ایران ءُ امریکہ ءِ نیام ءَ کش ءُ چیل ءِ کم کنگ ءِ ھاترا فیلڈ مارشل ءُ مزن وزیر ءِ کوشست ستا کرز اَنت، وفاقی وزیر پبلک افیئرز یونٹ

اسلام آباد۔17اپریل (اے پی پی): وفاقی وزیر پبلک افیئرز یونٹ رانا مبشر اقبال ءَ فیلڈ مارشل سید عاصم منیر ءُ مزن وزیر شہباز شریف ءِ توسیپ کتگ کہ آہاں جہانی دلگوشی ءُ بھروسہ زرتگ، آہانی سروکی ءِ سرا دل یکیمی ءِ درشانی کتگ ءُ ایران ءُ امریکہ ءِ گپ ءُ تران ءِ برجاہ دارگ ءِ امیت ءِ درشانی کتگ کہ آہانی منطقی آسر ءَ بہ بیت۔ جمعہ ءِ روچ ءَ ’پی ٹی وی نیوز‘ ءَ گوں تران کنان ءَ آئی ءَ گوشت کہ دگنیا سکیں بے تاھیری ءُ گیش بوھوکیں کشاں چیل ءِ آماچ اِنت کہ ایشی ءِ دور رسیں اثرات بوھگ ءَ اَنت، بلے اے وڑیں نازرکیں جاور آنی تہ ءَ پاکستان ءِ سروکی ءِ کرد ناقابل فراموش بوتگ، ھاسیں رنگ ءَ مزنیں کشاں چیل ءِ گیش بوھگ ءِ گر ءُ دار ءِ کوشست ءُ کشاں چیل ءِ دیم ءَ دارگ ءِ جہد کنگ بوتگ۔ آئی ءَ گوشت کہ اے وڑیں بے وسی ءُ حساسیں چاگرد ءَ جنگ ءِ گر ءُ دار ءُ کش ءُ چیل ءِ کم کنگ پاکستان ءِ سروکی ءِ مزنیں سوبمندی اِنت ءُ ملک ءَ یک المی ئیں وھد ءَ زمہ وار ءُ جوڑیشت ءِ سفارتکاری ءِ درشان کتگ وھدے کہ جھان ءِ کش ءُ چیل وتی عروج ءَ بوتگ اَنت۔ آئی ءَ سعودی عرب، قطر، چین، ترکی ءُ ایندگر اسلامی ملک آنی کرد ءِ ھم ساڑات کت کہ آھاں پاکستان ءِ سروکی ءِ سر ءَ دل یکیمی ءِ درشانی کت ءُ گوشت کہ پاکستان جھان ءِ سفارتی تک ءَ یک ھاسیں مرکز ءِ رنگ ءَ ابھر بوتگ ایشیا ءُ ایندگر دمگ آنی ملک استحکام ءِ برجائی ءِ واستہ آئی ءِ کرد ءِ نیمگ ءَ چارگ ءَ اَنت۔ مزن وزیر شہباز شریف ءِ گوستگیں روچاں سعودی عرب ءُ قطر ءِ تر ءُ تاب ءِ حوالہ ءَ آئی ءَ گوشت کہ اے سیادی پاکستان ءِ گیش بوھوکیں سفارتی چست ءُ ایر ءُ میاں اوستمانی ساکھ ءِ گہتری ءِ درشان انت ءُ دگنیا پاکستان ءَ را یک زمہ وار ءُ بھروسہ مندیں شریک ءِ رنگ ءَ منگ ءَ انت۔ آئی ءَ امیت سہرا کت کہ امریکہ ءُ ایران مُجام گپ ءُ تران ءِ وسیلگ ءَ جوانیں آسر آنی نیمگ ءَ جنزان بنت ءُ دائمی امن ءِ واستہ سفارتکاری یکیں موثریں راہ اِنت۔ وفاقی وزیر ءَ خطہ ءِ تہا استحکام ءِ دعا کت ءُ اللہ تعالیٰ ءِ شگر ءُ منت گپت ءُ گوشت کہ راج ءَ را امیت انت کہ دیم ءَ جوانیں روچ انت ءُ برجاھیں سفارتی کوشست ءُ گوستگیں تر ءُ تاب آنی سبب ءَ دلبڈی ءُ جوانیں آسراتی رس ایت۔