ملک گران تریں اقتصادی جاوراں چہ درکپگ ءَ انت ءُ استحکام ءِ نیمگ ءَ روگ ءَ انت، پارلیمانی سیکرٹری زیب جعفر ءَ راجی اسمبلی   ءَ بجٹ ءِ سرا گپ ءُ تران ءِ ساھت ءَ وتی ھیالانی درشانی

اسلام آباد۔17جون  (اے پی پی):وزارت اقتصادی کار آنی واستہ وفاقی پارلیمانی سیکرٹری ءُ مالیاتی کمیٹی ءِ باسک زیب جعفر ءَ گوشت کہ ملک گران تریں اقتصادی جاور آنی تہ ءَ چہ درکپگ ءَ انت ءُ استحکام ءِ نیمگ ءَ روگ ءَ انت، سنگاپور ءِ میاں اوستمانی رول ماڈل ءِ رد ءَ وفاقی آپی پالیشی جوڑ کنگ بہ بیت۔ راجی اسمبلی ءَ آیوکیں مالی سال ءِ وفاقی بجٹ ءِ ھوالگ ءَ گپ ءُ تران ءِ ساھت ءَ یک سرجمیں ءُ سرجمیں گشتانک ءِ تہ ءَ آئی ءَ ملک ءِ معیشت، دفاع، زالبول آنی جان سلامتی، ورنا ءُ دمگی جیڈھ آنی ھوالگ ءَ حکومت ءِ پالیشی آناں ساڑات ءُ ھاسیں سوج پیش کت۔ آئی ءَ وتی گشتانک ءِ بنگیج ءَ مزن وزیر شہباز شریف ءُ فیلڈ مارشل سید عاصم منیر ءِ سروکی ءَ را شگر ءُ منت درشان کنان ءَ گوشت کہ آوانی یکجائی حکمت عملی ءِ برکت ءَ مرچی دگنیا پاکستان ءِ امن دوستیں کرد ءَ را من ایت ءُ ملک گران تریں معاشی جاوراں چہ درکپگ ءَ انت ءُ استحکام ءِ نیمگ ءَ روگ ءَ انت۔ میان نواز شریف ءِ پاکستان ءَ را ایٹمی طاقت جوڑ کنگ ءِ راجدپتری پیسلہ ءِ حوالہ ءَ آئی ءَ گوشت کہ استیں حکومت ءَ اے روایت ءَ را برجم دارگ ءَ سرجمیں دگنیا ءَ گرین پاسپورٹ ءِ عزت ءُ شرپ ءَ را گیش کتگ ایشی ءَ چہ میاں اوستمانی مارکیٹ ءَ درملکی سرمایہ کار آنی اعتماد بحال بوتگ ءُ پاکستان آئی ایم ایف ءِ پرومیز ءَ را پیلو کنان ءَ راستیں راہ ءَ دیم ءَ روگ ءَ اِنت۔ مالیاتی جیڈھ آنی سر ءَ تران کنان ءَ آئی ءَ گوشت کہ بجٹ 2026 ءَ ورنا آنی کشت ءُ کشاری ءُ کاروباری وام آنی واستہ مزنیں کساسے ایر کنگ بوتگ ایش ملک ءِ آیوکیں باندات ءِ واستہ جوانیں گامگیج اِنت۔ ایشی ءِ گوما آئی ءَ راجی خزانہ ءِ سر ءَ بوجھ ءَ را کم کنگ ءِ واستہ پنشن ءِ اصلاحات ءِ سر ءَ زور پر دات ءُ فنانس کمیٹی ءِ تجربگ ءِ رد ءَ بنگلہ دیش ءُ کینیڈا ءِ ماڈل آنی حوالہ دات۔ دفاعی بجٹ ءِ ھوالگ ءَ آئی ءَ سیمسر آنی سر ءَ زھرناکیں گرم ءَ ھواریں سپاھیگ آنی قربانی آنی ھال دات ءُ ھمساھگیں ملک ءِ بھاری دفاعی بجٹ ءِ گوما ھمگرنچ کنان ءَ وزیر ھزانگ ءَ چہ لوٹ کت کہ دفاعی بجٹ ءَ را گیش گیش کنگ بہ بیت تانکہ مئے بہادریں سپاھیگ آنی آسراتی بہ بیت۔ زیب جعفر ءَ ملک ءِ معیشت ءِ کمک ءِ ھاتر ءَ یک ھاسیں تجارتی شوبگ ءِ ھم نشاندہی کتگ ءُ گْوشتگ کہ سرجمیں دگنیا ءَ ‘سی ویڈ’ ءِ مزنیں 25 ارب ڈالر ءِ صنعت ھست بلے پاکستان ءِ 1000 کلومیٹر ءِ کوسٹ لائن ءُ 475 وڑیں سی ویڈ ءِ باوجود ایشی ءِ تہ ءَ ایشی ءِ بھر ءُ بانگ ءِ تہ ءَ ایوک ءَ 2 ملین ءِ دیمروئی اِنت چو کہ انڈیا   ءُ انڈونیشیا ءَ بوتگ۔ زالبول آنی جان سلامتی ءِ بابت ءَ گپ جنان ءَ آئی ءَ وزیر خزانہ ءَ را حفظان صحت ءِ چیز آنی سر ءَ ‘گلابی ٹیکس’ ءِ ھلاسی ءِ سر ءَ مبارکی دات۔ آئی ءَ ایوان ءِ دلگوش گور کت کہ ملک ءِ 70درسد آبادی وٹامن ڈی ءِ کمی ءِ آماچ انت ایشی ءِ واستہ زالبول آناں مفت انجکشن ءِ ھاسیں کوٹہ ءِ ھست بہ بیت تانکہ مات ایمن بہ بنت۔ آئی ءَ شہباز شریف ءِ گوستگیں وھد ءَ پنجاب ءَ مفت ءَ ہیپاٹائٹس ءِ انجکشن دیگ ءِ گامگیج ھم یات کت۔ ایشی ءِ گوما آئی ءَ ساپیں آپ ءِ بحران ھاسیں رنگ ءَ جنوبی پنجاب ءَ نمناکیں آپ ءِ جیڈھ ءِ سر ءَ چمشانک دات ءُ سنگاپور ءِ میاں اوستمانی رول ماڈل ءِ رد ءَ وفاقی آپ ءِ پالیشی ءِ جوڑ کنگ ءِ اپیل کت۔ وتی گشتانک ءِ گڈی بہر ءَ زیب جعفر ءَ پنجاب ءِ سر وزیر مریم نواز شریف ءِ سروکی، تپاکی ءُ بہادری ءَ گوں تچکیں لبزاں توسیپ کتگ۔ آئی ءَ گوشت کہ مریم نواز ءَ پنجاب ءَ اولی رند ءَ ایئر ایمبولینس سروس، کلین پنجاب مہم ءُ زالبول آنی رکھینگ ءِ واستہ کمکی لائن ءِ وڑیں مثالی گامگیج چست کتگ ءُ آئی ءِ مھکمیں پالیشی آنی سبب ءَ رحیم یار خان ءِ خطرناکیں کچھا دمگ نوں داکوئٹ ءَ چہ آجو ءُ ایمن بوتگ۔ آئی ءَ اپوزیشن ءِ سرا ایراد گپتگ ءُ گشتگ کہ شکایت کنگ ءِ بدل ءَ مریم نواز ءِ روح ءَ چہ دربرگ بہ بیت۔ آئی ءَ ایوان ءَ ھواریں پارلیمنٹ ءِ درستیں زالبولیں باسک آنی کانود سازی ءِ تہ ءَ وتی زند ءِ ندر کنگ ءَ را سلام پیش کت ءُ اے گپ ءِ سر ءَ فخر ءِ درشانی کت کہ آ ملک ءِ 54درسد آبادی ءِ راستیں ءُ مھکمیں توار اَنت۔