سعودی عرب ءِ مالیاتی پیکج ءَ چہ ملک ءِ معیشت ءِ سر ءَ جھان ءِ بھروسہ گیش مھکم بیت، پاکستان بزنس فورم

اسلام آباد۔15اپریل  (اے پی پی): پاکستان بزنس فورم ءَ سعودی عرب ءِ نیمگ ءَ 3ارب ڈالر ءِ نوکیں ڈپازٹ ءِ پجارینگ ءِ جار ءَ را وش اتک کتگ ءُ اے جار ءَ را ملک ءِ اقتصادی رھبند ءُ گہتری کار ءِ ایجنڈا ءِ سر ءَ نوکیں جھان ءِ بھروسہ ءِ مھکمیں سگنل لیک اتگ۔ ’’اے پی پی‘‘ ءَ گوں ھاسیں رنگ ءَ تران کنان ءَ چیف آرگنائزر پاکستان بزنس فورم چوہدری احمد جواد ءَ گوشت کہ سعودی عرب ءِ نیمگ ءَ چہ وھد ءِ سر ءَ مالی کمک دوئیں ملک آنی نیام ءَ گہتریں دو نیمگی سیادی ءُ پاکستان ءِ اقتصادی حکمت عملی ءِ سر ءَ گیش بوھوکیں بھروسہ ءِ درشان اِنت۔ آئی ءَ گوشت کہ کسانیں مدتی ءِ تجدید ءَ چہ دراجیں مدتی ڈپازٹ فریم ورک ءِ تہ ءَ پیشرفت سک دلبڈی ءِ گپ اِنت، ایشی ءَ چہ مالیاتی پیش گوئی ءَ را گہتر کنگ ءُ درائیں چیلنج آناں کم کنگ بیت۔ آئی ءَ گیش گوشت کہ اے وڑیں گامگیج نہ ایوک ءَ درملکی زرّ ءِ ذخیرہ ءِ برجائی ءَ کمک کن اَنت بلکیں جھان ءِ سرمایہ کار ءُ کثیر جہتی ادارگ آناں جوانیں پیغام ھم دیم ءَ برگ بیت۔ چوہدری احمد جواد ءَ گوشت کہ اے دیمروئی ءَ چہ پاکستان ءِ وت واجہ مالیاتی ساکھ ءَ را گہتر کنگ ءِ امکان اِنت ءُ پالیشی ءِ تسلسل ءِ واستہ گنجائش جوڑ کنگ بیت کہ اے پائیدار اقتصادی دیمروئی ءِ واستہ المی اِنت۔ پاکستان بزنس فورم ءِ سینئر نائب صدر آمنہ منور اعوان ءَ ھم اے جار ءِ وش اتک کنان ءَ ایشی ءِ گیشیں اقتصادی آسر آناں پدر کنان ءَ گوشت کہ سعودی عرب ءِ نیمگ ءَ چہ گیشیں کمک ایوک ءَ مالی کمک نہ اِنت بلکیں پاکستان ءِ اقتصادی گہتری کار آنی اسٹریٹجک توثیق اِنت، ایشی ءَ چہ ادائیگی ءِ توازن ءِ سر ءَ دباؤ کم بیت ءُ صنعتی تبادلہ ءِ اثرات ءَ را مھکم کنت۔ آئی ءَ گیش گوشت کہ درملکی زرّ ءِ ذخائر ءِ گہتری ءَ چہ وھد ءِ گوزگ ءَ گوں افراط زر ءِ دباؤ کم بوت کنت پرچا کہ ایشی ءَ چہ درآمد ءِ ھرچ ءُ درچ ءَ را مھکم کنگ ءُ پاکستانی کلدار ءِ کمک رس ایت۔ پاکستان بزنس فورم ءِ چیئرمین پنجاب ملک طلعت سہیل ءَ اے دیمروئی ءَ را یک مزنیں دمگی اقتصادی یکجاھی ءِ بھر لیک اِتگ ءُ گوشت کہ پاکستان ءِ اسٹریٹجک شریک اقتصادی بحالی ءِ پڑ ءَ را مھکم کنگ ءِ تہ ءَ مزنیں کرد پیلو کنگ ءَ اَنت۔ آئی ءَ زور پر دات کہ درائیں کمک ءِ گوما اندری ڈھانچہ ءِ گہتری کار ھم ھوار انت ایشی ءِ تہ ءَ کاروبار دوست ءُ مقابلہ ءِ ٹیکس ءِ نظام ءِ جوڑ کنگ ھوار انت۔ آئی ءَ گیش گوشت کہ میاں اوستمانی براتی ءَ ھم گوستگیں وھد آنی تہ ءَ پاکستان ءِ سفارتی ءُ آسراتی ءِ کرد ءِ ستا کرتگ ھاسیں رنگ ءَ ھما گل آنی نیام ءَ گپ ءُ تران ءِ دیمروئی ءِ تہ ءَ کہ آ دہائی آنی تہ ءَ چہ دیم پہ دیمیں رابطہ ءَ چہ کٹگ بوتگ اَنت ءُ آھاں گپ ءُ تران ءِ میز ءِ سر ءَ  نندارینگ  ءَ را ساڑات۔