وفاقی وزیر برائے تجارت ءَ اٹلی   ءُ  ڈنمارک  سفیراں گوں گند ءُ نند کتگ، دو نیمگی تجارت، سرمایہ کاری ءُ اقتصادی کمک ءِ دیمروئی ءِ بابت ءَ گپ ءُ تران

اسلام آباد۔15اپریل  (اے پی پی): وفاقی وزیر برائے تجارت جام کمال خان ءَ گوں اٹلی  سفیر مارلینا آرمَلین  ءُ  ڈنمارک ءِ سفیر ماجا مورٹینسن  ءَ گند ءُ نند کت ایشی ءِ تہ ءَ دو نیمگی تجارت، سرمایہ کاری ءُ اقتصادی کمک ءِ دیمروئی ءِ ھوالگ ءَ گپ ءُ تران بوت۔ وزیر تجارت ءَ یک ذمہ واریں گلوبل پارٹنر ءِ بستار ءَ پاکستان ءِ کرد ءَ را پدر کنان ءَ گوشت کہ مئے ملک خطہ ءِ تہ ءَ کش ءُ چیل ءِ وھد ءَ گپ ءُ تران ءُ ڈی اسکالیشن ءِ تہ ءَ سرگرمیں کرد پیلو کنگ ءَ اِنت۔ آئی ءَ گوشت کہ گوستگیں جھان ءِ جاور ھال ھاسیں رنگ ءَ آبنائے ہرمز ءِ وڑیں ھاسیں دریائی راہ آنی تہ ءَ رکاوٹ آنی سبب ءَ جھان ءِ سپلائی چین ءَ را تاوان رستگ ایشی ءِ آسر ءَ توان، وردن، دوائی ءُ صنعتی خام مال ءِ سپلائی ءِ تہ ءَ رکاوٹ بوتگ۔ جام کمال خان ءَ گوشت کہ پاکستان ءِ 250ملین ءَ چہ گیش آبادی، قدرتی وسیلگ ءُ جغرافیائی ارزشت آئی ءَ را مزنیں اقتصادی طاقت جوڑ بوھگ ءِ گنجائش ءَ دنت۔ آئی ءَ گوشت کہ فی کس آمدنی ءِ تہ ءَ گہتری ءِ گوما پاکستان یک ھاسیں درآمد ءُ صارف مارکیٹ ءِ رنگ ءَ دیم ءَ اتک کنت، ایشی ءَ چہ درملکی سرمایہ کار آنی واستہ مزنیں موہ پیداک بنت۔ اطالوی ءُ ڈینش سفیراں ھم اے امکانات من اِتگ ءُ جتا جتائیں شوبگ آنی تہ ءَ کمک ءَ را گیش کنگ ءِ واھشت ءِ درشانی کتگ۔ گند ءُ نند ءَ راجی ٹیرف پالیشی ءِ چیر دستی ءَ جاری اصلاحات ءِ سر ءَ ھم سرجمیں رنگ ءَ گپ ءُ تران کنگ بوت کہ ایشی ءِ مول ءُ مراد پنچ سال ءِ وھد ءَ کم کم ءَ ٹیرف ءَ را کم کنگ ءَ چہ برآمدات ءَ را دیمروئی دیگ ءُ مقابلہ ءِ توان ءَ را گیش کنگ اِنت۔ وزیر تجارت ءَ گوشت کہ پاکستان ھما چندیں ملک آنی تہ ءَ ھوار اِنت کہ آ ٹیرف ءِ تہ ءَ کمی ءِ پالیشی ءِ رندگیری ءَ کنگ ءَ اَنت، وھدیکہ ایندگہ ملک تحفظ پسندی ءِ پالیشی آنی چیر دستی ءَ ٹیرف آنی تہ ءَ گیشی کنگ ءَ اَنت۔ ڈیری سیکٹر ءِ دیمروئی ءِ سر ءَ ھم گپ ءُ تران کنگ بوت، ایشی ءِ تہ ءَ ڈنمار ءَ ردی ءِ بندوبست ءُ پروٹین ڈرنکس ءُ بار ءِ وڑیں ارزشت ءِ گیشیں چیز آنی پیداوار ءِ منصوبگ پیش کت۔ وزیر تجارت ءَ ٹیکنالوجی ءِ ٹرانسفر ءُ سرمایہ کاری ءِ ارزشت ءِ سر ءَ زور پر دات ءُ شوبگ ءَ را نوک کنگ ءِ ضلورت ءِ سر ءَ زور پر دات۔ صفرا ءَ دواسازی ءِ شوبگ ءَ مجوزہ ترمیم ءِ سر ءَ جیڈھ ءِ درشانی کت، ایشی ءِ تہ ءَ وزیر تجارت ءَ دل یکیمی دات کہ پاکستان آئی پی ءِ کانود آنی رکھینگ ءَ را میاں اوستمانی معیار آنی رد ءَ دل یکیمی کنت ءُ سرمایہ کار آنی بھروسہ برجائی کنت۔ وزیر تجارت ءَ مال ءُ مڈی ءُ گوشت ءِ شوبگ ءَ برآمدات ءِ لوٹ ءِ تہ ءَ گیشی ءِ ذکر کنان ءَ گوشت کہ اے موہ آناں کوالٹی ءِ گہتری ءُ رسمی شوبگ ءَ را مھکم کنگ ءَ سرجمی ءَ کارمرد کنگ بوت کنت۔