کشت ءُ کشاری ءُ صنعت ءِ پائیدار دیمروئی حکومت ءِ اقتصادی پالیسی ءِ مستریں ستون اِنت، وفاقی وزیر ءِ ھزانگ ءَ پاکستان کپاس ءِ جنر ایسوسی ایشن ءِ ڈل ءَ گوں    تران

اسلام آباد۔18جون  (اے پی پی): وفاقی وزیر خزانہ ءُ ریونیو سینیٹر محمد اورنگزیب ءَ گوشت کہ کشت ءُ کشاری ءُ صنعت ءِ پائیدار دیمروئی حکومت ءِ اقتصادی پالیشی ءِ مستریں ستون اِنت، پالیسی جوڑ کنگ ءِ تہ ءَ اسٹیک ہولڈر آنی گوما شور ءُ سلاھ ءِ ھاسیں ارزشت اِنت۔ وزارت خزانہ ءِ نیمگ ءَ جاڑی بوتگیں بیان ءِ رد ءَ آئی ءَ اے گپ پنچ شمبے ءِ روچ ءَ پاکستان کاٹن گینرز ایسوسی ایشن ءِ ڈل ءَ گوں گند ءُ نند ءَ کت۔ ڈل ءِ سروکی ءَ چیئرمین شام لال منگلہ ءَ کتگ ات۔ دیوان ءِ مول ءُ مراد کپاس ءِ شوبگ ءَ گوں سیادی داروکیں جیڈھ آنی سر ءَ گپ ءُ تران کنگ ءُ معیشت ءِ تہ ءَ صنعت ءِ کرد ، برآمدات ءِ دیمروئی ءُ دیہی روزگار ءِ تہ ءَ گیشی ءِ واستہ موثر گامگیج آنی سر ءَ ھیال ءُ لیکہ کنگ بوتگ۔ ڈل ءِ تہ ءَ انجمن ءِ سینئر وائس چیئرمین شیخ فیاز احمد، پیسریگیں چیئرمین سہیل محمود ھور، چوہدری وحید ارشد ءُ مختار بلوچ ھم ھوار اتنت۔ دیوان ءَ سرجمیں کپاس ءِ ویلیو چین ءِ انوگیں جاور ھال، کشت ءُ کشاری ءُ جنر آنی دیم ءَ چیلنج ءُ پیداوار، سرمایہ کاری ءُ پائیداری ءَ را گہتر کنگ ءِ واستہ پالیسی گامگیج آنی سر ءَ تفصیل ءَ گپ ءُ تران کنگ بوت۔ پی سی جی اے ءِ نمائندگاں پاکستان ءِ ٹیکسٹائل ءِ صنعت ءِ واستہ یک ھاسیں نقد فصل ءُ بنجاہی خام مال ءِ رنگ ءَ کپاس ءِ اسٹریٹجک ارزشت ءِ سر ءَ زور پر دات۔ آہاں گوشت کہ اے شوبگ دیہی روزگار ءِ پھجارینگ، کمکی صنعت آنی دیمروئی، برآمدات ءِ تہ ءَ گیشی، ءُ درآمد بوتگیں کپاس ءِ سر ءَ انحصار ءَ را کم کنگ ءِ تہ ءَ کلیدی کرد پیلو کنت۔ ڈل ءَ ٹیکس ، دستاویزات ءِ نظام ، ءُ اے شوبگ ءِ تہ ءَ باقاعدہ اقتصادی کاروائی آناں دیمروئی ءِ ھوالگ ءَ تجویز ھم پیش کتگ اَنت۔ وزیر خزانہ ءَ راجی معیشت ءِ تہ ءَ کپاس ءِ صنعت ءِ ارزشت ءِ منگ ءِ وھد ءَ پیداواری شوبگ آنی واستہ سازگاریں کاروباری ماحول ءِ پجارینگ ءِ حکومت ءِ عزم ءِ سر ءَ پدا زور پر دات۔ آئی ءَ گوشت کہ کشت ءُ کشاری ءُ صنعت ءِ برجمیں دیمروئی حکومت ءِ اقتصادی پالیشی ءِ مستریں ستون انت ءُ پالیسی جوڑ کنگ ءَ اسٹیک ہولڈر آنی گوما شور ءُ سلاھ ءِ ھاسیں ارزشت انت۔ وزیر ءِ ھزانگ ءَ گوشت کہ حکومت ٹیکس نیٹ ءَ را گیش کنگ، شفافیت ءِ تہ ءَ گیشی ءُ ذمہ واریں کاروباری ادارگ آنی واستہ یک وڑیں گنجائش ءِ پجارینگ ءِ سر ءَ دلگوشی دیگ ءَ اِنت۔ پالیسی ءِ گامگیج اقتصادی چست ءُ ایر، سرمایہ کاری ءُ روزگار ءِ موہ آناں دیمروئی دیگ ءِ مول ءُ مراد انت۔ آئی ءَ دل یکیمی دات کہ پی سی جی اے ءِ نیمگ ءَ پیش کتگیں سوج آنی سر ءَ سیادی داروکیں ادارگ آنی تک ءَ سرجمیں رنگ ءَ چار ءُ تپاسی کنگ بیت۔ گند ءُ نند ءَ سرجمیں کپاس ءِ نظام ءَ را مھکم کنگ، مقابلہ ءِ توان ءَ را گیش کنگ، ویلیو ایڈیشن ءَ را دیمروئی دیگ ءُ سپلائی چین ءَ گیش سرمایہ کاری ءِ ضلورت ءِ سر ءَ ھم ھیال ریچی کنگ بوت۔ پریک آنی تہ ءَ اے گپ ءِ سر ءَ تپاک کنگ بوت کہ حکومت ءُ صنعت ءِ نیام ءَ برجاھیں رابطہ المی اِنت تانکہ عملی ءُ دائمی گیواری ءِ شوھاز کنگ بہ بیت کہ کپاس ءِ شوبگ ءِ زندگ ءُ دیمروئی ءَ کمک بہ کنت۔ وزیر ءِ ھزانگ ءَ ڈل ءِ جوڑیشت ءِ پنت ءُ شون آناں ساڑات ءُ جزم ءِ درشان کت کہ حکومت برجمیں اقتصادی دیمروئی ءِ ھاترا برآمدات ءِ تہ ءَ گیشی ءُ ملک ءَ روزگار ءِ موہ پیداک کنگ ءِ واستہ صنعت ءِ نمائندگ آنی گوما نزیکی ءَ کار کنگ ءَ برجاہ دار ایت۔