بید ءِ مھکم ءُ بلوچستان ءِ دیمروئی ءَ پاکستان دیم ءَ شُت نہ کنت، صدر آصف علی زرداری بلوچستان ءِ بابت ءَ نوزدھمی راجی ورکشاپ ءِ بھر زوروکاں گوں تران

اسلام آباد۔14اپریل  (اے پی پی): صدر آصف علی زرداری ءَ بلوچستان ءِ جیڈھ آنی گیواری ءِ واستہ گپ ءُ تران، گہتریں گورننس، گہتریں کنکٹیویٹی ءُ موثر آپ ءِ انتظامی ءِ ضلورت ءِ سر ءَ زور پر داتگ ءُ گوشت کہ پاکستان صوبہ ءِ استحکام ءُ دیمروئی ءَ ابید دیم ءَ شت نہ کنت۔ آئی ءَ اے ھیالانی درشانی سئے شمبے ءِ روچ ءَ ایوان ءِ صدر ءَ بلوچستان ءِ ھوالگ ءَ 19می راجی ورکشاپ ءِ بھر زوروکاں گوں تران کنان ءَ کت۔ مراگش ءَ سائنس ءُ ٹیکنالوجی ءِ وفاقی وزیر خالد حسین مگسی، پیسریگیں مزن وزیر ءُ راجی اسمبلی ءِ باسک راجہ پرویز اشرف، بلوچستان ءِ مزنیں سیاسی رہشون سردار یار محمد رند ءُ اے دگہ مزنیں مردماں بہر زرتگ۔ مراگش ءِ سروکی ءَ پاک اُرد ءِ 12 کور ءِ سگنل ءِ کمانڈر بریگیڈیئر بلال غفور ءَ کت۔ صدر ءِ مملکت ءَ گوشت کہ صوبگ ءِ تہ ءَ کار لائکیں چاگرد ءِ جوڑ کنگ المی اِنت تانکہ مردم روزگار ءِ موہ آنی شوھاز ءَ ھجرت کنگ ءَ مجبور مہ بنت۔ آئی ءَ گوشت کہ بلوچستان معدنی وسائل ءَ چہ مالا مال انت بلے کسانیں مدت ءِ گامگیج آنی بدل ءَ دراج مدتی دیمروئی منصوبگ آنی ضلورت انت۔ آئی ءَ گوشت کہ ھژدھمی آئین ترمیم ءَ پد دریائے سندھ ءِ سر ءَ بازیں پُل جوڑ کنگ ءَ چہ بلوچستان ءَ را ملک ءِ ایندگر ھند آنی گوما ھمگرنچ کنگ ءَ گہتری اتکگ۔ صدر مملکت ءَ آپ ءَ را مزنیں جیڈھ ءِ رنگ ءَ لیکگ ءَ گوشت کہ آپ ءِ زوال ءَ را کم کنگ ءِ واستہ نہر ءِ استر ءِ منصوبگ آنی سر ءَ عمل کنگ بوھگ ءَ انت۔ آئی ءَ اے گپ ءِ سر ءَ زور پر دات کہ آپ ءِ رکھینگ کشت ءُ کشاری ءُ کان کنی ءِ واستہ المی اِنت۔ آپ ءِ رکھینگ ءَ را وتی اولی ترجی آنی تہ ءَ یک لیکگ ءَ آئی ءَ گوشت کہ بلوچستان ءِ آپ ءِ ضلورت آنی واستہ دمگی کمک ءِ امکان آنی چار ءُ تپاسی کنگ بوھگ ءَ اِنت۔ صدر آصف علی زرداری ءَ گوادر بندرگاہ ءِ ھوالگ ءَ گوشت کہ آئی ءِ ھیال ایش انت کہ بندرگاہ ءِ دیمروئی ءِ میوہ دمگی ٹک ءُ کمیونٹی آنی تہ ءَ سر بہ بنت ھاسیں رنگ ءَ گوادر ءِ نیمگ ءَ روگ ءِ شاہراہ آنی کش ءُ گور ءَ نندوکیں مردم آنی تہ ءَ سر بہ بنت۔ آئی ءَ گوشت کہ اے بندرگاہ ءَ مزنیں اقتصادی مرکز جوڑ بوھگ ءِ گنجائش است انت، ایشی ءِ واستہ المی انت کہ درستیں فریق یکجائی ءَ سرمایہ کاری ءِ واستہ سازگاریں چاگرد جوڑ کنگ ءِ واستہ کار بہ کن انت۔ صدر ءِ مملکت ءَ صوبگ ءِ جیڈھ آنی گیواری ءِ واستہ یکوئی ءُ اندری احتساب ءِ ارزشت ءِ سر ءَ زور پر دیان ءَ گوشت کہ گپ ءُ تران ءُ جمہوری عمل دیمروئی ءِ یکیں راہ اِنت۔ آئی ءَ گوشت کہ جنگ جیڑہانی گیواری نہ انت ۔ آئی ءَ توامیں فریق آنی سر ءَ زور پر دات کہ آ اختلاف آناں مشورہ ءُ کمک ءِ وسیلگ ءَ گیش ءُ گیوار بہ کن اَنت۔ صدر ءِ مملکت ءَ گوشت کہ بلوچستان ءِ الس چین پاکستان اقتصادی راہداری ءِ چیر دستی ءَ جوڑ بوتگیں موہ آناں سرجمی ءَ پائدگ چست بہ کن اَنت ایشی ءَ را آیوکیں تجارتی شاہراہ ءِ رنگ ءَ گوشت کہ ایشی ءَ را صوبہ ءَ را دمگی ءُ جھان ءِ مارکیٹ آں گوں ھمگرنچ کنت۔ صدر ءِ مملکت ءَ گوشت کہ بلوچستان ءَ برجائی امن ءِ واستہ وسیلگ آناں جوانیں رنگ ءَ کارمرد کنگ، سرمایہ کاری ءِ واستہ جوانیں چاگرد، ورنا آناں دیمروئی، کشت ءُ کشاری نوآبادیاتی ءُ ٹارگٹڈ سبسڈی ءِ پھجاری ءُ کسانیں زمیندار آنی کمک ءِ نوکیں زرعی مشینری ءِ پجارینگ ءِ سر ءَ دلگوشی دیگ المی اِنت۔ آئی ءَ سیکورٹی چیلنج آنی گوما ذمہ واریں رنگ ءَ دیم پہ دیم بوھگ ءِ ضلورت ءِ سر ءَ ھم زور پر دات ءُ گوشت کہ درملکی راج ءِ ھاسیں رنگ ءَ چینی استاد ءُ کارکن آنی سر ءَ اُرش پاکستان ءِ مفاد آنی واستہ افسوس ءُ تاوان بار اِنت۔ صدر ءِ مملکت ءَ شورش ءِ ھلاسی ءِ واستہ راجی یکوئی ءُ جوڑیشت ءِ گپ ءُ تران ءِ ضلورت ءِ سر ءَ ھم زور پر دات۔ صدر آصف علی زرداری ءَ گوشت کہ پاکستان دمگی شریک آنی گوما سیادی ءَ را گیش مھکم کنگ ءِ واستہ جزمیگ اِنت، آئی ءَ راجی معیشت ءِ تہ ءَ بلوچستان ءُ سندھ بندرگاہ آنی ارزشت ءِ سر ءَ زور پر دات، ایشی ءَ چہ دریائی تجارت ءِ رسائی ءِ وسیلگ ءَ ایندگر صوبگ آناں ھم سیت رسگ ءَ اِنت۔ صدر مملکت ءَ اے جزم ءِ پدا زور دات کہ پاکستان ءِ یکوئی ءُ دیمروئی بلوچستان ءِ برجائی ءَ گوں بندوک انت ءُ حکومت صوبہ ءِ دیمروئی ءُ آئی ءَ را راجی مین اسٹریم ءَ ہوار کنگ ءِ واستہ وسیلگ ءُ کمک ءَ برجاہ دار ایت۔ ایشی ءَ چہ پیسر کمانڈر سگنلز 12 کور بریگیڈیئر بلال غفور ءَ نیشنل ورکشاپ بلوچستان ءِ مول ءُ مراد ءِ بابت ءَ گپ ءُ تران کنان ءَ گوشت کہ اے ورکشاپ بلوچستان ءِ سرکار ءِ یک ستا کرزیں گامگیج یے کہ ایشی ءِ برجم دارگ ءِ ھاتر ءَ 12 کور ءِ ہیڈ کوارٹر ءِ ھمکوپگی ءَ برجم دارگ بوت۔    آئی ءَ گوشت کہ ورکشاپ ءِ تہ ءَ اسمبلی ءِ باسک، اھوالکار، پالیسی ساز، وانگ ءُ زانگ زانت ءُ ورناھیں رھشونی ءَ را یک پلیٹ فارم ءِ سر ءَ آرگ ءَ چہ راجی یکوئی دیمروئی بیت۔ بلوچستان ءِ بابت ءَ نوزدھمی راجی ورکشاپ ءَ رسانکدر ءَ ھوار جتاجتائیں ادارگاں چہ 93 مردماں بہر زرتگ ات کہ آ بلوچستان ءَ ھوار ملک ءِ جتاجتائیں صوبہ آں چہ سیادی دار انت۔ آئی ءَ گوشت کہ بھر زوروک آنی تہ ءَ 60 درسد بلوچستان ءِ مردم اَنت وھدیکہ آ دگہ 40 درسد پاکستان ءِ ایندگہ دمگ آنی مردم اَنت۔ اے موہ ءِ سر ءَ صدر ءِ مملکت ءَ بلوچستان ءَ ھوار جتاجتائیں راجی جیڈھ آنی ھوالگ ءَ بلوچستان ءِ بابت ءَ راجی ورکشاپ ءِ بھر زوروک آنی جُست آنی پسو ھم دات۔