وزیر داخلہ محسن نقوی ءِ مول ءُ مراد 31 دسمبر 2026 ءَ تاں ایف آئی اے ءَ را یک نوکیں ءُ متحرکیں ادارگے جوڑ کنگ اِنت، صفر کرپشن پالیسی ءِ جار جتگ

اسلام آباد۔13اپریل  (اے پی پی): وفاقی داخلہ ءِ وزیر محسن نقوی ءَ 31دسمبر 2026 ءَ تاں وفاقی پٹ ءُ پولی ادارگ ءَ را یک نوکیں، جوان ءُ برجمیں ادارگ جوڑ کنگ ءِ ٹارگٹ ایر کتگ ءُ اے گپ ءَ گوں ھاسیں رنگ ءَ گشتگ کہ درستیں وسیلگ آنی پجارینگ ءَ پد محکمہ ءَ کرپشن ءِ ھلاپ ءَ ’’صفر رواداری‘‘ ءِ پالیسی ءِ سرا عمل کنگ بیت۔ اسلام آباد ءَ ایف آئی اے ءِ افسر آنی ھاسیں کانفرنس ءَ ھاسیں مہمان ءِ بستار ءَ گشتانک دیان ءَ محسن نقوی ءَ اسلام آباد ءَ تعینات بوتگیں نوکیں اسسٹنٹ ڈائریکٹر، انسپکٹر ءُ افسر آنی گوما پیشہ وارانہ جیڈھ آنی سر ءَ سرجمیں رنگ ءَ گپ ءُ تران کت۔ اے موہ ءِ سر ءَ تہی کارانی وزیر مملکت طلال چوہدری، وفاقی سیکرٹری داخلہ خرم آغا ءُ ڈی جی ایف آئی اے ڈاکٹر عثمان انور ھم ھوار اتنت۔ وزیر داخلہ ءَ ذاتی رنگ ءَ افسر آنی جیڈھ آناں گوش داشتگ ءُ آوانی ترندیں گیواری ءِ دل یکیمی داتگ ءُ گوشت کہ نوکیں ڈی جی ءِ متحرک سروکی ءَ ایف آئی اے ءَ را یک کارآمدیں ادارگ جوڑ کنگ بیت۔ آئی ءَ گوشت کہ کمی آناں دور کنگ ءُ نظام ءِ گہتر کنگ مئے اولی ترجی انت۔ محسن نقوی ءَ جار جتگ کہ پروموشن ھمک ملازم ءِ ھک اِنت، اے درگت ءَ سروس اسٹرکچر گہتر کنگ بیت ءُ افسر آناں وھد ءِ سر ءَ ریٹائرمنٹ کنگ بیت۔ محسن نقوی ءَ ایف آئی اے ءِ درستیں شہیدانی کھول ءِ پلاٹ دیگ ءِ مزنیں جار جتگ۔ آئی ءَ گوشت کہ کارمند آنی واستہ یک سرجمیں وشھالی منصوبگ جوڑ کنگ بوھگ ءَ اِنت، ایشی ءِ تہ ءَ وانگ ءُ زانگ، جان سلامتی ءُ ایندگر بنیاتی ڈھانچگ ءِ آسراتی ھوار بنت۔ آئی ءَ دل یکیمی دات کہ کارندہ آناں ھمک رنگ ءِ آسراتی پجاری کنگ بیت۔ وزیر داخلہ ءَ دو لبزاں گوشت کہ توامیں وسیلگ آنی پجاری ءَ پد صفر کرپشن پالیشی ءِ سر ءَ سک باز عمل کنگ بیت ءُ کرپٹیں مردم آنی واستہ ھچ وڑیں مراعات نہ بیت۔ بلے آئی ءَ ایمانداریں افسر آناں سرجمیں رکھینگ ءِ وعدہ کتگ ءُ گوشت کہ اگاں شما راستی ءُ انصاف ءِ ھاترا اوشتاتگ ات گڑا سرکار شمئے گوما اوشتاتگ ات، شمئے سرجمیں نوکری ءِ سیکورٹی ءِ آسراتی دیگ بیت۔ محسن نقوی ءَ ادارگ ءِ مردمی قوت ءَ را گیش کنگ ءِ ضلورت ءِ سر ءَ زور پر دات ءُ گوشت کہ 2008 ءِ کارندہ آنی گوما انوگیں دور ءِ چیلنج آنی گوما دیم پہ دیم بوھگ نا ممکن اِنت۔ ڈی جی ایف آئی اے ڈاکٹر عثمان انور ءَ ھم مراگش ءَ گوں گشتانک دات ءُ ادارگ ءِ کارکردگی ءَ را گیش گہتر کنگ ءِ جزم ءِ درشان کت۔