مزن وزیر شہباز شریف ءَ ایف بی آر ءِ معاملہ آنی بابت ءَ ھمک ھپتگی  چار ءُ تپاسی دیوان ءَ گوں گشتانک

اسلام آباد۔15اپریل  (اے پی پی): مزن وزیر محمد شہباز شریف ءَ 2017ءَ چہ 2022ءِ ساھت ءَ اوور انوائسنگ ءِ زھرناکیں کاروبار ءَ ھواریں درستیں مردمانی حلاف ءَ قانونی کارروائی ترند کنگ ءِ ہدایت کتگ ءُ سیادی داروکیں ادارگ آنی برجاھیں لاپروائی ءِ سر ءَ زھر ءُ زاری ءِ درشانی کتگ۔ چار شمبے ءِ روچ ءَ مزن وزیر محمد شہباز شریف ءِ سروکی ءَ ایف بی آر ءِ کارانی ھوالگ ءَ ھپتگی جائزہ دیوان برجم دارگ بوت ایشی ءِ تہ ءَ اوور انوائسنگ ءِ ھوالگ ءَ جوڑ بوتگیں کمیٹی ءِ رپوٹ پیش کنگ بوت۔ مزن وزیر کارگس ءِ میڈیا ونگ ءِ نیمگ ءَ چہ جاڑی بوتگیں بیان ءِ رد ءَ دیوان ءَ وفاقی وزیر  مصدق مسعود ملک،  احد خان چیمہ، عطاء اللہ تارڑ،  اٹارنی جنرل منصور عثمان اعوان،  وزیر مملکت برائے خزانہ بلال اظہر کیانی، چیئرمین ایف بی آر  آفیشل ءُ سینئر گورنمنٹ ءَ بہر زرتگ۔ مزن وزیر ءَ دیوان ءَ گوں گشتانک دیان ءَ گوشت کہ اوور انوائسنگ ءِ زھرناکیں کاروبار 2017ءَ چہ 2022ءَ برجاہ بوتگ ءُ سیادی داروکیں ادارگ وتی زمہ واری آنی تہ ءَ مدام لاپرواہی کنگ ءَ اَنت۔ آئی ءَ ہدایت کت کہ اے کاروبار ءَ ہواریں درستیں مردمانی حلاف ءَ گوں ترندی ءَ قانونی کارروائی کنگ بہ بیت۔ مزن وزیر ءَ مشتاق احمد سکھیرہ ءِ سروکی ءَ جوڑ بوتگیں کمیٹی ءِ رپوٹ ءِ توسیپ کنان ءَ ہدایت کت کہ لاپرواہی ءِ ملزم آنی پجار کنگ ءُ آہانی حلاف ءَ محکمہ جاتی کارروائی کنگ بہ بیت۔ آئی ءَ گوشت کہ ٹیکس ءِ زر راج ءِ امانت انت ایشی ءِ رکھینگ مئے فرض انت ءُ ھمک کلدار ءِ حساب دیگ مئے ذمہ واری انت ۔ آیوکیں وھد ءَ اے وڑیں واکیہ آنی گر ءُ دار ءِ واستہ یک سرجمیں حکمت عملی ءِ جوڑ کنگ ءِ ھم ہدایت کتگ۔ آئی ءَ مالیاتی نگرانی یونٹ ءَ را یک فعالیں ادارگ جوڑ کنگ ءُ ایشی ءِ تہ ءَ ایف آئی اے ءُ انٹیلی جنس بیورو ءِ نمائندگ آناں ھوار کنگ ءِ ھم ہدایت کتگ۔ مزن وزیر ءَ را بریفنگ ءِ تہ ءَ گوشت بوت کہ ایف بی آر ءَ یک مرکزی پرائس ویریفیکیشن پورٹل جوڑ کتگ، ایشی ءَ را جون ءِ گڈ ءَ تاں بینک آنی گوما ھمگرنچ کنگ بیت۔ مزن وزیر ءَ را گوشگ بوت کہ رپورٹ ءِ رد ءَ ایف بی آر ءِ پوسٹ کلیئرنگ آڈٹ ونگ ءَ اے اوور انوائسنگ اسکیم ءِ پجار اکتوبر 2022 ءَ کتگ ات۔اے وھد ءِ تہ ءَ ملزم آنی حلاف ءَ 13 ایف آئی آر درج کنگ بوتگ ءُ کانودی کارروائی کنگ بوھگ ءَ انت۔