راجی اسمبلی ءَ بجٹ ءِ سر ءَ لس بحث برجاہ اِنت، باسک سبسڈی ءِ نظام ءَ را محدود کنگ ءِ بدل ءَ ان پٹ ءِ نرخ آنی تہ ءَ براہ راست ریلیف ءِ پجارینگ ءِ سفارش کن اَنت، ءُ توانائی ءِ لوٹ آناں گیش ءُ گیوار کنگ ءِ واستہ دمگی کمک ءُ منوگری آناں گیش فعال کنگ ءِ سفارش

اسلام آباد۔18جون  (اے پی پی): پنچ شمبے ءِ روچ ءَ راجی اسمبلی ءَ آیوکیں مالی سال ءِ وفاقی بجٹ ءِ ھوالگ ءَ السی بحث برجاہ بوت۔ باسکانی تہ ءَ مالیات ءِ اصلاحات، سرکاری ادارگ آنی نوکیں رنگ ءَ جوڑ کنگ، مالیاتی خسارہ ءِ کمی، آبادی، جان سلامتی، وانگ ءُ زانگ ءُ وردن ءِ ایمنی ءِ وڑیں بنیاتی جیڈھ آنی سر ءَ ترندیں دلگوشی دیگ ءِ ضلورت ءِ سر ءَ زور پر دات۔ باسک آں سرکاری ملازم آنی پگار ءُ پنشن ءِ تہ ءَ گیشی، گورننس ءِ گہتری، برآمدات ءِ تہ ءَ گیشی ءُ کشت ءُ کشاری ءِ شوبگ ءِ واستہ سرجمیں گامگیج آنی سوج دات۔ بحث ءِ ساھت ءَ باسک آں سبسڈی ءِ نظام ءَ را محدود کنگ ءُ پاکستان ءِ توان ءِ ضلورت آناں گیواری ءِ واستہ دمگی کمک ءُ منوگری آناں گیش فعال کنگ ءِ بدل ءَ ان پٹ ءِ نرخ آنی تہ ءَ براہ راست ریلیف دیگ ءِ سفارش کتگ۔ پنچ شمبے ءِ روچ ءَ راجی اسمبلی ءَ بجٹ ءِ ھوالگ ءَ السی بحث ءَ بھر زورگ ءَ اپوزیشن رہشون رضا علی گیلانی ءَ گوشت کہ توان ءِ نرخ آنی تہ ءَ کمی کنگ بہ بیت، گنجائش ءِ ادائیگی ءِ جیڈھ ءِ پائیداریں گیشواری ءِ شوھاز کنگ بہ بیت، گریبیں الس ءِ نپ آنی رکھینگ بہ بیت ءُ انصاف ءَ را دل یکیمی کنگ بہ بیت۔ آئی ءَ گوشت کہ بجٹ ءَ کشت ءُ کشار ءِ شوبگ یلہ کنگ بوتگ، کشت ءُ کشار ءِ دیمروئی ءُ کشت ءُ کشاری ءِ گہبودی ءِ واستہ گامگیج چست کنگ بہ بیت، حکومت وتی بجٹ ءِ گشتانک ءِ توسیپ ءَ کنگ ءَ انت، بلے راستی ایش انت کہ مہلوک مہنگائی ءُ معاشی مشکلانی آماچ انت۔ کسان، مزدور ءُ تنخواہ دار طبقہ مشکلات ءِ آماچ انت۔ پنچمی رند ءَ بجٹ ءِ باوجود کشت ءُ کشاری ھما جاور ءَ سر بوتگ کہ آ ھم وام زورگ ءَ دیمتر ءِ فصل ءِ کشت ءُ کشار ءَ کنگ ءَ اِنت۔ اسد عالم نیازی ءَ گوشت کہ پاکستان ءَ راجی سروکی ءُ سلاہ بندیں اُرد ءِ جوانیںیں حکمت عملی ءَ گوں دفاعی محاذ ءَ راجدپتری سوبمندی رستگ ءُ دگنیا ءَ را اے کلوہ ءِ دیم داتگ کہ پاکستان امن دوستیں ملک انت، بلے وت ءَ را رکھینگ ءِ واستہ سرجمی ءَ توان ءِ واھند انت۔ اگرچہ بجٹ مشکل معاشی جاوراں پیش کنگ بوتگ بلے الس ءَ را حقیقی ریلیف ءِ رسگ ءِ ھاتر ءَ گیش اصلاحات ءِ ضلورت انت۔ مہنگائی ءِ مقابلہ ءَ تنخواہانی تہا یک معمولی اضافہ ناکافی انت، وھدے کہ عام مردم ءِ سرا ورگ، روزگار ءُ مہنگائی ءِ جیڑہ انت۔ حکومت ءَ را ترندیں رنگ ءَ ٹیکس اصلاحات، سرکاری ادارگ آنی نوکیں رنگ ءَ جوڑ کنگ، مالیاتی خسارہ ءِ کمی، آبادی، جان سلامتی، وانگ ءُ زانگ ءُ وردن ءِ ایمنی ءِ وڑیں بنیاتی جیڈھ آنی سر ءَ دلگوشی دیگی اِنت تانکہ پائیداریں اقتصادی دیمروئی ممکن بہ بیت۔ آئی ءَ گوشت کہ پٹرولیم مصنوعات آنی سر ءَ لیوی ءِ تہ ءَ کمی کنگ بیت، کشت ءُ کشار ءِ واستہ گامگیج چست کنگ بہ بیت، چاگرد ءِ معاشی رد ءَ نزوریں بھر آنی ریلیف ءِ واستہ فنڈز ءِ تہ ءَ گیشی کنگ بہ بیت۔ اپوزیشن شہریار آفریدی ءَ گوشت کہ سود ءِ نظام ءِ سبب ءَ مئے معیشت بحال کنگ نہ بیت، ایشی ءِ سبب ءَ الس ءِ جیڈھ مدام گیش بوھگ ءَ انت۔ سیاسی آجوئی ءِ واستہ معاشی آجوئی ءُ آجوئی المی انت ۔ اقتصادی بحران، مہنگائی، بے روزگاری ءُ گریبی ءِ گیشی ءِ سبب ءَ مردم مشکلات ءِ آماچ انت۔ مہلوک ءَ را ریلیف پجاری ءِ بدل ءَ بجٹ شرتانی تہا جوڑ کنگ بوتگ لکاں پاکستانی غربت ءِ لیکہ ءَ چہ چیر زند گوازینگ ءَ انت۔ خیبرپختونخوا، بلوچستان، کشمیر ءُ ایندگہ محرومیں دمگ آناں دیمروئی منصوبگ، مڈی ءُ بنیاتی آسراتی آں وتی بہر دیئگ بہ بیت۔ حکومت ءَ راجی جیڈھ، انصاف، صوبہ آنی ھک، امن ءُ کانود، روزگار، جان سلامتی ءُ وانگ ءُ زانگ ءِ سر ءَ دلگوشی دیگی اِنت تانکہ ملک راستی ءَ دیمروئی ءُ برجائی ءِ کشک ءَ جُنزان بہ بیت۔ پیپلز پارٹی ءِ نظیر احمد بوگیون ءَ گوشت کہ آ پاکستان ءِ سلاہ بندیں اُرد ءُ ھاسیں رنگ ءَ آھانی مزنیں سروکی ءَ را یات کنت کہ آھاں ملک ءِ دفاع ءُ برجائی ءِ تہ ءَ جوانیں کرد پیلو کتگ۔ حالی ئیں تنخواہ ءُ پنشن ءِ تہا گیشی مہنگائی ءِ تناسب ءَ ناکافی انت۔ انوگیں مہنگائی ءِ شرح ءِ سرا ھیال ءُ لیکہ کنان ءَ کم چہ کم 15 ءَ بگر داں 20 درسد ءِ گیشی المی ات دانکہ سرکاری ملازم ءُ پنشنرز ءَ را حقیقی ریلیف رس ایت۔ کشت ءُ کشاری ءِ شوبگ پاکستان ءِ ریڑھ ءِ ھڈ اِنت بلے بدقسمتی ءَ پالیسی سازی ءِ تہ ءَ دمگ آنی نیام ءَ توازن نیست۔ سندھ، جنوبی پنجاب ءُ دگہ کشت ءُ کشاری دمگ آنی لوٹ جتا انت۔ سندھ ءَ بوہگ ءِ موسم پنجاب ءَ چہ پیسر بندات بیت بلے آپ ءِ رسگ ءُ پالیسیانی تہا اے فرق ءِ سرا ھیال نہ دارگ بیت۔ کشت ءُ کشاری پالیشی دمگی حقیقت آنی رد ءَ جوڑ کنگ بہ بنت تانکہ جہل ءِ سندھ، میاں اوستمانی سندھ، بالائی سندھ ءُ ایندگر کشت ءُ کشاری بیلٹ آنی کشت ءُ کشاری یک پیم ءَ نپ چست بہ کن اَنت۔ وھد ءِ سر ءَ آپ ءِ رسگ ھم دل یکیمی کنگ بہ بیت دانکہ فصل ءِ موسم ءَ را ھچ وڑیں تاوان مہ رسیت۔ بیج، ٹریکٹر، کھاد ءُ ایندگر مشینری ءِ وڑیں زرعی ان پٹ آنی سر ءَ ٹیکس کم کنگ بہ بیت۔ اے وھد ءَ کھاد ءِ ھاسیں رنگ ءَ ڈی اے پی ءُ یوریا ءِ نھاد سک باز گیش بوتگ اَنت کہ ایشی ءَ چہ کشت ءُ کشاری ءِ ھاترا سکیں تکلیف ءِ آماچ بوھگ ءَ اِنت۔ سبسڈی ءِ نظام ءَ را بندش جنگ ءِ بدل ءَ ان پٹ ءِ نرخ آنی تہ ءَ براہ راست ریلیف دیگ شرتر بیت۔ بی آئی ایس پی ءِ چیر دستی ءَ حکومت ءِ نیمگ ءَ گریب آنی واستہ فنڈز ءِ تہ ءَ گیشی یک جوانیں گامگیج اِنت۔ آئی ءَ گوشت کہ پاکستان ءِ توان ءِ ضلورت آنی گیواری ءِ واستہ دمگی کمک ءُ منوگری آناں ھم گیش سرگرم کنگ لوٹ ایت تانکہ گیس ءُ توان ءِ بحران ءَ چہ گر ءُ دار کنگ بہ بیت۔ ھمے رنگ ءَ سکھر حیدرآباد کراچی موٹروے ءِ وڑیں ھاسیں منصوبگ آنی تہ ءَ دیر کنگ ھم جیڑگ ءِ سبب اِنت۔ اے منصوبہ ءِ سستیں سرجمی ءَ چہ ھرچ ءُ درچ گیش بوھگ ءَ اِنت ءُ لس مھلوک ءِ گرانیں جاور گیش بوھگ ءَ اَنت۔ اسامہ احمد ملا ءَ گوشت کہ جنوبی افریقہ ءَ پاکستانی آنی ھلاپ ءَ نسلی پروفائلنگ ءِ سر ءَ دلگوشی دیگ بہ بیت۔ حالانی ردا جنوبی افریقہ ءَ نسلی پروفائلنگ ءِ وھد ءَ بازیں پاکستانی شہید کنگ بوتگ انت۔ وزارت خارجہ اے جاور ءِ سرا نوٹس بہ زوریت۔ بی آئی ایس پی ءِ بجٹ ءِ تہ ءَ گیشی ءِ وش آتک کنگ بیت۔ آئی ءَ گوشت کہ درملک ءَ نشتگیں پاکستانی ملکی معیشت ءِ بنیات اَنت، آھاں آسراتی پجاری وھد ءِ لوٹ اِنت۔ آئی ءَ گوشت کہ دمگی بیپار ءِ تہ ءَ گیشی ءِ دیم ءَ اڑاند دور کنگ بہ بنت۔ بید ءِ دمگی سوداگری ءَ مئے معیشت دیمروئی نہ کنت۔ راجی اسمبلی ءَ بجٹ ءِ سر ءَ لس بحث برجاہ اِنت، باسک سبسڈی ءِ نظام ءَ را محدود کنگ ءِ بدل ءَ ان پٹ ءِ نرخ آنی تہ ءَ براہ راست ریلیف ءِ پجارینگ ءِ سفارش کن اَنت، ءُ توانائی ءِ لوٹ آناں گیش ءُ گیوار کنگ ءِ واستہ دمگی کمک ءُ منوگری آناں گیش فعال کنگ ءِ سفارش کن اَنت۔