یورپ ءَ چہ 100 ءَ چہ گیش کاروباری ءُ وردن ءُ وراک  ءِ شعبہ ءِ رہشون ہالینڈ ءَ پاکستان برنج ءِ میلہ ءَ بہر زور انت، حکومت ءَ کشت ءُ کشاری ءُ وردن ءُ وراک  ءِ برآمدات ءَ را گیش کنگ، سرمایہ کاری ءَ را دیمروئی دیگ ءُ عالمی تجارتی سیادی ءَ را گیش مھکم کنگ ءِ ھاترا جزم  ءِ درشان، جام کمال خان

اسلام آباد۔24جون  (اے پی پی): وفاقی وزیر برائے تجارت جام کمال خان ءَ ہالینڈ ءَ برجم داشتگیں پاکستان رائس فیسٹیول 2026 ءِ سوبمندیں برجم دارگ ءِ توسیپ کتگ ءُ گوشت کہ اے وڑیں میاں اوستمانی تجارتی مراگش پاکستانی برآمدات ءِ دیمروئی، نوکیں مارکیٹ آنی تہ ءَ سر بوھگ ءُ پاکستان ءِ جوانیں امیج ءَ را پدر کنگ ءِ تہ ءَ المی کرد پیلو کن اَنت۔ وزارت تجارت ءِ جارکش ءِ رد ءَ تجارت ءِ وزیر ءَ ہالینڈ ءَ پاکستان ءِ سفیر سید حیدر شاہ ، تجارت ءُ سرمایہ کاری ءِ مشیر شفیق حیدر ورک ءُ پاکستان ءِ تجارت ءِ دیمروئی اتھارٹی ءِ کوشست آناں خراج تحسین پیش کنان ءَ گوشت کہ پاکستان ءِ   ملک ءِ کشت ءُ کشاری شعبہ ءُ برآمد کنوک آنی واستہ دلبڈی ءِ سبب اِنت۔ جام کمال خان ءَ سرجمیں یورپ ءَ چہ 100 ءَ چہ گیش درآمد کنوک، خوردہ فروش، فوڈ انڈسٹری ءِ ماہرین، نامداریں شیف، سفارتی نمائندگ ءُ کاروباری رہشون آنی بھر زوری ءَ را پاکستان ءِ سر ءَ گیش بوھوکیں جھان ءِ بھروسہ ءِ درشان لیک اِت۔ آئی ءَ گوشت کہ پاکستان ءِ حکومت کشت ءُ کشاری ءُ وردن ءِ برآمدات ءِ تہ ءَ گیشی، سرمایہ کاری ءَ را دیمروئی دیگ ءُ جھان ءِ تجارتی سیادی ءَ را گیش مھکم کنگ ءِ واستہ جزمیگ انت۔ اے مراگش ”پاکستان ءِ کشاراں چہ یورپ ءِ میز ءَ تاں“ ءِ سرھال ءِ چیر دستی ءَ برجم دارگ بوتگ، ایشی ءِ مول ءُ مراد پاکستانی بسمتی چاول ءَ را یورپی مارکیٹ ءَ را گیش دیم ءَ آرگ، تجارتی سیادی ءَ را گیش کنگ ءُ زرعی ءُ وردن ءِ شوبگ ءَ نوکیں سرمایہ کاری ءِ موہ پیداک کنگ اِنت۔ اے موہ ءِ سر ءَ نیدرلینڈ ءَ پاکستان ءِ سفیر سید حیدر شاہ ءَ گوشت کہ پاکستانی بسمتی چاول دگنیا ءِ 100 ءَ چہ گیش ملک آنی تہ ءَ برآمد کنگ بوھگ ءَ اِنت ءُ ایشی ءِ منفردیں وشبو، دراجیں دانہ ءُ جوانیں کوکنگ پراپرٹیز ءِ سبب ءَ جھان ءِ صارف، پرچون فروش ءُ فوڈ ایکسپرٹ آنی تہ ءَ مدام مقبولیت ءِ رسگ ءَ اِنت۔ آئی ءَ گوشت کہ پاکستان زرعی وردن ءِ شوبگ ءَ کوالٹی، پائیداری، ٹریس ایبلٹی ءُ میاں اوستمانی فوڈ سیفٹی ءِ معیار آنی سر ءَ سرجمی ءَ عمل درآمد ءِ واستہ جزمیگ اِنت۔ پاکستانی بسمتی ایوک ءَ زرعی پیداوار نہ اِنت بلکیں جغرافیائی اشارہ ءِ وسیلگ ءَ رکھینگ بوتگیں یک انفرادی برانڈ اِنت کہ سداں سال ءِ زرعی ورثہ ءُ میاں اوستمانی معیار ءِ نمائندگی کنت۔ مراگش ءِ ساھت ءَ بھر زوروکاں جوانیں کوالٹی ءِ پاکستانی بسمتی برنج ءِ ھاسیں رنگ ءَ سپر کرنل بسمتی ءِ چشگ ءِ موہ دیگ بوت وھدیکہ پاکستانی بسمتی برنج ءَ چہ جوڑ بوتگیں روایتی ءُ نوکیں ورگ ھم پیش کنگ بوت۔ شریکیں مردماں بسمتی چاول ءِ جغرافیائی اشارہ (جی آئی)، کوالٹی اشورینس، ٹریس ایبلٹی سسٹم ءُ یورپی مارکیٹ ءِ لوٹ آنی سر ءَ عمل کنگ ءِ بابت ءَ ھم سرجمیں بریفنگ دیگ بوتگ۔ مراگش ءَ پاکستان ءُ ہالینڈ ءِ نیام ءَ کشت ءُ کشاری ءُ وردن ءُ وراک ءِ کمک ءِ امکانات آنی سر ءَ گپ ءُ تران کنگ بوت۔ زانگ بہ بیت کہ ہالینڈ یورپی یونین ءِ تہا پاکستان ءِ مستریں برآمداتی مارکیٹ آنی تہ ءَ یکے ءُ دوئیں ملک آنی نیام ءَ دو نیمگی تجارت ءِ کساس 1.94ارب ڈالر ءَ سر بوتگ وھدیکہ 50 ءَ چہ گیش ڈچ کمپنی پاکستان ءَ جتا جتائیں شوبگ آنی تہ ءَ کاروباری کار آنی تہ ءَ ھوار اَنت۔