اقوام متحدہ ءِ سیکرٹری جنرل ءَ امریکہ ءُ ایران ءِ نیام ءَ پاکستان ءِ دلالی ءَ جنگ بندی ءِ منوگر، جنگ بندی ءِ وھد ءِ گیش کنگ، آبنائے ہرمز ءِ پچ کنگ ءِ منوگری  وش آتک کتگ

واشنگٹن۔15جون  (اے پی پی):  امریکہ ءُ ایران ءِ نیام ءَ پاکستان ءِ میانجی ءَ جنگ بندی ءِ سر ءَ تپاک کنگ بوتگ ءُ گیشیں گپ ءُ تران ءِ راہ پچ بوتگ کہ ایشی ءِ سبب ءَ ماہانی جنگ ءِ آسر بوت کنت کہ ایشی ءَ ھزاراں مردم بیران کتگ ءُ جھان ءِ معیشت ءِ تہ ءَ ھرابکاری کتگ۔ امریکہ ءِ صدر ڈونلڈ ٹرمپ ءَ سوشل میڈیا ءَ وتی کلوہ ءِ تہا گشتگ کہ نوں ایران ءِ گوما منّگ سرجم بوتگ ۔ دومی نیمگ ءَ ایران ءِ سپریم راجی سلامتی کونسل ءَ وتی بیان ءَ گْوشتگ کہ ایران ءَ ماہانی دراجیں ءُ گرانیں گپ ءُ تران ءَ پد گوں امریکہ ءَ یک مفاہمت نامہ ءِ سر ءَ ھلاسی کتگ۔ پاکستان ءَ سرجمیں عمل ءِ تہا کلیدی میانجی ءِ کرد پیلو کتگ۔ پاکستان ءِ مزن وزیر شہباز شریف ءَ اسلام آباد ءَ اے معاہدے ءِ جار جتگ ءُ گوشت کہ اے معاہدے ءِ یک شل ءَ   دستخط ءِ مراگش 19 جون ءَ سوئٹزرلینڈ ءَ برجم دارگ بیت۔نیویارک ءَ اقوام متحدہ ءِ سیکرٹری جنرل انتونیو گوتریس ءَ اے معاہدے ءِ وش آتک کتگ ءُ گوشت کہ اے معاہدے ءِ امن ءُ ایمنی ءِ ھاتر ءَ ھاسیں گامگیج اِنت۔ آئی ءَ وتی بیان ءِ تہ ءَ پاکستان، قطر، مصر، سعودی عرب، ترکی ءُ ایندگر دمگی ملک آنی جوڑیشت ءِ کرد ءِ توسیپ کت کہ آہاں امن معاہدے ءِ سبب جوڑ بوتگیں گپ ءُ تران ءِ کمک کتگ۔ آئی ءَ امیت سہرا کت کہ فریق جیڈھ ءِ گڈی گیواری ءِ شوھازگ ءِ واستہ وتی کوشست آناں گیش ترند کن اَنت۔ آئی ءَ یک رندے پدا گوشت کہ اقوام متحدہ یک برجمیں ءُ سرجمیں امن ءِ برجائی ءِ واستہ ھمک رنگ ءِ کمک ءِ واستہ تیار اِنت۔ صدر ٹرمپ ءَ وتی سوشل میڈیا پوسٹ ءِ تہ ءَ گوشت کہ اے معاہدے ءَ چہ آبنائے ہرمز پدا پچ بیت کہ اے جہانی معیشت ءِ واستہ یک المی ئیں آپی راہ اِنت۔ آئی ءَ گوشت کہ آئی ءَ ایران ءِ بندر آنی سر ءَ امریکی بحریہ ءِ بندش ءِ ترندی ءَ چہ ھلاس کنگ ءِ منظوری داتگ۔ آئی ئَ گوشت کہ دگنیا ئِ ملک آنی جہاز ئِ وسیلگ ئَ تیل ئِ شپنگ پدا بنگیج کنگ بہ بیت۔ اے معاہدے ءِ تفصیلات فوراً شنگ نہ بوتگ انت۔ بلے صدر ڈونلڈ ٹرمپ ءِ سوشل میڈیا ءِ پوسٹ گوں ھما چیز ءَ ھمگرنچ ات کہ امریکی ءُ ایران ءِ کارندہاں پیسر ءَ ھمے ھال داتگ کہ بنداتی ڈیل ءِ تہ ءَ ھوار کنگ بوت کنت۔ حکام ءِ گشگ انت کہ اے ڈیل ءِ تہا 60 روچ ءِ جنگ بندی ھوار انت کہ ایشی ءِ مول ءُ مراد دوئیں نیمگ آنی نیام ءَ جنگ بندی ءِ ھلاسی ءُ گیشیں گپ ءُ تران ءِ واستہ سازگاریں چاگرد ءِ جوڑ کنگ انت۔ ایران ءِ سپریم راجی سلامتی کونسل ءَ وتی بیان ءَ گْوشتگ کہ اے ڈیل ءِ تہ ءَ لبنان ءَ ھوار سرجمیں محاذ آنی سر ءَ فوجی کارروائی آناں زوت ھلاس کنگ ءِ لوٹ کنگ بیتگ کہ اودا اسرائیل ءُ حزب اللہ ءِ جنگول یک جیڑھے ءِ تہ ءَ بند اَنت۔ گڈی دمان ءِ ترند گامیں گپ ءُ تران کہ ایشی ءِ تہا قطر ءَ مرکزی کرد پیلو کتگ ات، کش ءُ گوراں کم کنگ ءَ کمک کتگ ات ءُ بظاہر تہران ءَ شپ ءِ دیر ءَ گڈی ڈیل ءِ سرا دست کپتگ ات۔ ایران ءِ جوہری پروگرام ءِ بابت ءَ کارندہاں پیسر ءَ چہ اشارہ کتگ کہ دوئیں ملک 60 روچی جنگ بندی ءِ وھد ءَ تفصیلی گپ ءُ تران کن اَنت۔ اے گپ ءُ تران ءِ تہ ءَ ایران ءِ جوہری پروگرام ءِ آیوکیں وھد ءِ جیڑھ ءُ ھمے رنگ ءَ ایران ءِ سر ءَ امریکی پابندیاں ھلاس کنگ ءِ جیڑھ ھم ھوار کنگ بیت۔ البت لبنان ءِ جیڑہ مزنیں ٹھوکر ءِ دروشم ءَ ثابت بوت کنت۔ لبنان ءِ بابت ءَ ھرچ وڑیں ڈیل ءِ سوبمندی ءِ ھساب ءَ اے گپ ءِ سر ءَ بندوک بیت کہ آیا امریکہ اسرائیل ءَ را وتی فوجی کارروائیانی محدود کنگ یا ھلاس کنگ ءِ سر ءَ دلجم کنت ءُ آیا ایران حزب اللہ ءَ را وتی تحمل ءِ درشان کنگ ءِ سر ءَ دلجم کنت یا نہ کنت۔