قومی اسمبلی ٹی بروک آمالی سال انا 18 ہزار 771 ارب روپئی کچ انا بنجائی بجٹ منظور

اسلام آباد۔ 23 جون (اے پی پی ) بروک آ مالی سال 2026-27نا 18 ہزار 771 ارب روپئی کچ انا بنجائی بجٹ ءِ منظور کننگا ہراٹی اقتصادی شونداری، خراج ریلیف، کم کٹیا والا تپہ، کبینی نا مون ءِ توننگ و ہاؤسنگ و تعمیرات، کشت وکشار و صنعت تون اوار چندی بشخ آتیکن آسودہی تیا خصوصی چکار کننگانے، سرکاری ملازم آتا تنخواہ و پنشن اٹی 7 درسد ودکی کننگانے وخت اس کہ تنخوا دار تپہ کن ریلیف ترفسا خراج نا کچ اٹی کمتی و سرچارج ءِ چٹفینے، کم آن کم ماہانہ تنخواہ 10 درسد ودکی کننگانے۔ ایف بی آر نا محصولات آتا کساس 15 ہزار 264 ارب روپئی تخنگانے، ہاؤسنگ و کشت وکشار تون اوار قومی زرگزران نا چندی بشخ آتیکن خصوصی آسودہی تا پڑو کننگانے ، سرکاری بشخ انا شونداری پروگرام نا کچ اسہ ہزار ارب روپئی وخت اس کہ ملکی دفاع کن 3 ہزار ارب روپئی جتا کننگانے، 15 کروڑ آن 50 کروڑ روپئی نا کٹیا غا خلوک سپر خراج ءِ پورو وڑاٹ چٹفنگانے، بینظیر انکم سپورٹ پروگرام کن 838 ارب روپئی جتا کننگانے۔ سے شنبے نادے آ وزیرخزانہ سینیٹر محمد اورنگزیب قومی اسمبلی ٹی مالی بل 2026ء نا منظوری ءِ ہلک وخت اس کہ داٹی اپوزیشن نا کنڈآن پیش کروک آ ترمیم آتے گیشتری سلاہ اٹ مسترد کننگانے و وزیرخزانہ نا کنڈآن پیش کروک ترمیم ءِ منظور کننگا۔ بنجائی بجٹ 2026-27ء نا رداٹ وزیراعظم ہاؤسنگ فنانس اسکیم نا کمک اٹ کم و نیامی کٹیا والا تپہ ءِ بیرہ 5 درسد مارک اپ آ مورٹگیج نا آسراتی فراوان کننگ انگ ءِ۔ ای۔ بائیکس و ای ۔ رکشہ غاتا ہلنگ کن سبسڈی آ تالان فنانسنگ فراوان کننگ انگ ءِ۔ 7.1 ارب روپئی نا رداٹ مچ آملک اٹی ایگری سٹوریج فنانسنگ فیسلٹی نا بناءِ کننگک۔ بجٹ اٹی ایکسپورٹ کٹیا غا خلوک 0.25درسد ایکسپورٹ ڈویلپمنٹ سرچارج ءِ پورو وڑاٹ ختم، ایکسپورٹ فنانس اسکیم نا رداٹ مارک اپ نا کچ 19 درسد آن کم کرسا 4.5 درسد کننگا۔ ایکسپورٹ فیسلی ٹیشن اسکیم نا رداٹ آسراتی نا مد ءِ 9 تُو آن ودفسا 18 تُو کننگا تانکہ برآمدکنندگان تے کیش فلو نا ویل آتون مون تروئی تمپ۔ داکان بیدس صنعتی بجلی نا نرخ ءِ کم کننگا ۔ بجٹ نا اسہ پین اہم اولیت بروک آ سال خراج آتا بھاریم اٹی ودکی نا جاگہ غا نفاذ و خراج کمپلائنس نا کمک اٹ کٹیا ءِ ودفنگ ءِ۔ بجٹ 2026-27نا اسہ اہم اولیت ورناتے کسبکار جوڑ کننگ و المی وسیلہ غاتا فراوانی ءِ پک کننگ ءِ تانکہ او تینکن روزگار اس ودی کننگ کیر وملکی شونداری ٹی بشخ شاغنگ کیر۔ ملک انا کم کٹیا والا تپہ غاتیکن بے نظیر انکم سپورٹ پروگرام نا وساطت اٹ وسیلہ غاتا فراوانی ٹی ودکی کننگ انگ ءِ۔ ہنداوڑ دانش اسکول نیٹ ورک ءِ ہم ودفنگ انگءِ تانکہ اسہ ہم ہُشار چناس وسیلہ غاتا کمتی نا سوب آن تعلیم دوئی کننگ آن محروم سلپ۔ بجٹ اٹی خیبرپختونخوا نا پوسکن ضم مروک ضلع، گلگت بلتستان و آزاد کشمیر کن ہم خاطرخواہ زر جتا کننگانے تانکہ ہموڑے ہم السی آسراتی تا فراوانی ءِ گچین کننگ مرے۔ بنجائی بجٹ اٹی سرکاری بشخ انا شونداری پروگرام کن اسہ ہزار ارب روپئی جتا کننگانے، داٹی جملہ صوبائی شونداری پروگرام تیکن 2ہزار 224 و ریاستی ملکیتی ادارہ غاتا کنڈآن زرکاری کن 451 ارب روپئی اوار ءِ، بنجائی شونداری پروگرام نا 60 درسد آن زیات بشخ اہم بشخ، ٹرانسپورٹ، مواصلات، آبی وسیلہ و توانائی آٹی ءِ۔  ات و در و مواصلات کن 365 ارب روپئی، توانائی و بجلی کن 116 ارب روپئی جتا کننگانے، 43 آبی ڈٹ آتیکن 103 ارب روپئی جتا کننگانے، پائیدار شاری شونداری و ہاؤسنگ نا بشخ اکن 54 ارب روپئی جتا کننگانے، جان جوڑی کن 25 ارب، بڑزکو تعلیم و سائنس و ٹیکنالوجی کن 46 ارب روپئی، بنداوی تعلیم و کسب کن 22 ارب روپئی، گورننس و ادارہ جاتی اصلاحات کن 13 ارب روپئی جتا کننگانے۔ جائیداد آتا گدریفنگ آ خلوک ودہولڈنگ خراج ءِ معقول کرسا فائلرآتیکن خریداری آ خراج 2.5 درسد آن 1.25 و بہاکننگ آ 5.5 درسد آن کم کرسا 2.75 درسد کننگانے۔ بجٹ اٹی تنخواہ دار تپہ نا کٹیا ءِ 4 سلیبز اٹی بشخنگانے ، ہرا تنخواہ دار 22 آن 32 لکھ روپئی نا نیام اٹ سالانہ تنخواہ ہلیک اوڑآ خراج نا کچ23 درسد آن کم کرسا 20 درسد، 32 لکھ آن 41 لکھ روپئی اسکان نا نیام اٹ کٹیا والا تنخواہ دار آتیکن خراج نا کچ 30 درسد آن کم کرسا 25 درسد، 41 آن 56 لکھ روپئی اسکان نا کٹیا غا انکم خراج نا کچ 35 درسد آن کم کرسا 29 درسد و 56 لکھ آن 70 لکھ روپئی اسکان تنخواہ غا خراج نا کچ 35 درسد آن کم کرسا 32 درسد کننگانے۔