ccچیئرمین سینیٹ سید یوسف رضا گیلانی نا پارلیمانی سفارتکاری، واپار و السی رابطہ غاتا کمک اٹ پاکستان ۔کینیڈا تعلقداری تے پین سوگو کننگ آ زور

اسلام آباد۔ 21 جولائی (اے پی پی)چیئرمین سینیٹ سید یوسف رضا گیلانی دا عزم انا درشانی ءِ کرینے کہ پاکستان، پارلیمانی سفارتکاری، واپار نا مون آ دننگ و السی رابطہ غاتے پین ودفسا کینیڈا تون تینا متکن سنگتی ءِ پوسکن آ بڑزی تسکان دننگ کن سنبرینگوک ءِ ۔ سے شنبے نادے آکینیڈا نا وزیر خارجہ انیتا آنند نا اعزاز اٹ اڈ ہلوک بیابخیری دود اٹ مہمان خاص نا حیثیت اٹ تران کرسا سینیٹ نا چیئرمین انیتا آنند ءِ پاکستان نا اولیکو سرکاری دورہ غا بخیر کرسا سینیٹ، پارلیمنٹ و الس پاکستان نا کنڈ آن نیک است خواہی نا درشانی ءِ کرے۔ او پارے کہ پاکستان و کینیڈا نا نیام اٹ کم و ود ہشت دہائی تیا تالان سنگتی تعلقداری تین پہ تینی شرف ، اسیجائی مفاد، تعمیری سیاسی گپ وتران ، ودوک آ اقتصادی کمک، تعلیمی ہل و تس و کینیڈا ٹی رہینگوک آ متحرک پاکستانی کمیونٹی نا گرانقدر خذمت آتیا استوار ءِ ۔ او پارے کہ ہڑتوم آ کنڈ آ تاواپار پاکستان و کینیڈا نا تعلقداری تا بنداوی تمبہ ءِ و کینیڈا پاکستان نا پت انا قابل اقتصادی شریدار آتیٹی اوار ءِ۔ او پیدوار کرے کہ کینیڈا آن درآمد کروک کشاری اجناس، خاص کر کینولا، سویابین و چنے، پاکستان نا غذائی سلامتی، کشاری بشخ و صنعتی شونداری ٹی اہم کڑد ادا کننگ ءُ ۔ چیئرمین سینیٹ نائب وزیراعظم و وزیر خارجہ سینیٹر محمد اسحاق ڈار و وزیر خارجہ انیتا آنند نا اوٹاوا ٹی مروک آ مذاکرات نا مثبت نتیجہ غاتا ستاءِ کرسا پارے کہ اوفتا کمک اٹ ہڑتوم آ ملک آتا نیام اٹ واپاری کمک ءِ پین سوگوی رسینگانے۔ او 12 جنوری 2026 آ کراچی بندرگاہ غا کینیڈین کینولا نا اولیکو کھیپ انا بننگ ءِ اقتصادی کمک نا مون آ دننگ نا اسہ اہم نشان اس گوندا۔ او پارے کہ ساڑی آ جہانی حالیت آتیٹی پارلیمانی سفارتکاری نا اہمیت مست آن زیات مسنے و پارلیمانی گپ وتران ، تین پہ تینی پت، امن و پائیدار شونداری نا مون آ دننگ اٹ اہم کڑد ادا کننگ کیرہ۔ بین الپارلیمانی اسپیکرز کانفرنس (آئی ایس سی) نا بانی چیئرمین نا حیثیت اٹ او کینیڈا ءِ دا فورم اٹ فعال بشخ ہلنگ نا سلہ خلسا پارے کہ پارلیمانی رابطہ غاتا مون آ دننگ ہڑتوم آ ملک آتا تعلقداری تے پین سوگو کننگ و اسیجائی جہانی چیلنج آتون مون تننگ اٹ کمکار جوڑ مریک۔ Bottom of Form