گوادر ءِ سئے ورنا  ناشرکاریں گلاں  چہ وتی بیگواہی ءِ جار ءَ جن انت، پرامن جہد کنگ ءِ جزم ءِ درشان کن انت

گوادر۔19جون  (اے پی پی): گوادر ءِ سئے ورنا اسد جلال، شریف ءُ اکرم ءَ پریس کانفرنس ءِ ساھت ءَ  ناشرکاریں  مردم آں  ءَ چہ  یک  کر بوھگ   ءِ جار جتگ ءُ پاکستان ءِ گوما وتی یکزم ءُ وفاداری ءِ پدا پدر کتگ۔ گوادر پریس کلب ءَ برجم داشتگیں پریس کانفرنس ءَ گوں تران کنان ءَ مولانا حدایت الرحمان ءَ گوشت کہ گمراہ کنوکیں پروپیگنڈا ءُ سوشل میڈیا ءِ منفی کارمرد کنگ ءِ سبب ءَ لھتیں ورنا ردیں راہ ءَ شتگ ات، البت نوں آہاں انتہا پسندیں عناصر ءَ چہ جتا بوھگ ءُ راجی مین اسٹریم ءَ ھوار بوھگ ءِ پیسلہ کتگ۔ اے موہ ءِ سر ءَ ورنا آں گوشت کہ مئے گوں گمراہیں عناصر ءَ ھچ وڑیں سیادی نیست ءُ ما وتی دوستیں وطن پاکستان ءِ ایمنی، برجائی ءُ دیمروئی ءِ سر ءَ سمجھوتہ نہ کن ایں ۔ آئی ءَ گوشت کہ امن ءُ ایمنی ءُ جوانیں چست ءُ ایر آنی وسیلگ ءَ چاگرد ءِ تہ ءَ وتی کرد ءَ پیلو کنگ لوٹ ایت۔ مولانا حدایت الرحمان ءَ دگہ ورنا آں گوں دزبندی کتگ کہ آ انتہا پسندیں تنظیماں چہ درکپ انت وتی گساں واتر بہ بنت ءُ زوراکی ءِ راہ ءَ یلہ بہ کن انت۔ آئی ءَ گوشت کہ بلوچستان ءِ دیمروئی ءُ وشھالی ایوک ءَ پرامن، جمہوری ءُ غیر تشدد ءِ جہد ءَ چہ ممکن انت۔ آئی ءَ مات ءُ پتاں ھم زور پر دات کہ آ وتی چکانی کارانی سر ءَ چماں بہ دار اَنت دانکہ آ گمراہ کنوکیں عناصر ءُ منفی پروپیگنڈا ءِ اثراں چہ رکھینگ بہ بنت۔ مولانا حدایت الرحمن ءَ گشتگ کہ بلوچستان ءِ ورنا جمہوری ءُ سیاسی عمل ءِ بہر جوڑ بہ بنت ءُ وتی حکیاوانی واستہ پرامن جہد ءُ کوشست بہ کن انت۔ آئی ءَ امیت سہرا کت کہ ورنا آنی راجی مین اسٹریم ءِ تہ ءَ واتر بوھگ ءَ چہ دمگ ءَ امن، برجائی ءُ دیمروئی ءِ تہ ءَ کمک رسیت۔