وفاقی وزیر احسن اقبال ءَ جرمنی ءِ سفیر انا لیپل ءَ گوں گند ءُ نند کتگ، مشترکہ مفاد ءِ دمگ آنی تہ ءَ دوئیں نیمگ ءَ چہ فائدگ مندیں شریکداری ءَ را دیمروئی دیگ ءِ جزم

اسلام آباد۔25جون  (اے پی پی): منصوبگ بندی، دیمروئی ءُ اصلاحات ءِ وفاقی وزیر احسن اقبال ءَ گوشت کہ پاکستان انسانی سرمایہ ءِ دیمروئی ءَ را مھکم کنگ ءِ واستہ ہائیر ایجوکیشن، فیکلٹی ءِ دیمروئی، پٹ ءُ پولی کمک، اسکالرشپ ءُ وانگ ءُ زانگ ءِ تبادلہ پروگرام آنی تہ ءَ جرمنی ءِ گوما کمک ءَ را گیش کنگ ءِ واھشت مند اِنت۔ ادا جاڑی بوتگیں پریس ریلیز ءِ رد ءَ پاکستان ءَ وفاقی جمہوریہ جرمنی ءِ سفیر انا لیپل ءَ پنچ شمبے ءِ روچ ءَ اسلام آباد ءَ وفاقی وزیر منصوبگ بندی، دیمروئی ءُ ھاسیں گامگیج احسن اقبال ءَ گوں گند ءُ نند کت۔ گند ءُ نند ءِ مول ءُ مراد وانگ ءُ زانگ، سیل ءُ سواد، دود ءُ ربیدگ، اقتصادی اصلاحات ءُ سرمایہ کاری ءِ دیمروئی ءِ شوبگ ءَ دوئیں ملک آنی نیام ءَ دو نیمگی کمک ءَ را گیش کنگ بوتگ۔ دوئیں نیمگ ءَ پاکستان ءُ جرمنی ءِ سیادی ءَ را گیش مھکم کنگ ءُ یکجائی دلچسپی ءِ شوبگ آنی تہ ءَ وت مہ وتی فائدہ مندیں شریکداری ءَ را دیمروئی دیگ ءِ واستہ وتی جزم ءِ پدا پدر کت۔ گند ءُ نند ءِ ساھت ءَ وفاقی وزیر احسن اقبال ءَ سفیر ءَ را پاکستان ءِ اقتصادی ریکوری ءُ اصلاحات ءِ ایجنڈا ءِ بابت ءَ سرپد کت، ایشی ءِ تہ ءَ اقتصادی استحکام ءَ را گہتر کنگ، مہنگائی ءَ را کم کنگ، پالیسی ءِ شرح ءَ را کم کنگ ءُ سرمایہ کار آنی اعتماد ءِ بحالی ءِ سر ءَ زور پر دات۔ آئی ءَ سرکاری شوبگ ءِ گورننس ءَ را نوکیں رنگ ءَ جوڑ کنگ، دیمروئی منصوبگ بندی ءِ عمل ءَ را ڈیجیٹل کنگ ءِ واستہ حکومت ءِ کوشست آنی سر ءَ زور پر دات، ایشی ءِ تہ ءَ منصوبگ بندی کمیشن ءِ منصوبگ بندی ءُ منظوری ءِ نظام ءَ را بدل کنگ ھوار اِنت۔ وفاقی وزیر ءَ انسانی سرمایہ ءِ دیمروئی ءَ را مھکم کنگ ءِ واستہ جرمنی ءِ گوما ہائیر ایجوکیشن، فیکلٹی ءِ دیمروئی، پٹ ءُ پولی کمک، اسکالرشپ ءُ اکیڈمک ایکسچینج پروگرام آنی تہ ءَ کمک ءَ را گیش کنگ ءِ تہ ءَ پاکستان ءِ سک باز واھشت ءِ درشان کت۔ وفاقی وزیر ءَ جرمنی ءَ را گلگت بلتستان ءَ پائیدار ءُ ماحول دوستیں سیل ءُ سواد ءِ دیمروئی ءِ واستہ کمک کنگ ءِ دعوت دات ءُ سیل ءُ سواد ءِ منصوبگ بندی ءُ ادارگی دیمروئی ءِ تہ ءَ جرمنی ءِ ماہرین آنی مہارت ءِ وش اتک کت۔ آئی ءَ آیوکیں سال ءَ علامہ محمد اقبال ءِ 150 سالی روچ ءِ تیاری ءِ سر ءَ ھم چمشانک دات ءُ علامہ اقبال ءِ فکری سفر ءِ تہ ءَ جرمنی ءِ ھاسیں ارزشت ءِ ذکر کت ءُ اے موہ ءِ سر ءَ برجم داشتگیں میاں اوستمانی پروگرام آنی تہ ءَ جرمنی ءِ مھکمیں بھر زوری ءِ واھشت ءِ درشان کت۔ سفیر انا لپل ءَ پاکستان ءِ اصلاحات ءِ کوشست ءُ دیمروئی ءِ اولویت آناں ساڑات ءُ وانگ ءُ زانگ، پائیدار دیمروئی، دود ءُ ربیدگی تبادلہ ءِ پڑ ءَ پاکستان ءِ گوما کمک ءَ را گیش مھکم کنگ ءِ واستہ جرمنی ءِ جزم ءِ سر ءَ زور پر دات۔