وفاقی وزیر خزانہ ءَ امریکی محکمہ خزانہ ءُ تجارت، میاں اوستمانی مالیاتی ادارہ ءُ کمپنی آں گوں گند ءُ نند کتگ، وت مہ وتی کمک ءِ دیمروئی ءِ بابت ءَ گپ ءُ تران

اسلام آباد۔14اپریل  (اے پی پی): وفاقی وزیر خزانہ ءُ آمدنی سینیٹر محمد اورنگزیب ءَ ورلڈ بینک ءُ ورلڈ مانیٹری فنڈ ءِ سالانہ دیوان ءِ ساھت ءَ امریکی محکمہ خزانہ ءُ تجارت، سعودی فنڈ فار ڈویلپمنٹ ءُ میاں اوستمانی مالیاتی ادارگ ءُ کمپنی آنی حکام ءِ گوما ھاسیں گند ءُ نند کت۔ سعودی فنڈ فار ڈویلپمنٹ ءِ چیف ایگزیکٹو آفیسر سلطان بن عبدالرحمن المرشد ءِ گوما گند ءُ نند ءَ وزیر ءِ ھزانگ ءَ فنڈ ءِ پاکستان ءِ برجاھیں کمک ءُ آیوکیں دیمروئی شریکداری ءِ سر ءَ آئی ءِ منت گپت۔ سینیٹر محمد اورنگزیب ءَ واشنگٹن ءَ روگ ءَ پیسر سعودی عرب ءِ وزیر ءِ ھزانگ ءِ گوما وتی گوستگیں گند ءُ نند ءِ ھم ذکر کت ءُ گوشت کہ اے گند ءُ نند سک باز کارآمد بوتگ ءُ دوئیں ملک آنی نیام ءَ مھکمیں سیادی آنی درشان اِنت۔ گند ءُ نند ءَ میاں اوستمانی تک ءَ برجاھیں جیڈھ ءِ جھان ءِ توان ءُ ایمنی ءِ سر ءَ اثر ءُ ایشی ءِ بوت کنوکیں معاشی آسر آنی سر ءَ ھم گپ ءُ تران کنگ بوت۔ وزیر ھزانگ ءَ جیڈھ ءِ زوت گیواری ءِ امیت سہرا کت ءُ پاکستان ءُ سعودی عرب ءِ نیام ءَ کمک ءَ را گیش دیمروئی دیگ ءِ ارزشت ءِ سر ءَ زور پر دات۔ گند ءُ نند ءَ دوئیں ملک آنی نیام ءَ مھکم ءُ دیریں وھد ءِ شریکداری ءِ جزم ءِ پدا پدر کنگ بوت ءُ اقتصادی ءُ دیمروئی کمک ءَ را گیش مھکم کنگ ءِ سر ءَ تپاک کنگ بوت۔ امریکی تجارتی نمائندہ سفیر جیمسن گریر ءِ گوما گند ءُ نند ءَ وزیر ءِ ھزانگ ءَ پاکستان ءُ امریکہ ءِ نیام ءَ اقتصادی سیادی ءَ را گیش مھکم کنگ ءِ ارزشت ءِ سر ءَ زور پر دات ھاسیں رنگ ءَ تجارت ءُ سرمایہ کاری ءَ را دیمروئی دیگ ءِ سر ءَ زور پر دات۔ آئی ءَ پاکستان ءِ یک سازگاریں کاروباری ماحول ءِ پجارینگ ءُ مارکیٹ ءِ رسائی ءَ را گہتر کنگ ءِ عزم ءِ سر ءَ زور پر دات تانکہ پائیدار اقتصادی شریکداری ءَ را دیمروئی دیگ بہ بیت۔ دوئیں نیمگ ءَ دو نیمگی تجارت ءُ سرمایہ کاری ءِ دیمروئی ءِ ھوالگ ءَ تعمیری گپ ءُ تران بوتگ، ایشی ءِ تہ ءَ برآمدات ءِ واستہ مارکیٹ ءِ رسائی ءَ را گیش کنگ، سرمایہ کاری ءِ روانی ءَ را آسراتی دیگ ءُ دوئیں ملک آنی نیام ءَ تجارتی سیادی ءَ را گیش مھکم کنگ ءِ امکانات آنی سر ءَ چار ءُ تپاسی کنگ بوتگ۔ دوئیں نیمگ ءَ جاری بیپاری گپ ءُ تران ءِ تہ ءَ پیشرفت ءِ سر ءَ دل یکیمی ءِ درشان کنگ ءُ دو نیمگی اقتصادی کمک ءِ تہ ءَ جوانیں پیشرفت ءِ ساڑاتگ۔ دوئیں نیمگ ءَ وت مہ وتی سیت آناں رسگ ءُ دراجیں مدت ءِ اقتصادی دیمروئی ءَ را دیم ءَ برگ ءِ واستہ کمک ءَ را گیش مھکم کنگ ءِ عزم ءِ دوبر پدر کت۔ کثیر جہتی سرمایہ کاری گارنٹی ایجنسی ءِ منیجنگ ڈائریکٹر سوٹومو یاماموتو ءِ گوما گند ءُ نند ءَ وزیر خزانہ ءَ ایجنسی ءِ نیمگ ءَ چہ 500ملین ڈالر ءَ تاں مختصر مدتی تجارتی مالیاتی آسراتی ءِ وش آتک کت ءُ ایشی ءَ را وردن، کھاد، توانائی ءُ المی مشینری ءَ ھوار کلیدی درآمدات ءِ مالی کمک ءِ واستہ المی لیک ات۔ آئی ءَ اے آسراتی ءِ سر ءَ پیشرفت ءَ را ترند کنگ ءِ ضلورت ءِ سر ءَ زور پر دات تانکہ پاکستان ءِ درائیں مالی کمک ءِ ضلورت وھد ءِ سر ءَ پیلو کنگ بہ بنت۔ وزیر خزانہ ءَ جاری ثالثی ءِ کیس ءُ ایشی ءَ گوں ہمگرنچیں مالی اثرات ءِ ہم ذکر کتگ۔ آئی ءَ دل یکیمی ءِ درشان کت کہ کثیر جہتی سرمایہ کاری گارنٹی ایجنسی ءِ غیر جانبدار آسراتی یک دوستانہ گیواری ءِ ھاتر ءَ کمک کنت ءُ سرمایہ کار آنی دل یکیمی ءُ راجی مفاد آنی رکھینگ ءَ را ھم دل یکیمی کنگ بیت۔ پائیدار سرمایہ کاری ءِ دیمروئی ءُ اقتصادی استحکام ءِ برجائی ءِ واستہ حکومت ءِ عزم ءِ سر ءَ زور پر دیان ءَ وزیر ءِ ھزانگ ءَ ایجنسی ءِ گوما نزیکیں کمک ءَ را برجاہ دارگ ءُ سازگاریں سرمایہ کاری ءِ ماحول ءِ دیمروئی ءِ واستہ پاکستان ءِ عزم ءِ سر ءَ یک رندے پدا گوشت۔ آئی ایم ایف ءِ میاں اوستمانی ءُ میان اُستمانی ایشیا ءِ محکمہ ءِ ڈائریکٹر جہاد اظہور ءُ آئی ایم ایف ءِ پاکستان ءِ مشن ٹیم ءِ گوما گند ءُ نند ءَ وزیر ءِ ھزانگ ءَ کارندہ آنی تک ءِ معاہدے ءِ سر ءَ وشھالی ءِ درشانی کت ءُ امیت کت کہ آئی ایم ایف ءِ ایگزیکٹو بورڈ زوت ایشی ءِ منظوری ءَ دنت تانکہ پاکستان ءِ مستریں اصلاحات پروگرام ءِ رفتار بوت کنت۔ گند ءُ نند ءِ ساھت ءَ سینیٹر محمد اورنگزیب ءَ میاں اوستمانی تک ءَ برجاھیں جیڈھ ءِ پاکستان ءِ معیشت ءِ سر ءَ اثر آناں سرپد کت ءُ گوستگیں وھد ءِ مزنیں سپلائی جھٹکا آنی تہ ءَ یکے لیک اِت۔ آئی ءَ گوشت کہ حکومت بحران ءِ دومی ءُ سیمی بھر ءِ آسر آنی گوما ھاسیں رنگ ءَ اقتصادی دیمروئی ءُ مہنگائی ءِ رد ءَ جوانیں رنگ ءَ گر ءُ چیل بوھگ ءَ اِنت۔ وزیر خزانہ ءَ یوروبانڈ ءِ سوبمندیں واپسی ءِ ھم ذکر کت ءُ اے عزم ءِ پدا زور دات کہ حکومت آیوکیں درستیں دو نیمگی ءُ کثیر نیمگی مالیاتی ذمہ واری آنی سر ءَ وھد ءِ سر ءَ پیلو کنت۔ دوئیں نیمگ ءَ مالیاتی ءُ ڈھانچہ ءِ اصلاحات ءِ تہ ءَ پیشرفت ءُ آمدنی ءِ تہ ءَ گیشی ءِ کوشست آنی سر ءَ ھم تران کت ءُ اے گپ ءِ سر ءَ تپاک کت کہ برجائی ءُ ھواریں اقتصادی دیمروئی ءِ واستہ اقتصادی استحکام المی اِنت۔ گوگل ءِ نائب صدر ءُ حکومتی کار ءُ پبلک پالیسی ءِ گلوبل سروک کرن بھاٹیا ءِ گوما گند ءُ نند ءَ وزیر ءِ ھزانگ ءَ گوگل ءِ پاکستان ءَ ھاسیں رنگ ءَ مصنوعی ذہانت ءِ پڑ ءَ برجاھیں گامگیج آناں ساڑات۔ آئی ءَ پاکستان ءَ گوگل کروم بک ءِ لوکل مینوفیکچرنگ بندات کنگ ءُ جولائی 2026ءَ پاکستان ءَ کارگس ءِ جوڑ کنگ ءِ پیسلہ ءِ ھم وش اتک کت۔فریقین ءَ پاکستان حکومت ءُ گوگل ءِ نیام ءَ جاری ءُ پیش کرتگیں منصوبگ آنی سر ءَ تران کت کہ ایشی ءِ مول ءُ مراد مصنوعی ذہانت ءِ دیمروئی ءُ معیشت ءِ کلیدی شوبگ آنی تہ ءَ ایشی ءِ کارمرد کنگ اِنت۔ دوئیں نیمگ ءَ پاکستان ءِ ڈیجیٹل ٹرانسفارمیشن ءِ گیشیں ایجنڈا ءِ چیر دستی ءَ وت مہ وتی کمک ءَ را گیش مھکم کنگ ءِ وتی عزم ءِ پدر کنگ بوت۔ ماسٹر کارڈ ءِ چیف گلوبل افیئرز اینڈ پالیسی ٹکر فوٹ ءِ گوما گند ءُ نند ءَ فریقین ءَ پاکستان ءَ ڈیجیٹل ادائیگی ءِ دیمروئی ءِ امکانات آنی سر ءَ تران کت، مالیاتی شمولیت ءَ را گیش کنگ ءُ فن ٹیک ءِ شوبگ ءَ جدت ءِ دیمروئی ءِ امکانات آنی سر ءَ تران کت۔ دوئیں نیمگ ءَ پاکستان ءَ ایمن، ھواریں ءُ پچیں مالیاتی نظام ءِ جوڑ کنگ ءِ سر ءَ تپاک کنگ بوت۔ ڈیجیٹل معیشت ءِ دیمروئی ءِ واستہ کمک ءَ را برجاہ دارگ ءِ عزم ءِ سر ءَ پدا زور پر دیگ بوت۔ دیوان ءَ سائبر سیکورٹی، سیم سر ءَ چہ دریں مالیاتی لین دین ءُ زرّ ءِ دیم دیگ ءِ ھوالگ ءَ جیڈھ ھم گپ ءُ تران بوتگ۔ امریکی خزانہ ءِ ڈپٹی انڈر سیکرٹری برائے انٹرنیشنل افیئرز جوناتھن گرینسٹین ءَ گوں گند ءُ نند ءَ وزیر ءِ ھزانگ ءَ آئی ایم ایف ءِ گوما کارندہ آنی تک ءِ معاہدہ ءِ سر ءَ زور پر دات ءُ اصلاحات پروگرام ءِ سر ءَ پاکستان ءِ عزم ءِ سر ءَ زور پر دات۔ آئی ءَ گوشت کہ پاکستان ءَ 1.3ارب ڈالر ءِ یوروبانڈ ءِ پچ گرگ ءِ کار سوبمندیں رنگ ءَ سرجم کتگ ءُ حکومت آیوکیں دراہیں درائیں مالی زمہ واری آناں وھد ءِ سر ءَ ادا کنگ ءِ واستہ جزمیگ انت۔ دوئیں نیمگ ءَ میاں اوستمانی تک ءَ برجاھیں جیڈھ ءِ اقتصادی اثر ھاسیں رنگ ءَ زرّ دیم دیگ ءُ پاکستان ءِ درئی شوبگ ءِ سر ءَ ایشی ءِ اثر ءِ سر ءَ ھم گپ ءُ تران کنگ بوت۔ وزیر ءِ ھزانگ ءَ امریکی کارندہ آناں اے جاور ھال ءِ براہ راست ءُ بالواسطہ اثر آناں گر ءُ دار ءِ واستہ گامگیج کنگ بوھگ ءَ انت ءُ زرّ ءِ ذخیرہ ءَ را مھکم کنگ ءِ کوشست آنی بابت ءَ سرپد کت۔ دوئیں ملکاں اقتصادی کمک ءَ را گیش دیمروئی دیگ ءِ ھاترا وتی جزم ءِ درشانی کتگ ءُ دمگی استحکام ءُ پائیدار دیمروئی ءِ یکجائی مول ءُ مراد ءِ بنیاد ءَ یک مھکم ءُ جتائیں اقتصادی شراکت داری ءِ جوڑ کنگ ءِ سر ءَ تپاک کتگ۔