مالیاتی توازن ءِ برجائی ءِ واستہ وفاقی تک ءَ ھدف مندیں سبسڈی، دیمروئی ءِ ھرچ ءُ درچ ءَ کمی ءُ ضلورت ءِ رد ءَ ھرچ کنگ ءِ گامگیج زورگ بوھگ ءَ انت، وزیر خزانہ محمد اورنگزیب جیفریز انٹرنیشنل ءِ نیمگ ءَ برجم داشتگیں ادارہ جاتی سرمایہ کار آنی گول میز دیوان ءَ گوں تران

اسلام آباد۔15اپریل  (اے پی پی): وفاقی وزیر خزانہ سینیٹر محمد اورنگزیب ءَ گوشت کہ مالیاتی توازن ءِ برجائی ءِ واستہ وفاقی تک ءَ ٹارگٹڈ سبسڈی، دیمروئی ھرچ ءُ درچ ءِ تہ ءَ کمی ءُ ضلورت ءِ رد ءَ ھرچ کنگ ءِ گامگیج کنگ بوھگ ءَ انت۔ آئی ءَ اے گپ ورلڈ بینک ءُ آئی ایم ایف ءِ بہار ءِ دیوان 2026 ءِ موہ ءَ جیفریز انٹرنیشنل ءِ نیمگ ءَ برجم داشتگیں ادارگی سرمایہ کار آنی گول میز دیوان ءَ گوں تران کنان ءَ کت۔ وزیر خزانہ ءَ شریکیں مردم آناں پاکستان ءِ اقتصادی جاور ھال ءُ اصلاحات پروگرام ءِ ھوالگ ءَ پیشرفت ءِ بابت ءَ سرپد کت۔ آئی ءَ گوشت کہ پاکستان ءَ آئی ایم ایف ءِ توسیپی فنڈ آسراتی ءِ سیمی چار ءُ تپاسی ءُ ریزیلینس ءُ پائیداری آسراتی ءِ دومی چار ءُ تپاسی ءِ سر ءَ کارندہ آنی تک ءَ تپاک کتگ، ایشی ءِ تہ ءَ درستیں مقداری ءُ ڈھانچہ ءِ ٹارگٹ سرجم بوتگ اَنت۔ آئی ایم ایف بورڈ ءِ منظوری ءِ گمان اِنت، ایشی ءَ پد آیوکیں بھر شنگ کنگ بیت۔ وزیر خزانہ ءَ میاں اوستمانی تک ءَ برجاھیں جیڈھ ءِ پاکستان ءِ معیشت ءِ سر ءَ اثر آنی سر ءَ ھم زور پر دات ءُ گوشت کہ بنداتی اثرات ءِ سر ءَ ھاسیں رنگ ءَ چمشانک دیگ بوتگ وھدیکہ دومی ءُ سیمی تک ءِ جیڈھ ءِ مدت ءُ شدت ءِ سر ءَ بندوک بیت۔ حکومت ءِ گامگیج آنی سر ءَ چمشانک دیان ءَ وزیر ءِ ھزانگ ءَ گوشت کہ مالیاتی توازن ءِ برجائی ءِ واستہ وفاقی تک ءَ ٹارگٹڈ سبسڈی، دیمروئی ھرچ ءُ درچ ءِ تہ ءَ کمی ءُ ضلورت ءِ رد ءَ ھرچ کنگ ءِ گامگیج کنگ بوھگ ءَ انت۔ درائیں مالیاتی وسیلگ آنی ھوالگ ءَ ھزانگ ءِ وزیر ءَ گوشت کہ پاکستان وتی گلوبل میڈیم ٹرم نوٹ پروگرام ءَ را دوبر فعال کنگ ءَ انت ءُ یوروبانڈز، سکوک ءُ ڈالر ءِ رنگ ءَ کلدار ءَ گوں سیادی داروکیں بانڈز آنی واستہ لیڈ مینیجرز جوڑ کنگ ءِ عمل بندات کنگ بوتگ۔ پاکستان ءِ اولی پانڈا بانڈ ءِ سر ءَ ھم ھیال ءُ لیکہ کنگ بوھگ ءَ اِنت کہ ایشی ءِ واستہ ریگولیٹری منظوری ءِ ودار اِنت۔ دیوان ءِ گڈ ءَ جُست ءُ پُرس ءِ دیوان ھم برجم دارگ بوت، ایشی ءِ تہ ءَ سرمایہ کار آناں پاکستان ءِ اقتصادی پالیشی ءُ اصلاحات ءِ ایجنڈا ءِ تہ ءَ سک باز دلگوشی ءِ درشان کت۔