وفاقی وزیر سینیٹر ڈاکٹر مصدق ملک یورپی پالیسی ءِ پٹ ءُ پول ءِ مرکز ءِ دعوت ءِ سرا برسلز ءَ سر بوتگ

برسلز۔18جون  (اے پی پی): موسمیاتی بدلی ءُ چاگردی یکوئی ءِ وفاقی وزیر سینیٹر ڈاکٹر مصدق ملک یورپی پالیسی ءِ یک مزنیں ادارگ یورپی پالیسی ءِ پٹ ءُ پول ءِ مرکز (سی ای پی ایس) ءِ دعوت ءِ سرا برسلز ءَ سر بوتگ کہ اودا آ یک مزنیں میاں اوستمانی کانفرنس ءِ تہا بہر زوریت۔ موسمی بدلی ءُ چاگردی یکوئی ءِ وزارت ءِ رد ءَ اے کانفرنس سی ای پی ایس ءُ یورپی یونین، بیلجیم ءُ لگزمبرگ ءَ پاکستانی سفارتخانہ آنی کمک ءَ کنگ بوھگ ءَ اِنت۔ اے دیوان ءَ یورپی پارلیمنٹ ءِ باسک، میاں اوستمانی کانود ءِ ماہرین، سفارتکار، پالیسی ساز، چاگردی زانتکار ءُ آپی وسیلگ ءِ شوبگ ءَ گوں سیادی داروکیں مردم بھر زوری کن اَنت۔ کانفرنس ءِ تہ ءَ موسمی بدلی، جھان ءِ آپی ایمنی، ٹرانس باونڈری آپی وسیلگ، سندھ ءِ آپانی معاہدہ ءُ میاں اوستمانی کانود آنی رد ءَ آپ ءِ گیش بوھوکیں جیو پولیٹیکل ءُ سیاسی کرد ءِ سر ءَ گپ ءُ تران کنگ بیت۔ کانفرنس ءَ بہر زورگ ءَ پیسر ھاسیں دیوان ءِ تہ ءَ تران کنان ءَ ڈاکٹر مصدق ملک ءَ گوشت کہ پاکستان آپ ءَ را سلاہ ءِ رنگ ءَ کارمرد کنگ ءِ ھرچ وڑیں کوشست ءَ را نا منّگ لیک ایت پرچا کہ آپ ایوک ءَ قدرتی وسیلگ نہ اِنت بلکیں لاکھوں مردم آنی روزگار، وردن، کشت ءُ کشار، معیشت ءُ راجی ایمنی ءَ گوں سیادی داروکیں جیڈھ اِنت۔