این ایف سی ءِ تہ ءَ آبادی ءِ رد ءَ وسیلگ آنی تخصیص ءِ تناسب 50درسد ءَ دارگ بہ بیت، وفاقی وزیر برائے راجی جان سلامتی ءَ بجٹ   ءِ تہ ءَ وتی ھیال آنی درشانی

اسلام آباد۔16جون  (اے پی پی): راجی جان سلامتی ءِ وفاقی وزیر مصطفیٰ کمال ءَ گوشت کہ یک جوانیں گورننس سسٹم ءِ وسیلگ ءَ الس ءِ دروازگ ءِ سر ءَ جیڈھ آناں گیواری ءَ کمک رسیت، اقتدار ءَ را گراس روٹ لیول ءَ را دیم دیگ المی اِنت، این ایف سی ءَ آبادی ءِ رد ءَ وسیلگ ءِ بھر ءُ بانگ ءِ تناسب 50درسد دارگ بہ بیت۔ سئے شمبے ءِ روچ ءَ راجی اسمبلی ءَ آیوکیں مالی سال ءِ وفاقی بجٹ ءِ ھوالگ ءَ گپ ءُ تران ءَ بھر زوری کنان ءَ وفاقی وزیر ءَ گوشت کہ ملک ءِ آبادی 260ملین اِنت ءُ ھمک سال 6.7ملین مردم آبادی ءَ گوں ھوار بوھگ ءَ اَنت۔ اگاں انوگیں رھبند برجاہ بہ بیت گڑا ما 2030 ءَ چہ آبادی ءِ رد ءَ پنچمی مزنیں ملک ءَ چہ چارمی مزنیں ملک ءَ سر بئیں۔ ہر سال 11 ہزار مات زھگ ءِ پیدائش ءِ وھد ءَ بیران بنت، 40 درسد زھگ نادراھی ءِ آماچ بنت، 20 میلیون ءَ چہ گیش زھگ چہ وانگجاہ ءَ در بنت، مارا 66 ہزار اسکول ءُ 600 ہزار ءَ چہ گیش استادانی ضلورت اِنت، مارا 3600 نوکیں پرائمری ہسپتال ءُ 20 میلیون نوکیں ہاؤس ءِ ضلورت اِنت۔ اگاں اے جاور گر ءُ دار کنگ نہ بوت انت مئے جیڑہ ءُ جنجال گیش بنت ۔ وفاقی وزیر ءَ گشتگ کہ حکومت ءِ دولت ءِ بہر ءُ بانگ ءِ فارمولہ 82درسد آبادی ءِ سرا انت، اے بنیاد ءَ اگاں بلوچستان ءَ فنڈز لوٹیت کہ پنجاب ءِ وڑا آئی ءَ وتی آبادی ءَ را پنجاب ءِ کچ ءَ گیش کنگی انت کہ اے نظام ءِ مزنیں نزوری انت۔ منی لوٹ اِنت کہ اے جیڈھ گیش ءُ گیوار کنگ بہ بیت، این ایف سی ءِ چیر دستی ءَ وسیلگ آنی بھر ءُ بانگ ءِ فارمولہ 50درسد آبادی ءِ سر ءَ بہ بیت۔ آئی ءَ گوشت کہ زھگ ءِ گر ءُ دار ءِ سر ءَ ٹیکس ھلاس کنگ ءَ را وش اتک کنگ بیت، ایشی ءَ چہ یک ءُ نیم لکھ زھگ آنی پیدائش ءِ تہ ءَ کمی کیت۔ راجی آبادی ءِ استحکام ءِ ھاتر ءَ روڈ میپ جوڑ کنگ بیت کہ ایشی ءِ ھاتر ءَ ما وزارت مالیات ءِ منت وار ایں ۔ گورننس سسٹم ءِ گہتری ءِ ضلورت انت، جوانیں سسٹم الس ءِ گس ءِ دپ ءَ اوشتاتگیں جیڈھ آناں گیواری ءَ کمک کنت۔ آئی ءَ گوشت کہ بھر ءُ بانگ ءِ لائکیں آمدنی ءِ تہ ءَ چہ 8848ارب صوبگ آنی تہ ءَ روت، صوبگ آنی تہ ءَ ضلع آنی نیمگ ءَ چہ اے وسیلگ آناں پھجارینگ ءِ ھچ وڑیں میکانزم نیست، ایشی ءِ واستہ یک برجائیں ءُ کارآمدیں بنجاہی حکومتی نظام ءِ ضلورت اِنت۔ جی ایس ٹی ءِ چیر دستی ءَ صوبہ آنی تہ ءَ روگ ءِ زرّ آئینہ ءِ رد ءَ ضلع آنی تہ ءَ روگی اِنت بلے اے کار ءِ سر ءَ عمل کنگ نہ بوھگ ءَ اِنت۔ مئے پارٹی ءَ وسیلگاں چہ جہلیں تک ءَ دیم دیگ ءِ میکانزم ءِ سرا زور داتگ کہ ایشی ءِ سرا ہمدردی ءِ سرا ھیال ءُ لیکہ کنگ بہ بیت۔ سکور ہڈگرآباد موٹروے ءَ تاں کراچی ءَ را گیش کنگ بہ بیت، کے فور منصوبہ زوتاں چہ زوت سرجم کنگ بہ بیت۔ آئی ءَ گوشت کہ امن معاہدے ءِ تہ ءَ پاکستان ءَ مزنیں کردے پیلو کتگ، بھارت ءِ ھلاپ ءَ جنگ ءَ سوبمندی ءَ پد جھان ءِ تک ءَ پاکستان ءِ شرپ گیش بوتگ ایشی ءِ تہ ءَ مزن وزیر ءُ فیلڈ مارشل عاصم منیر  ءَ المی کرد پیلو کتگ، پاکستان ءَ جھان ءِ جنگ ءِ گر ءُ دار ءَ چہ پاکستان ءَ یک کارنامہ ءِ سرجم کتگ۔