مزن وزیر شہباز شریف ءُ گتر ءِ امیر شیخ تمیم بن حمد الثانی ءَ گند ءُ نند کتگ، دمگی ءُ جھان ءِ دیمروئی ءِ بابت ءَ گوں سرجمیں ءَ گپ ءُ تران

دوحہ۔16اپریل  (اے پی پی): مزن وزیر محمد شہباز شریف ءَ گتر ءُ خلیج ءِ ایندگر ملک آنی سر ءَ اُرش آنی مذمت کتگ ءُ گتر ءِ سروکی ءُ الس ءَ را پاکستان ءِ سرجمیں یکوئی ءُ کمک ءِ دل یکیمی داتگ وھدیکہ گتر ءِ امیر شیخ تمیم بن حمد الثانی ءَ سفارتکاری ءِ دمگ ءَ را کم کنگ ءِ تہ ءَ پاکستان ءِ کلیدی کرد ءِ ستا کرتگ۔ پنچ شمبے ءِ روچ ءَ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر محمد شہباز شریف ءُ گتر ءِ امیر شیخ تمیم بن حمد الثانی ءِ نیام ءَ سکیں دوستی ءُ وشیں چاگرد ءَ گند ءُ نند بوتگ۔ امیری دیوان ءَ برجم داشتگیں دیوان یک کلاک ءَ چہ گیش برجاہ بوت۔ دوئیں رہشون آں انوگیں دمگی ءُ جھان ءِ دیمروئی ءِ بابت ءَ ھاسیں رنگ ءَ میاں اوستمانی تک ءِ جاور ھال آنی سر ءَ سرجمیں رنگ ءَ گپ ءُ تران کت۔ امیر گتر ءَ پاکستان ءِ مزن وزیر ءُ آئی ءِ ڈل ءَ را وش اتک کت ءُ خطہ ءِ تہا کش ءُ چیل ءِ کم کنگ ءُ سفارتی گپ ءُ تران ءِ دیمروئی ءِ واستہ پاکستان ءِ کلیدی کرد ءَ را ساڑات کہ اے خطہ ءِ ایمنی ءُ برجائی ءِ واستہ المی انت۔ مزن وزیر ءَ گتر ءُ خلیج ءِ ایندگر ملک آنی سر ءَ اُرش آنی مذمت ءِ یک رندے پدا گوشت ءُ گتر ءِ سروکی ءُ الس ءَ را پاکستان ءِ سرجمیں یکوئی ءُ کمک ءِ دل یکیمی دات۔ دوئیں رہشون آں دمگ ءَ امن ءُ ایمنی ءِ ھاترا ھاسیں رنگ ءَ توان ءِ سپلائی چین ءِ تسلسل ءَ را برجائی ءِ واستہ تناؤ ءِ کم کنگ ءُ میاں اوستمانی ھمگرنچی ءِ دیمروئی ءِ ھاترا کوشست آناں کمک کنگ ءِ ارزشت ءِ سر ءَ زور پر دات۔ دوئیں رہشوناں دو نیمگی سیادی آنی سر ءَ ھم چار ءُ تپاسی کت ءُ ایشی ءَ را گیش گیش کنگ ءِ راہ آنی سر ءَ ھیال ءُ لیکہ کت ھاسیں رنگ ءَ سیکورٹی، دفاع ءُ توانائی ءِ شوبگ آنی تہ ءَ کمک ءَ را گیش کنگ ءِ سر ءَ تپاک کت تانکہ شریکداری ءَ را مھکم کنگ ءُ وت مہ وتی کمک ءِ واستہ نوکیں موہ پیداک کنگ بہ بنت۔ گند ءُ نند ءَ گتر ءِ مزن وزیر ءُ درئی کارانی وزیر شیخ محمد بن عبدالرحمن بن جاسم الثانی، امیری دیوان ءِ سروک عبداللہ بن محمد الخلیفی ءُ اے دگہ مزنیں کارندہ آں بہر زرتگ۔ پاکستانی ڈل ءِ تہ ءَ نائب مزن وزیر ءُ دری کارانی وزیر سینیٹر محمد اسحاق ڈار، وفاقی وزیر ءِ اھوالکاری عطا اللہ تارڑ، مزن وزیر ءِ ھاسیں کمکار سید طارق فاطمی ءُ اے دگہ مزنیں کارندہ ھوار اَنت۔ امیر گتر ءُ مزن وزیر محمد شہباز شریف ءِ نیام ءَ یک پہ یک ءَ گند ءُ نند ھم برجم دارگ بوت، ایشی ءِ تہ ءَ وت مہ وتی دلچسپی ءِ جیڈھ ءُ استیں جاور ھال آنی سر ءَ گپ ءُ تران کنگ بوت ءُ دوئیں ملک آنی نیام ءَ برجاھیں رابطہ ءُ شور ءُ سلاھ ءِ ارزشت ءِ سر ءَ زور پر دیگ بوت۔ گند ءُ نند ءَ پد گتر ءِ امیر ءَ مزن وزیر ءُ آئی ءِ ڈل ءِ شرپ ءَ نان ءِ ورگ ءِ ھم میزبانی کت۔