صدر آصف علی زرداری ءَ راجی روچ ءِ درگت ءَ مصر ءِ سروکی ءَ را مبارک بات

اسلام آباد۔23جولائی  (اے پی پی): صدر آصف علی زرداری ءَ مصر ءِ صدر عبدالفتاح السیسی  ءُ مصر ءِ براتیں اُلس ءَ را راجی روچ ءِ درگت ءَ مبارک بات داتگ۔ پنچ شمبے ءِ روچ ءَ صدر ءِ مملکت ءَ وتی مبارکی کلوہ ءِ تہ ءَ گوشت کہ پاکستان ءُ مصر ءِ نیام ءَ وت مہ وتی شرپ، یکجائی اقدار ءُ بیسہ ءِ بنیات ءَ دیریں ءُ دوستی ءِ سیادی است انت۔ آئی ءَ گوشت کہ دوئیں ملک آناں کثیر نیمگی فورم آنی تہ ءَ کمک ءُ تپاکی ءِ روایت برجم داشتگ، ایشی ءِ تہ ءَ دو نیمگی شریکداری ھم ھوار اِنت۔ دوئیں ملک آنی نیام ءَ تجارت، سرمایہ کاری، وانگ ءُ زانگ، دود ءُ ربیدگ، دفاع ءُ مردم آنی نیام ءَ رابطہ ءَ ھوار جتا جتائیں پڑ آنی تہ ءَ گیش بوھوکیں کمک سک باز دلبڈی ءِ گپ اِنت۔ آئی ءَ گوشت کہ پاکستان مصر ءِ گوما وتی سیادی ءَ را سک باز ارزشت دنت ءُ دوئیں ملک آنی اُلس ءِ وشھالی ءِ واستہ اے شریکداری ءَ را مھکم کنگ ءِ واستہ جزمیگ اِنت۔ صدر ءِ مملکت ءَ گوستگیں دمگی جیڈھ ءِ گیواری ءِ واستہ دوئیں ملک آنی سروکی ءِ سرگرمیں ھمگرنچی ءَ را ساڑات ءُ دل یکیمی ءِ درشان کت کہ پاکستان ءُ مصر ءِ نیام ءَ دوستی ءِ سیادی آیوکیں سال آنی تہ ءَ گیش مھکم بنت، دمگی یکوئی ءُ گیشیں اقتصادی دیمروئی ءِ تہ ءَ وتی کرد ءَ پیلو کن اَنت۔