بلوچستان ءِ سر وزیر ءَ گوشت کہ جان سلامتی ءِ پڑ ءَ گہتری کار ءُ نوکیں نظام ءِ نفاذ ءِ واستہ نجی شعبہ ءِ گوما موثر شراکت داری ءِ دیمروئی وھد ءِ لوٹ انت

کوئٹہ۔ 15 اپریل (اے پی پی): بلوچستان ءِ سر وزیر میر سرفراز بگٹی ءِ سروکی ءَ کوئٹہ ءِ سر وزیر سیکرٹریٹ ءَ چار شمبے ءِ روچ ءَ صوبائی حکومت ءُ آریا انسٹی ٹیوٹ آف میڈیکل سائنسز ءِ نیام ءَ وت مہ وتی کمک ءَ را دیمروئی دیگ ءِ ھوالگ ءَ ھاسیں گند ءُ نند بوت۔ گند ءُ نند ءَ جان سلامتی ءِ شوبگ ءَ سرکاری ءُ نجی شراکت داری ءَ را دیم ءَ برگ ، کوئٹہ ءَ ہوار بلوچستان ءِ الس آناں وھد ءِ سر ءَ کوالٹی ءُ نوکیں دوا ءُ درمان ءِ آسراتی پجاری ، ایمرجنسی سروسز ءِ گہتری ، کینسر ءُ ایندگہ وبائی نادراھیانی علاج ءِ دستیابی ءُ دوا ءُ درمان ءِ دائرہ کار ءِ تہ ءَ گیشی ءِ ھوالگ ءَ جیڈھ آنی سر ءَ سرجمی ءَ گپ ءُ تران کنگ بوت ۔ گند ءُ نند ءَ اے گپ ءِ سر ءَ تپاک کنگ بوت کہ بلوچستان ءَ سرکاری جان سلامتی ءِ نظام ءَ را گیش کارآمد جوڑ کنگ ءِ واستہ پرائیویٹ سیکٹر ءِ مہارت ، وسیلگ ءُ نوکیں میڈیکل ٹیکنالوجی ءَ سرجمی ءَ کارمرد کنگ بیت۔ اے درگت ءَ آریا انسٹی ٹیوٹ آف میڈیکل سائنسز ءِ گوما ممکنہ تعاون ءِ جتا جتائیں تک ءُ پہنات آنی سر ءَ چار ءُ تپاسی کنگ بوت، ایشی ءِ وسیلگ ءَ ہسپتال آنی گنجائش ءَ را گیش کنگ، تشخیص ءُ علاج ءِ آسراتی ءَ را گہتر کنگ، نوکیں طبی آسراتی ءِ پجارینگ ءُ پیچیدہ نادراہی ھاسیں رنگ ءَ کینسر ءِ علاج ءَ را بنجاہی تک ءَ دل یکیمی کنگ بیت۔ بنجاھی وزیر بلوچستان میر سرفراز بگٹی ءَ دیوان ءَ گوں گشتانک دیان ءَ گوشت کہ صوبائی حکومت کوالٹی پرائیویٹ میڈیکل ادارگ آناں ازمت ءِ گرگ ءَ چہ الس آناں شریں ءُ جوانیں دوا ءُ درمان ءِ آسراتی پجاری ءِ واستہ جزمیگ انت۔ آئی ءَ گوشت کہ کینسر ءُ ایندگر وبائی نادراھی آنی کوالٹی ءِ علاج صوبگ ءِ اندر ءَ ممکن جوڑ کنگ بیت تانکہ نادراھ آناں دگہ شھر آنی تہ ءَ روگ ءِ ھژدری مہ بیت۔ آئی ءَ گوشت کہ جان سلامتی ءِ شوبگ ءَ گہتری کار، نوکیں نظام آنی سر ءَ عمل درآمد ءُ برجمیں دیمروئی ءِ واستہ جندی شوبگ ءِ گوما جوانیں شریکداری ءَ را دیمروئی دیگ وھد ءِ ضلورت اِنت۔ اے درگت ءَ انچیں منصوبگ آناں اولیت دیگ بیت کہ ایشانی تہ ءَ ترندی آسر بہ بیت ءُ الس ءَ را براہ راست ریلیف رس ایت۔ بنجاھی وزیر ءَ طبی وانگ ءُ زانگ ءُ پٹ ءُ پول ءِ دیمروئی ءِ سر ءَ ھاسیں زور پر دیان ءَ ہدایت کت کہ ہنرمندیں مردمی قوت ءِ دیمروئی ءِ واستہ اے شوبگ ءَ سرمایہ کاری ءَ را گیش کنگ بہ بیت تانکہ صوبگ ءَ جان سلامتی ءِ نظام ءَ را دراجیں مدت ءِ بنیات ءَ مھکم کنگ بہ بیت۔ دیوان ءَ اے گپ ءِ سر ءَ ھم زور پر دات کہ پیش کرتگیں شریکداری ءِ چیر دستی ءَ اے وڑیں عملی ءُ ممکنیں منصوبگ تیار کنگ بہ بنت کہ ایشی ءَ چہ نہ ایوک ءَ کسانیں مدت ءَ آسر رس ایت بلکینگ ءَ دراجیں مدت ءِ بنیات ءَ جان سلامتی ءِ شوبگ ءَ گہتری ءِ سبب جوڑ بہ بنت۔ گند ءُ نند ءَ صوبائی وزیر صحت بخت محمد کاکڑ، چیف سیکرٹری بلوچستان شکیل قادر خان، پرنسپل سیکرٹری عمران زرکون، سیکرٹری صحت مجیب الرحمٰن پانیزئی، ڈائریکٹر جنرل ہیلتھ سروسز ڈاکٹر امین خان مندوخیل، آریا انسٹی ٹیوٹ آف میڈیکل سائنسز  ءِ  چیف ایگزیکٹو آفیسر ڈاکٹر سہیل خان   ھم ساڑی اَت۔