مزن وزیر شہباز شریف ءَ سعودی ولی عہد محمد بن سلمان ءِ گوما دو کلاک ءِ گند ءُ نند کت، دمگی پیداکیں جاور ھال آنی سر ءَ سرجمیں رنگ ءَ گپ ءُ تران کت، امن ءِ واستہ پاکستان ءِ کوشست آنی سر ءَ دل یکیمی کت

جدہ۔16اپریل  (اے پی پی): مزن وزیر محمد شہباز شریف ءَ سعودی ولی عہد ءُ مزن وزیر سعودی شہزادہ محمد بن سلمان ءِ امن ءِ ھاتر ءَ کوشست آنی سر ءَ بھروسہ کنگ ءِ وھد ءَ سعودی عرب ءِ اقتصادی استحکام ءِ ھاتر ءَ برجاھیں کمک ءِ توسیپ کنان ءَ گوشت کہ پاکستان ءُ سعودی عرب ءِ نیام ءَ یک جتائیں سیادی است انت، دوئیں ملک آنی چیر دستی ءَ یک دفاعی شریک انت۔ ولی عہد محمد بن سلمان ءَ امن گپ ءُ تران ءِ تہا مزن وزیر شہباز شریف ءُ فیلڈ مارشل سید عاصم منیر ءِ جوڑیشت ءِ کرد ءَ را ساڑات۔ مزن وزیر محمد شہباز شریف ءُ سعودی ولی عہد ءُ مزن وزیر شہزادہ محمد بن سلمان بن عبدالعزیز السعود ءِ گوما گند ءُ نند ءَ نائب مزن وزیر ءُ درئی کارانی وزیر سینیٹر محمد اسحاق دار ھم ساڑی ات۔ مزن وزیر کارگس ءِ میڈیا ونگ ءِ نیمگ ءَ چہ جاڑی بوتگیں بیان ءِ رد ءَ نزیک ءَ دو کلاک ءَ برجاہ بوتگیں گند ءُ نند ءِ ساھت ءَ دوئیں رہشون آنی تہ ءَ پیداکیں دمگی جاور ھال آنی سر ءَ سرجمیں رنگ ءَ گپ ءُ تران کنگ بوتگ۔ مزن وزیر ءَ گوستگیں دمگی جیڈھ آنی درگت ءَ سعودی عرب ءِ بادشاہی ءِ واستہ پاکستان ءِ سرجمیں یکوئی ءُ کمک ءِ درشان کت۔ آئی ءَ گران بھائیں جانانی بیرانی ءِ سر ءَ سک دلپدردی ءِ درشانی کت ءُ گوشت کہ پاکستانی اُلس وتی سعودی برات آنی گوما شانک ماں شانک ءَ اوشتاتگ۔ مزن وزیر ءَ ولی عہد ءِ سروکی ءَ سعودی عرب ءِ نیمگ ءَ پیش داشتگیں مثالی صبر ءُ تحمل ءَ را ساڑات کہ اے استیں بحران ءِ تہ ءَ سعودی عرب ءُ ایشی ءَ چہ دریں امن دوستیں درستیں مردم آنی واستہ مھکم ءِ وسیلگ اِنت۔ مزن وزیر ءَ سعودی ولی عہد ءَ را پاکستان ءِ امن کوشست آنی تہ ءَ انوگیں دیمروئی ءِ بابت ءَ سرپد کت کہ ایشی ءِ سبب ءَ امریکہ ءُ ایران ءِ نیام ءَ جنگ بندی ءُ اسلام آباد ءَ امریکہ ءُ ایران ءِ نیام ءَ گوستگیں راجدپتری راؤنڈ ءِ گپ ءُ تران بوتگ۔ سعودی ولی عہد محمد بن سلمان ءَ اے امن کار ءِ تہا مزن وزیر شہباز شریف ءُ فیلڈ مارشل سید عاصم منیر ءِ جوڑیشت ءِ کرد ءَ را ساڑات۔ دو نیمگی جیڈھ آنی سر ءَ تران کنان ءَ مزن وزیر ءَ پاکستان ءِ اقتصادی برجائی ءِ واستہ بادشاہی سعودی عرب ءِ برجاھیں کمک ءِ واستہ سعودی ولی عہد ءِ دل ءِ جہلانکی ءَ چہ ستا ءِ درشان کت۔ مزن وزیر ءَ گوشت کہ پاکستان ءُ مملکت  ءِ نیام ءَ یکپارگیں سیادی است انت چیاکہ پاکستان ءِ سعودی عرب ءِ اسٹریٹجک وت مہ وتی دفاعی معاہدے ءِ رد ءَ دوئیں ملک اسٹریٹجک دفاعی شریک انت۔ دوئیں رہشوناں یکے دومی ءِ مفاد ءِ جیڈھ آنی سر ءَ نزیکیں کمک ءَ را برجاہ دارگ ءِ وتی یکجائی جزم ءِ درشانی کت۔