمہ خواجہ ءَ گوشت کہ بھارت ءِ نیمگ ءَ چہ ناجائزیں رنگ ءَ مقبوضہ جموں ءُ کشمیر ءِ اُلس ءِ جائزیں ھک ءُ آجوئی آنی سر ءَ برجاھیں سرکوبی، شہری آجوئی آنی سر ءَ بندش ایر کنگ ءُ آزاتیں میڈیا ءُ ڈیجیٹل کمیونیکیشن ءِ سر ءَ بندش آنی برجاہ دارگ ءِ رد ءَ رد ءُ بند دیگ بوتگ۔ کشمیر ءِ جیڈھ جنوبی ایشیائی راج ءِ تہ ءَ امن ءُ ایمنی ءِ واستہ بنیاتی ءُ دیریں جیڈھ اِنت۔ چار شمبے ءِ روچ ءَ کشمیر ءِ آجوئی ءِ روچ ءِ موہ ءَ وتی کلوہ ءِ تہ ءَ آئی ءَ گوشت کہ مرچی پاکستان ءِ حکومت ءُ سرجمیں پاکستانی راج وتی کشمیری برات ءُ گھار آنی گوما مھکمیں رنگ ءَ وتی بے دروریں یکوئی ءِ درشان ءَ کن اَنت۔ ما اے روچ ءَ گوں اے جزم ءَ برجم دارگ ءَ ایں کہ 5 اگست 2019 ءَ بھارت ءِ ناجائزیں ءُ یک نیمگی کارروائی آنی گرانیں کساس ءَ را دگنیا ءَ را یات بہ کن ایں کہ ایشی ءِ وسیلگ ءَ بھارت ءِ زیر انتظام جموں ءُ کشمیر ءِ میاں اوستمانی تک ءَ منگ بوتگیں جھیڑوی دمگ ءَ را ناجائزیں رنگ ءَ بدل کنگ ءِ کوشست کتگ۔ اے گامگیج چہ میاں اوستمانی کانود ءُ اقوام متحدہ ءِ سلامتی کونسل ءِ ھمگرنچیں قرارداداں گوں ھاسیں رنگ ءَ ھلاپ انت۔ ہفت سال ءِ گوزگ ءَ ابید ہم اے ناجائزیں گامگیجاں نہ جموں ءُ کشمیر ءِ قانونی جاور بدل کتگ انت ءُ نہ کشمیری راج ءِ وتی جائزیں حق ءِ وت واجہی ءِ ہاترا مھکمیں جزم ءَ نزور کتگ۔ آئی ءَ گوشت کہ اے گامگیج آنی تہ ءَ بھارتی ریاستی سرکوبی گیش بوتگ، بنیاتی آجوئی آنی تہ ءَ کمی اتکگ ءُ ناجائزیں کانود ءُ انتظامی گامگیج آنی وسیلگ ءَ دمگ ءِ آبادی ءِ توازن ءَ را بدل کنگ ءِ نا شریں کوشست آناں گیش تیز کتگ۔ آئی ءَ گوشت کہ بھارت ءِ نیمگ ءَ ناجائزیں رنگ ءَ مقبوضہ جموں ءُ کشمیر ءَ الس ءِ حقیقی جمہوری طاقت ءِ برجاھیں سرکوبی، شہری آجوئی آنی سر ءَ بندش ایر کنگ ءُ آزات میڈیا ءُ رابطہ کاری ءِ سر ءَ بندش آنی برجاہ دارگ سکیں جیڈھ ءِ سبب اِنت۔ اے درستیں مشکلاں ابید ھم کشمیری راج ءِ دلیری، پڑا ءُ سدکمی انگت ءَ بے مٹ انت۔ ایشانی وتی وت واجہی ءِ ناگزیریں حق ءِ ھاترا پرامن ءُ انصاف ءِ جہد پہ آیوکیں نسلاں رژن ءِ چراگ ءِ بستار ءَ برجاہ اِنت۔ کشمیری آنی مثالی جہد انصاف، انسانی شرپ ءُ میاں اوستمانی کانود ءِ بالادستی ءِ ھاترا پابندیں درستیں مردم ءُ راج آنی کمک ءُ احترام ءِ مستحق اِنت۔ جموں ءُ کشمیر ءِ سر ءَ جیڈھ جنوبی ایشیا ءِ امن ءُ ایمنی ءِ واستہ سنگین تریں ءُ دیریں جیڈھ اِنت۔ دمگ ءَ امن چہ زور ءِ کارمرد کنگ یا یک نیمگی کارروائیاں نہ بلکیں کشمیری راج ءِ واھشت ءُ اقوام متحدہ ءِ سلامتی کونسل ءِ ھمگرنچیں رھبندانی رد ءَ اے جیڑھ ءِ عادلانہ ءُ امنیں رنگ ءَ گیش ءُ گیوار کنگ ءَ چہ رس اِت کنت۔ آئی ءَ گوشت کہ نوں وھد ءِ ضلورت اِنت کہ میاں اوستمانی براتی ایوک ءَ جیڈھ ءِ درشان ءَ گوں بندوک بوھگ ءِ بدل ءَ اے دیریں جیڈھ ءِ انصاف ءُ برجمیں گیواری ءِ واستہ وتی موثر ءُ ذمہ واریں کرد ءَ پیلو بہ کنت۔ اے موہ ءِ سر ءَ ما یک رندے پدا اے گپ ءِ سر ءَ زور پر دئیں کہ جموں ءُ کشمیر ءِ جیڈھ ءِ انصاف ءُ پرامنیں گیواری پاکستان ءِ پالیشی ءِ بُن ھشت اِنت۔ پاکستان ھمک پڑ ءَ کشمیری اُلس ءَ را سفارتی، سیاسی ءُ اخلاقی کمک ءَ را برجاہ دار ایت ءُ ھمک دمگی ءُ میاں اوستمانی دیوان ءَ سرجمیں زور ءَ گوں وتی توار ءَ را چست کنگ ءَ برجاہ دار ایت۔ پاکستان ءَ چہ میاں اوستمانی براتی ءَ لوٹ کتگ کہ آ بھارت ءَ را زور بہ دنت کہ آ ناجائزیں وڑے ءَ مقبوضہ جموں ءُ کشمیر ءَ انسانی ھکانی زھرناکیں لگتمالی ءَ را بند بہ کنت، اگست 2019 ءَ چہ وتی ناجائزیں ءُ یک نیمگی گامگیجاں پچ بہ گیپت، جموں ءُ کشمیر ءِ اُلس ءِ سر ءَ ایر کنگ بوتگیں زلم ءُ زوراکی ءِ کانوداں ھلاس بہ کنت ءُ یک انچیں سازگاریں راہ ءُ درے جوڑ بہ کنت کہ آ آزاتیں رنگ ءَ کشمیر ءِ راج ءَ را دیم ءَ بیار اِیت۔ اقوام متحدہ ءِ سلامتی کونسل ءِ سیادی داروکیں قرارداد آنی رد ءَ وت واجہی ءِ حق ءُ جموں کشمیر ءِ جیڈھ ءِ پرامن ءُ انصاف ءِ گیواری ءِ راہ ءَ پچ کنگ ءَ انت۔