اپوزیشن راجی نپ ءِ واستہ سرکار ءِ گوما بہ نند ایت ءُ راجی چارٹر جوڑ بہ کنت،  پاکستان ءِ دلالی ءَ ایران ءُ امریکہ ءِ منوگری سرجمیں راج اعجاز الحق ءِ پھر ءُ وشحالی ءِ گپ اِنت

اسلام آباد۔19جون  (اے پی پی): پاکستان مسلم لیگ ءِ راجی اسمبلی ءِ باسک اعجاز الحق ءَ گشتگ کہ پاکستان ءِ دلالی ءَ ایران ءُ امریکا ءِ منوگ نامہ سرجمیں راج ءِ شان ءُ شاد ءِ گپ انت ۔ اپوزیشن ءَ گوں دزبندی انت کہ آ راجی نپ ءِ واستہ سرکار ءِ گوما بہ نند انت ءُ راجی چارٹر جوڑ بہ کن انت۔ جمعہ ءِ روچ ءَ راجی اسمبلی ءَ بجٹ ءِ بحث ءَ بہر زورگ ءِ ساھت ءَ آئی ءَ گوشت کہ ایران ءُ امریکہ ءِ ڈیل ءِ تہ ءَ پاکستان ءِ میانجی داری سرجمیں راج ءِ واستہ پھر ءُ وشی ءِ گپ اِنت۔ ایشی ءَ پاکستان ءَ را جھان ءِ پڑ ءَ نوکیں پجار داتگ۔ یک زمانگے بوتگ کہ ما امریکہ ءِ صدر ءِ فون ءِ ودار ءَ بوتگ ایں ءُ آ فون نہ اتکگ بلے مرچی جاور بدل بوتگ انت۔ آئی ءَ گوشت کہ اے سوبمندی راستی ءُ انصاف ءِ جنگ ءِ سبب ءَ بوتگ۔ وھدے کہ مئے راج تپاک بوت ءُ وتی تاگتاں گوں اوشتات گڈا اللہ تعالیٰ نہ ایوک ءَ مارا سوبمندی دات بلکیں سرجمیں روچ ءَ پاکستان ءَ یک نوکیں پجارے ھم دات۔ راستی ءِ جنگ ءِ وھد ءَ مئے لشکراں زبردستی ءُ جوانیں رنگے ءَ پسو دات۔ ایشی ءِ تہ ءَ مئے مزن وزیر ، آئی ءِ سرجمیں ٹیم ءُ ھاسیں رنگ ءَ فیلڈ مارشل سید  عاصم منیر  ءِ ھاسیں کرد ات ۔ وہدے ایران ءِ سرا اولی اُرش بوت گڑا ہما وہد ءِ چیف آف آرمی اسٹاف ءَ کہ نوں فیلڈ مارشل انت مارا امریکی صدر ٹرمپ ءُ آئی ءِ ٹیم ءِ گند ءُ نند ءَ بُرت۔ اے گند ءُ نند ءَ آئی ءَ دو ھاسیں بنگپانی سر ءَ گپ ءُ تران کت، اولی ایش کہ زوت جنگ ھلاس کنگ بہ بیت ءُ دومی آئی ءَ امریکا ءَ بیھار داتگ کہ ملک ءَ لشکر دیم دیگ ءِ ردی ءَ مکنت۔ آئی ءَ اوگانستان ءِ درور دات ءُ گوشت کہ امریکہ ءَ اود ءَ بیست سال گوازینگ ءَ پد وتی سپاھیگانی لاش کشگی بوتگ انت پمیشکا ادا ھمے ردی کنگ مہ بیت۔ منی حیال ءَ امریکی سروکی ءَ اے گپ سرپد بوتگ ات، ایشی ءَ پد جنگ بند کنگ بوتگ ات۔ فروری ءَ پدا کش ءُ گور ءِ ھال دیم ءَ اتک بلے اے رندی ھم پاکستان ءَ ھچ وڑیں کردے پیلو نہ کت۔ نہ اودا سرکار بدل بوت کنت ءُ نہ کہ رضا شاہ پہلوی پدا اقتدار ءَ آرگ بوت کنت۔ جنگ بندی ءِ آرگ ءَ پاکستان ءَ مزنیں کردے پیلو کتگ وھدیکہ قطر، متحدہ عرب امارات ءُ سعودی عرب ءِ کرد ءَ را جھان ءِ تک ءَ ھم ساڑاھگ بوتگ۔ آئی ءَ گوشت کہ اے جاور ھال ءَ پاکستان ءِ واستہ ھم بازیں نوکیں موہ دیم ءَ آورتگ انت۔ اگاں ما اے موہاں چہ پائدگ نہ زرتیں گڑا بوت کنت کہ مارا پدا چوشیں موہ مہ رس اَنت۔ جنگ ءَ پد گلوبل ٹرانس شپمنٹ پاکستان ءِ نیمگ ءَ شُتگ۔ منی گور ءَ دست کپتگیں اعداد و شمار ءِ رد ءَ پاکستانی بندرگاہ آنی تہ ءَ کارگو ءِ کار آنی تہ ءَ 1400درسد ءِ کساس ءَ گیشی بوتگ پمیشکا مارا وتی رسد ءَ را گہتر کنگ لوٹ ایت تانکہ ما اے موہ ءَ چہ سرجمی ءَ پائدگ چست بہ کن ایں ۔ آئی ءَ گوشت کہ گوادر بندر اللہ تعالیٰ ءِ نیمگ ءَ چہ یک مزنیں نعمت اِنت کہ دمگ ءِ واستہ ھاسیں تجارتی مرکز جوڑ بوت کنت۔ اگاں ما سیکورٹی ءِ جوانیں، نوکیں آسراتی ءُ رسد ءِ پجاری کت نہ کناں گڈا اے زرین موہ ھم گار بیت۔ اعجاز الحق ءَ گوشت کہ گوستگیں سال ءَ مئے جی ڈی پی ءِ تہ ءَ گیشی ءِ کساس 3.7درسد بوتگ وھدیکہ اے سال ءَ ٹارگٹ 4درسد ایر کنگ بوتگ۔ منی ھیال ءَ اے شرح پہ پاکستان ءَ یک ملکے ءِ بستار ءَ ناکافی اِنت۔ داں مئے اقتصادی دیمروئی ءِ رفتار 6 ءَ چہ 8 درسد ءَ سر نہ بیت ما گریبی ءِ تہ ءَ مزنیں کمی یے آرگ ءَ نہ ایں ۔ مارا اولی رند ءَ وتی تجارتی خسارہ ءَ را کنٹرول کنگی اِنت کہ اے وھد ءَ 37 ارب ڈالر ءِ نزیک ءَ اِنت۔ ایشی ءِ واستہ المی درآمدات ءِ سر ءَ عارضی بندش جنگ بوت کنت تانکہ درملکی زرّ ءِ بچت ءُ برآمدات ءَ را گیش کنگ بہ بیت۔ ھمے رنگ ءَ ما دوستیں ملک ھاسیں رنگ ءَ سعودی عرب، چین ءُ ایندگر ملک آنی گوما بارٹر ٹریڈ منوگری آناں دیم ءَ برگ بہ کن ایں تانکہ درملکی زر ءِ سر ءَ دباؤ کم بہ بیت۔ من ءَ وش اِنت کہ برآمد کنوکاں ایڈوانس ٹیکس ءِ تہ ءَ کمی ءُ سپر ٹیکس ءَ چہ رکینگ ءِ ستا کرتگ بلے گارمنٹس ءِ شوبگ کہ پاکستان ءِ برآمدات ءِ مستریں شوبگ اِنت آئی ءِ سر ءَ کم چہ کم ٹیکس ءِ جم کنگ ءِ بار بوتگ۔ آہانی گشگ انت کہ آہاں پدا حتمی ٹیکس ءِ رژیم ءَ شنگ کنگ بہ بیت۔ ایف بی آر ءِ وتی دستاویزات ءِ رد ءَ انوگیں نظام ءَ چہ 90ارب کلدار ءِ نزیک ءَ تاوان بوتگ وھدے کہ ایشی ءِ نپ ایوک ءَ غیر ضروری آڈٹ ءُ دلالی ءَ شتگ۔ آئی ءَ گوشت کہ اے وھد ءَ ایوک ءَ گنجائش ءِ چارج آنی سر ءَ 1.7 ءَ چہ 1.9 کھرب کلدار ءِ کساس ءَ ھرچ کنگ بوھگ ءَ اِنت ایشی ءِ بار براہ راست صارف آنی سر ءَ کپ اِیت۔ اے گپ ءِ تجویز کنگ بیت کہ اے گیشیں توان نوکیں صنعت، کان، گرین فیلڈ منصوبہ ءُ ایندگر شعبہ آناں رعایتی شرح ءَ دیگ بہ بیت تنکہ صنعت ہم دیمروئی بہ کنت ءُ گنجائش ءِ چارج ہم کم بہ بنت۔ اگاں جھان ءِ بازار ءَ تیل ءِ نھاد کم اِنت گڑا ایشی ءِ نپ زوت راج ءَ سر کنگ بہ بیت۔ مئے سرجمیں سرمایہ کاری ءِ تہ ءَ وانگ ءُ زانگ ءُ جان سلامتی ءِ پڑ ءَ دمگ ءِ دگہ ملک آنی مقابلہ ءَ سک کم اِنت۔ اگاں مارا راستی ءَ دیمروئی لوٹیت گڈا اے شعبہانی سرا گیشتر دلگوش گور کنگی انت۔ ھمے رنگ ءَ جنوبی پنجاب ھاسیں رنگ ءَ بہاول نگر ءَ ھم سک باز بے ھیال کنگ بوھگ ءَ اِنت۔ سرجمیں دمگ ءَ آپ ءِ کمی ءُ کشت ءُ کشاری تباہی ءِ آماچ بوتگ۔ کپاس کہ یک وھدے ءَ پاکستان ءِ مستریں نقد فصل بوتگ ات، چہ 15 ملین بشل ءَ کم بوتگ ءُ ایوک ءَ 5.5 ملین بشل بوتگ ءُ ایشی ءَ چہ ملک ءَ را 10 ارب ڈالر ءِ تاوان بوتگ۔ منی گوں وزیر خزانہ ءُ مزن وزیر شہباز شریف ءَ دزبندی انت کہ تنخواہ دار تبک ءَ را گیش ءَ چہ گیش ریلیف بہ دنت۔ سرجمی ءَ اے بجٹ انوگیں جاور ھال آنی تہ ءَ یک متوازنیں بجٹے، البت گارمنٹس ایکسپورٹر ءُ دگہ صنعت آنی جائزیں سوج آنی سر ءَ جوانیں رنگ ءَ چار ءُ تپاسی کنگ بہ بیت۔ من اپوزیشن ءَ چہ ھم دزبندی کناں کہ آ راجی نپ ءِ ھاتر ءَ سرکار ءِ ھمراھی ءَ کار بہ کنت ءُ یک انچیں راجی چارٹرے جوڑ بہ کنت کہ پاکستان ءَ را سیاست ءَ چہ دیم ءَ بہ کنت۔ وھدے کہ سرجمیں راج یک رندے ءَ اوشتات کنت ما نہ ایوک ءَ معاشی مشکلاں چہ دیم ءَ رو ایں بلکیں  کلیں ٹیم ہر چیلنج ءَ گوں سوبمندی ءَ ​​دیم پہ دیم بیث کنت۔