برآمدات ءِ تہ ءَ گیشی اقتصادی استحکام ءِ واستہ المی اِنت، مزن وزیر ءِ سروکی ءَ ملک ءَ را اقتصادی پاور ہاؤس جوڑ کنگ ءِ سفر ءَ اِنت، رانا تنویر حسین

لاہور۔25جولائی  (اے پی پی): راجی فوڈ سیکیورٹی ءُ پٹ ءُ پول ءِ وفاقی وزیر رانا تنویر حسین ءَ گوشت کہ اقتصادی برجائی ءِ واستہ برآمدات ءِ تہ ءَ گیشی المی اِنت، کشت ءُ کشاری شوبگ ءِ دیمروئی حکومت ءِ اولی ترجی اِنت، مزن وزیر محمد شہباز شریف ءِ سروکی ءَ ملک ءَ را اقتصادی جوڑ کنگ ءِ سفر ءِ سر ءَ اِنت۔ آئی ءَ اے ھیالانی درشانی شمبے ءِ روچ ءَ ایکسپوسینٹر لاہور ءَ برجم داشتگیں ایکسپو فیصل آباد 2026 ءِ بنگیجی مراگش ءَ ھاسیں مہمان ءِ بستار ءَ گشتانک دیان ءَ کت۔ رانا تنویر حسین ءَ گوشت کہ اللہ تعالیٰ ءَ اے ملک ءَ را توامیں وسیلگ آنی گوما سرھات کتگ، المی انت کہ اے وسیلگ آناں جوانیں رنگ ءَ کارمرد کنگ بہ بیت۔ آئی ءَ گوشت کہ پاکستان یک کشت ءُ کشاری ملکے، کشت ءُ کشاری ءِ دیمروئی ملک ءِ معیشت ءِ تہ ءَ مزنیں کردے پیلو کنت، پیداوار ءِ تہ ءَ گیشی ءِ واستہ مارا جدید کشت ءُ کشاری ٹیکنالوجی ءَ را ءُ کنگ لوٹ ایت تانکہ ملک ءَ وشھالی آرگ بہ بیت، حکومت جدید لیکہ آنی سر ءَ کشت ءُ کشاری شوبگ ءَ را دیمروئی دیگ ءَ انت۔ وفاقی وزیر ءَ گوشت کہ پاکستان ءِ اقتصادی دیمروئی ءُ برجائی ءِ واستہ برآمدات ءِ تہ ءَ مزنیں گیشی المی اِنت پرچا کہ کجام ھم ملک ءِ معیشت ءَ را مھکم ءُ پائیدار جوڑ کنگ ءِ واستہ برآمدات کلیدی کرد پیلو کنت۔ آئی ءَ گوشت کہ درملک ءِ پاکستانی سالانہ 41 ءَ چہ 42ارب امریکی ڈالر ءِ کساس ءَ زرّ دیم دیگ ءَ اَنت کہ اے معیشت ءِ واستہ یک ھاسیں کمک اِنت، البت ایوک ءَ زرّ دیم دیگ ءِ سر ءَ انحصار کنگ پائیدار اقتصادی ماڈل نہ اِنت، ملک ءِ برآمدات ءَ را گیش کنگ ءِ سر ءَ ھاسیں دلگوشی دیگ لوٹ ایت۔ رانا تنویر حسین ءَ گوشت کہ بنگلہ دیش ءُ سری لنکا ءِ وڑیں ملک آنی نیمگ ءَ چہ برآمدات ءِ تہ ءَ مزنیں گیشی بوتگ۔ برآمدات ءِ تہ ءَ مزنیں گیشی ءِ ھست نہ بوھگ ءَ پاکستان برجمیں اقتصادی دیمروئی ءُ برجائی ءِ ھاترا سوبمند نہ بیت۔ آئی ءَ گوشت کہ مزن وزیر محمد شہباز شریف ءَ اے گپ ءِ سر ءَ دلگوشی داتگ کہ ما چوں ءُ برآمدات آنی تہ ءَ گیشی کت کن ایں، ایشی ءِ واستہ آ کاروباری برات ءِ مشکلات ءَ را کم کنگ ءَ انت۔ رانا تنویر حسین ءَ گوشت کہ ہنرمندیں مردمی قوت ءِ تیاری ءِ واستہ وفاقی ءُ صوبائی حکومت ءِ نیمگ ءَ جتاجتائیں پروگرام بندات کنگ بوتگ ایشی ءَ چہ ورنا آناں جوانیں روزگار ءِ موہ رس ایت۔ آئی ءَ گوشت کہ فیصل آباد مئے کاروباری مرکز اِنت، ما برآمدات ءِ تہ ءَ مدام فیصل آباد ءِ نیمگ ءَ چاریں، 17ارب ڈالر ایوک ءَ ٹیکسٹائل ءَ چہ کیت، اے ایکسپو ءِ برجم دارگ سک باز جوانیں گامگیج اِنت۔ آئی ءَ گوشت کہ ما آسانیں کاروبار ءِ نظام ھم آورتگ، ءُ ایچ آئی ایف سی ادارگ جوڑ کتگ۔ آئی ءَ گوشت کہ ہنرمندیں مردمی قوت ءَ چہ نا ایوک ءَ ملک ءِ صنعتی پیداوار ءُ پیداواری ءِ تہ ءَ گیشی بیت بلکینگ ءَ پیداواری ھرچ ءُ درچ ءِ تہ ءَ کمی ءُ پاکستانی پیداوار ءَ را جہانی مارکیٹ آنی تہ ءَ مقابلہ جوڑ کنگ ءَ ھم کمک رسیت۔ آئی ءَ گوشت کہ جہانی تک ءَ ہنرمندیں مردم آنی لوٹ گیش بوھگ ءَ انت، پمیشکا پاکستان ءَ ءُ نوجوان نسل ءَ را نوکیں ہنرمند آنی تہ ءَ لیس کنگ ءِ سر ءَ دلگوشی دیگی انت تانکہ ہنرمندیں پاکستانی مردمی توان ءَ را درملک ءَ جوانیں موہ رس ایت ءُ ملک ءِ واستہ گیشاں چہ گیش درملکی زرّ کمائینگ بہ بیت۔ داں وھدیکہ مئے برآمدات گیش مہ بنت ما دیم ءَ شُت نہ کناں۔ میاں اوستمانی تک ءَ جنگ ءُ جھان ءِ جاور ھالانی سبب ءَ پاکستان ھم آماچ بوتگ ، مئے سر ءَ ھم دباؤ است انت ، مارا پاکستان ءَ مھکم کنگی انت ءُ دیم ءَ برگی انت ، دیم ءَ روگ ءِ واستہ سرکار سرجمی ءَ کمک کنت ۔ وفاقی وزیر ءَ گوشت کہ مئے ٹارگٹ انت کہ مئے برآمدات ءَ را 60 ارب امریکی ڈالر ءَ تاں برگ بہ بیت، اے پاکستان ءِ مھکم کنگ ءِ واستہ سک باز المی انت۔ آئی ءَ گوشت کہ مارا ھر وھد ءَ معاشی جیڈھ ءِ آماچ بیت گڈا ما درائیں مردم آنی نیمگ ءَ چاریں ءُ آئی ایم ایف ءِ نیمگ ءَ رو ایں ۔ اگاں ما وت ءَ مھکم بکن ایں اے جاور دیم ءَ نہ کئیت۔ مزن وزیر محمد شہباز شریف ءِ سروکی ءَ ملک ءَ را اقتصادی طاقت جوڑ کنگ ءِ سفر ءَ انت۔ اولی ایش کہ آہاں ملک ءَ چہ ڈیفالٹ ءَ رکینتگ ءُ نوں آہاں ملک ءَ را اقتصادی پاور ہاؤس جوڑ کن انت۔