منشیات ءِ کارمرز کنگ ءُ ناجائزیں سوداگری سرجمیں دگنیا ءِ واستہ مزنیں جیڑھے، مئے پسو ھم منشیات ءِ ھترہ آنی بدل بوھوکیں دروشم ءِ رد ءَ بدل بہ بیت، صدر آصف علی زرداری

اسلام آباد۔26جون  (اے پی پی): صدر آصف علی زرداری ءَ گوشت کہ منشیات ءِ کارمردی ءُ ناجائزیں دزگیری ءِ ھلاپ ءَ میاں اوستمانی روچ مارا اے چیلنج ءِ سر ءَ ھیال ءُ لیکہ کنگ ءِ موہ دنت کہ پاکستان ءَ ھوار سرجمیں دگنیا ءِ واستہ مزنیں جیڈھ ءِ جوڑ بوتگ۔ اے روچ اے گپ ءِ منگ ءِ موہ ھم اِنت کہ مئے پسو ھم منشیات ءِ ھترہانی بدل بوھوکیں دروشم ءِ رد ءَ بدل بہ بیت۔ منشیات ءِ کارمرز کنگ ءُ ناجائزیں دزگیری ءِ ھلاپ ءَ میاں اوستمانی روچ ءِ موہ ءَ صدر ءِ پریس ونگ ءَ چہ جاڑی بوتگیں کلوہ ءِ تہ ءَ صدر آصف علی زرداری ءَ گوشت کہ گوستگیں لھتیں سال آنی تہ ءَ روایتی منشیات ءِ ھواری ءَ سک باز ھترناکیں مصنوعی ءُ ناجائزیں منشیات ءِ نوکیں رنگ دیم ءَ اتکگ۔ مجرمانہ نیٹ ورک نوکیں مواصلاتی ٹیکنالوجی ءُ ڈیجیٹل پلیٹ فارم ءِ وسیلگ ءَ وتی اثر ءُ رسوخ ءَ گیش کنگ ءَ انت، خریدار ءُ فروشندہاں گوں ہمگرنچ کنگ ءَ انت ءُ قانون نافذ کنوکیں ادارہانی چماں چہ رکگ ءِ جہد ءَ انت۔ اے کارانی مالی کمک ءِ رھبند ھم گیشتر نفیس بوتگ اَنت، ایشی ءِ تہ ءَ کریپٹو کرنسی ءُ دگہ ڈیجیٹل ادائیگی ءِ رھبند ھوار اَنت کہ روایتی مالیاتی نظام ءِ سیمسراں چہ در کار کن اَنت۔ آئی ءَ گوشت کہ ایشی ءَ چہ گیش جیڑگ ءِ گپ ایش انت کہ سوشل میڈیا پلیٹ فارم ءُ موبائل ایپلی کیشنز ءِ وسیلگ ءَ منشیات ءِ کارمردی ءِ اشتہار، دیمروئی ءُ نارمل کنگ بوھگ ءَ انت۔ نقصان دہ مادہ اکثر فیشن، غیر نقصان دہ مزہ یا کامیابی ءُ سماجی قبولیت ءِ علامت ءِ دروشم ءَ پیش کنگ بنت۔ اے وڑیں پیغام ھاسیں رنگ ءَ ورناہانی سرا اثر مند بوھگ ءِ ھاترا جوڑ کنگ بنت۔ آ ھما وھد ءَ دیمروئی کن اَنت کہ آیانی ھیال ءُ لیکہ، واھشت ءُ وتیگ ءِ احساس جوڑ بوھگ ءَ اِنت۔ ہر نسل وتی کش ءُ گور ءِ دنیا ءَ سرپد بوہگ ءِ جہد ءَ کنت ءُ وتی چاگرد ءَ چہ متاثر بیت۔ منشیات ءِ سوداگری ءَ چہ نفع زوروکیں عناصر اے گپ ءَ چہ سوبمند بنت۔ لہتیں حلقہ آں منشیات ءِ کارمرز کنگ ءَ را حیثیت، آجوئی یا جدیدیت ءِ علامت ءِ دروشم ءَ پیش دارگ بیت، اگاں کہ اے تصورات سک خطرناک ءُ گمراہ کنوک انت۔ نشہ، انحصار ءُ انسانی توانائی ءِ ھلاس کنگ ءِ تہا ھچ وڑیں دیمروئی پسندی نیست۔ صدر ئِ مملکت ئَ گوشت کہ منشیات ئِ کارمردی ئِ آسر لس شہری آنی روچ مرزی زندمان ئَ مزنیں کساس ئَ محسوس کنگ بنت۔ یک دانش آموزے کہ منشیات ءِ آماچ اِنت چہ وانگ ءِ موہاں زبھر کنگ بیت کنت۔ نوکری ءِ بازار ءَ داخل بوؤکیں ورناہ ءَ را یک مستحکمیں مستقبل ءِ جوڑ کنگ ءِ تہا مشکلات ءِ دیمپانی بوت کنت۔ متاثرہ افراد ءِ خاندان اکثر جذباتی ءُ مالی بوجھ ءَ برداشت کن انت۔ ایشی ءِ اثرات ایوک ءَ فرد ءَ نہ بنت بلکیں ھاندان، چاگرد ءُ سرجمیں چاگرد ءَ ھم اثرمند بنت۔ صدر آصف علی زرداری ءَ گوشت کہ ناجائزیں منشیات ءِ جوڑ کنگ، دزگٹی ءُ شنگ ءُ تالان کنگ ءِ ھلاپ ءَ جوانیں گامگیج اگاں ناگزیر اِنت بلے ایوک ءَ کانود ءِ نفاذ ءِ گامگیج اے جیڈھ ءِ سرجمیں گیواری نہ اَنت۔ مارا ھمے رنگ ءَ رکّینگ، وانگ ءُ زانگ، سرپدی ءُ بحالی ءِ گامگیج آناں ھم مھکم کنگ لوٹ ایت۔ منشیات ءِ وابستگی ءِ آماچیں مردم وتی زند ءِ پدا جوڑ کنگ ءِ کمک، درمان ءُ موہ ءِ مستحق اَنت۔ ریکوری ممکن انت ءُ بازیں مردم کہ بروقت کمک ءِ رسگ ءَ پد وتی ھاندان ءُ چاگرد ءِ ھاترا کارآمدیں کردے پیلو کن انت۔ صدر ءِ مملکت ءَ گوشت کہ اے سال ءِ بنگپ ’’منشیات ءَ چہ پاکیں نسل ءِ جوڑ کنگ ءِ واستہ برجاھیں جیڈھ، نوکیں چیلنج ءُ نوکیں گامگیج‘‘ مئے وھد ءِ راستی آناں پدر کنت، مارا یات دنت کہ حکومت، ادارگ ءُ چاگرد آناں ھوشیار بوھگ ءُ پیداکیں ھترہ آنی گوما وتی رد ءَ ردوم زورگ ءِ ضلورت اِنت۔ آئی ءَ گوشت کہ اے چیلنج ءَ را گر ءُ دار ءِ واستہ یک مزنیں راجی کوشست ءِ ضلورت اِنت۔ پارلیمنٹ، انتظامیہ، تعلیم ءِ ماہرین، اسکالر، میڈیا ءِ پیشہ ور، کمیونٹی ءِ رہشون، والدین ءُ دانشوریں کمیونٹی ءِ یک مشترکہ ذمہ واری انت کہ آ یک انچیں چاگردی ءُ دودمانی چاگردے جوڑ بہ کن انت کہ ورناہاں جان سلامتی ءِ زند ءِ رہبند ءِ سرا عمل کنگ ءُ جوانیں موہاں چہ پائدگ چست کنگ ءِ ھاترا دلبڈی بہ دنت۔ صدر ءِ مملکت ءَ گوشت کہ مارا اے گپ ءَ را دل یکیمی کنگ لوٹ ایت کہ مئے ورنا نسل ءَ را وتی الہام ءَ را وانگ ءُ زانگ، نبشتہ کاری، ھزمت ءُ سوبمندی ءِ تہ ءَ رس ایت ءُ نہ کہ زیانکاریں اثرات آنی تہ ءَ کہ آئی ءِ آیوکیں وھد ءَ را ھترناک کنت۔ صدر آصف علی زرداری ءَ گوشت کہ اے موہ ءِ سر ءَ کانود ءِ نفاذ ءِ کارندہ، میڈیکل ماہرین، استاد، شور ءُ سلاھ ءُ سول سوسائٹی ءِ مردم ھوار ھما درستیں مردم آناں کہ اے جہد ءِ دیم ءِ لیکہ آنی سر ءَ خدمت کنگ ءَ انت آھاں شگر ءُ منت وار آں ۔ ایشانی لگن ءُ ازمت مئے کمیونٹیز ءِ رکھینگ ءُ اے چیلنج ءِ اجتماعی پسو ءَ را مھکم کنگ ءَ مزنیں کردے پیلو کنگ ءَ انت۔ صدر ئِ مملکت ئَ گوشت کہ پاکستان ئِ آیوکیں باندات ئِ اُلس ئِ وشھالی ئُُ دل یکمی ئُُ واھشت ئَ گوں بندوک اَنت ھاسیں رنگ ئَ ورنا آں۔ اگاں ما منشیات ءِ کارمرز کنگ ءِ رکّینگ ءِ ھاترا یکجاہ کار بہ کنیں، ریکوری ءِ عمل ءِ حمایت بہ کنیں ءُ نقصان دہ مادہ ءَ را رہبند ءِ بہر لیکگ ءِ رجحان ءَ رد بہ کنیں گڑا ما آیوکیں نسلانی ھاتر ءَ یک جان سلامت، ایمن ءُ امیدواریں چاگردے جوڑ کت کنیں۔ آئی ءَ دعا کت کہ اللہ تعالیٰ مئے کوشست سوبمند بہ بنت ءُ پاکستان ءَ امن ءُ ایمنی ، دیمروئی ءُ وشھالی ءَ گوں نوکی بہ دنت ۔