سی پیک ءَ پاکستان ءَ روزگار ءِ موہ پیداک کتگ انت، اے منصوبگ دمگی دیمروئی ءِ ھاتر ءَ یک ھاسیں سنگ میل ءِ انت، قیصر احمد شیخ

اسلام آباد۔15اپریل  (اے پی پی): وفاقی وزیر سرمایہ کاری بورڈ قیصر احمد شیخ ءَ گوشت کہ سی پیک ءِ چیر دستی ءَ پاکستان ءَ روزگار ءِ موہ پیداک بوتگ انت ءُ اے منصوبگ دمگی دیمروئی ءِ واستہ یک ھاسیں سنگ ءِ انت۔ اے ھیالانی درشانی آئی ءَ انسٹی ٹیوٹ آف ریجنل اسٹڈیز ءِ نیمگ ءَ برجم داشتگیں پالیسی ڈائیلاگ ءُ رپورٹ لانچ ءِ مراگش ءَ ھاسیں مہمان ءِ بستار ءَ گشتانک دیان ءَ کت۔ مراگش ءَ چینی سفارت خانہ ءِ ماموریت ءِ نائب سروک شی یوآن چنگ ءَ ھم بھر زوری کتگ۔ اے موہ ءِ سر ءَ سی پیک ءِ آیوکیں بھر ءَ گہتری، موثر پالیسی سازی ءُ پراجیکٹ آنی تہ ءَ ترندی ءِ ھوالگ ءَ ھاسیں جیڈھ آنی سر ءَ ھیال ریچی کنگ بوت۔ وفاقی وزیر قیصر احمد شیخ ءَ گوشت کہ پاکستان چین ءِ دیمروئی ءَ چہ دربرگ ءَ اِنت، اودا وانگ ءُ زانگ ءِ گوما تکنیکی مہارت آنی دیمروئی ءِ سر ءَ ھاسیں دلگوشی دیگ بوتگ۔ آئی ءَ گوشت کہ حکومت گریبی ءِ ھلاسی ءِ واستہ بازیں گامگیج کنگ ءَ انت، چین ءَ اے درگت ءَ مثالی منصوبگ بندات کتگ کہ ایشی ءَ چہ کارآمد کنگ ءِ ضلورت انت۔ قیصر احمد شیخ ءَ گوشت کہ سی پیک ءِ چیر دستی ءَ پاکستان ءَ روزگار ءِ موہ پیداک بوتگ انت، دمگی دیمروئی ءِ واستہ اے منصوبگ ھاسیں سنگ انت۔ آئی ءَ گوشت کہ سی پیک نہ ایوک ءَ انفراسٹرکچر ءِ دیمروئی ءِ منصوبگ اِنت بلکینگ ءَ یک ٹوھیں دمگی دیمروئی ءِ گامگیج اِنت ایشی ءِ وسیلگ ءَ صنعتی، تجارت ءُ توان ءِ شوبگ ءَ مزنیں پیشرفت بوھگ ءَ اِنت۔ آئی ءَ گوشت کہ اے منصوبگ ءَ چہ جتاجتائیں شوبگ آنی تہ ءَ سرمایہ کاری ءِ واستہ دروازگ پچ بوتگ انت ءُ ورنا آنی واستہ روزگار ءِ نوکیں موہ پیداک بوتگ انت۔ وفاقی وزیر ءَ گوشت کہ سی پیک ءِ آیوکیں بھر ءَ حکومت صنعتی کمک، ٹیکنالوجی ءِ ٹرانسفر ءُ ھاسیں اقتصادی زون آنی جوڑ کنگ ءِ سر ءَ ھاسیں دلگوشی دیگ ءَ انت تانکہ دیمروئی ءِ میوہ آناں گیش پراھی کنگ بہ بیت۔ آئی ءَ اے عزم ءِ یک رندے پدا گوشت کہ پاکستان نہ ایوک ءَ سی پیک ءِ وسیلگ ءَ وتی معیشت ءَ را مھکم کنت بلکیں دمگ ءَ تجارتی رابطہ ءُ وشھالی ءَ را ھم دیم ءَ برگ ءَ انت۔