ایرانی صدر نا دروہ پاکستان ہڑتوم آ کنڈآتا تعلقداری نا مون آ دننگ اٹ اہم مزل نا نشان جوڑمریک، وزیر دفاع خواجہ محمد آصف

اسلام آباد۔ 23 جون (اے پی پی ) وزیردفاع خواجہ محمد آصف پارینے کہ پاکستان و ایران نا تعلقداری پوسکن آ بڑزی تا کنڈآ ہِننگ ءِ و ایرانی صدر نا دورہ پاکستان ہڑتوم آایلم ملک آتا نیام اٹ کمکاری نا مون آ دننگ اٹ اہم کڑد ادا کیک۔ سے شنبے نادے آ میڈیا تون گپ وتران کرسا وزیر دفاع پارے کہ پاکستان مدام ڈیہہ اٹی امن، سوگوی و مذاکرات نا کمک اٹ ویل آتا ایسری نا پالیسی ءِ تینا کرینے۔ اوپارے کہ علاقائی بے چیٹی ٹی کمتی و امن نا مون آدننگ کن پاکستان تاریخی و مثبت کڑدادا کرے ہرادے جہانی برادری قدر انا نظر اٹ ہُننگ ءِ۔ خواجہ محمد آصف پارے کہ امت مسلمہ و خلیجی ملک آک پاکستان نا سفارتی کوشست آتا ستاءِ کننگ ءُ و پاکستان ڈیہہ اٹی امن و سوگوی کن تینا کڑد ءِ برجاتخک۔ اوپارے کہ پاکستان و ایران نا نیام اٹ تین پہ تینی کمکاری نا چندی بشخ آتیٹی تعلقداری پین سوگو مریک۔ وزیردفاع پارے کہ بھارت پاکستان نا گچین سفارتی کڑد آن خارزدہ ءِ ، ولے پاکستان تینا وتواجہی و قومی سلامتی نا رکھ اکن ہرممکن گام گیج کیک۔ اوپیدوار پرے کہ ہروڑنا جارحیت نا پبی ورندی ءِ تننگک۔ اوپارے کہ پاکستان تینا دیکی سیم تیا امن نا خواہندار ءِ، و اوغانستان تون برادرانہ تعلقداری نا مون آ دننگ آ یخین تخک۔ اوناپاننگ ئس کہ پاکستان تدوک آ کیہی دہائی تیٹی اوغان الس ءِ پناہ، تعلیم و روزگار تون اوار چندی آسراتی فراوان کرے و دا حقیقت ءِ است آن دننگ مفک۔ خواجہ آصف پارے کہ دنیا پاکستان نا سفارتی سرسہبی تا اعتراف ءِ کننگ ءِ و ملکی سرکڑدہ غاتا گچین گام گیج آتا سوب پاکستان نا جہانی شرف پین بڑز مسنے۔ اوداعزم انا درشانی ءِ کرے کہ پاکستان ڈیہہ اٹی امن، سوگوی و شونداری نا مون آ دننگ کن تینا مثبت کڑد ءِ برجاتخک۔