مزن وزیر شہباز شریف ءَ گوں امریکی صدر ءِ عرب ءُ افریقہ ءِ کارانی سینئر ایڈوائزر  مسعد  بولوس ءَ گند ءُ نند

انطالیہ۔17اپریل  (اے پی پی): مزن وزیر محمد شہباز شریف ءَ امریکی صدر ءِ عرب ءُ افریقی کارانی سینئر ایڈوائزر مسعد  بولوس ءَ گوں گند ءُ نند کت۔ جمعہ ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ اے گند ءُ نند انطالیہ ءَ برجم داشتگیں 5می انطالیہ سفارتکاری فورم ءِ ساھت ءَ بوتگ۔ گند ءُ نند ءِ ساھت ءَ مزن وزیر ءَ امریکی صدر ڈونلڈ ٹرمپ ءِ واستہ نیکیں واھگ آنی درشان کت ءُ آئی ءِ گوما وتی وشیں ءُ دوستی ءِ گند ءُ نند ءِ یات کت۔ آئی ءَ صدر ٹرمپ ءِ دلیری ءُ فیصلہ کنوکیں سروکی ءِ توسیپ کت کہ ایشی ءِ آسر ءَ گوستگیں سال ءَ پاکستان ءُ بھارت ءِ نیام ءَ جنگ بندی بوتگ وھدے کہ جاور ھال جنگ ءِ کش ءَ سر بوتگ اَنت۔ مزن وزیر ءَ لبنان ءَ جنگ بندی ءِ سوبمندیں آسر ءِ تہ ءَ صدر ٹرمپ ءِ سروکی ءَ را ھم ساڑات۔ دوئیں رہشوناں دمگی جاور ھال آنی سر ءَ گپ ءُ تران کت، ایشی ءِ تہ ءَ پاکستان ءِ امن ءِ کوشست، جنگ بندی ءُ راجدپتری اسلام آباد ءِ گپ ءُ تران ھوار اَنت۔ مزن وزیر ءَ پاکستان ءُ امریکہ ءِ نیام ءَ دو نیمگی سیادی ءَ را گیش مھکم کنگ ءِ ارزشت ءِ سر ءَ زور پر دات ھاسیں رنگ ءَ اقتصادی ءُ تجارتی کمک ءُ کثیر نیمگی سفارتکاری ءِ تہ ءَ وت مہ وتی دلچسپی ءِ جیڈھ آنی سر ءَ۔ مسعد  بولوس ءَ مزن وزیر ءَ را صدر ڈونلڈ ٹرمپ ءِ نیکیں واھگ آناں سر کت ءُ خطہ ءَ استحکام ءِ دیمروئی ءِ واستہ پاکستان ءِ جوانیں کرد ءَ را ساڑات۔ آئی ءَ ناشرکاری ءِ ھلاپ ءَ جنگ، اقتصادی دیمروئی ءُ جھان ءِ چیلنج آنی گیواری ءَ ھوار یکجائی اولویت آنی سر ءَ پاکستان ءِ گوما کمک ءَ را گیش گیش کنگ ءِ واستہ امریکہ ءِ واھشت ءِ پدا زور دات۔