پاکستان ءَ میاں اوستمانی جیڈھ ءَ چہ پیداکیں جاور ھال آناں جوانیں رنگ ءَ دیم ءَ برتگ، وفاقی وزیر ءِ ھزانگ ءُ آمدنی سینیٹر محمد اورنگزیب

بوسٹن۔13اپریل  (اے پی پی): وفاقی وزیر خزانہ ءُ ریونیو سینیٹر محمد اورنگزیب ءَ گوشت کہ پاکستان ءَ دگہ ملک آنی برخلاف میاں اوستمانی جیڈھ ءَ چہ پیداکیں جاور ھال آناں جوانیں رنگ ءَ دیم ءَ برتگ ءُ اے وھد ءَ نہ کہ سپلائی ءِ شدیدیں جیڈھ بوتگ ءُ نہ کہ امن ءُ ایمنی ءِ جیڈھ بوتگ۔ پاکستان ءَ وتی آیوکیں درائیں ذمہ واری آناں وھد ءِ سر ءَ ادا کنگ ءِ صلاحیت است انت۔ آئی ءَ اے گپ ہارورڈ یونیورسٹی ءَ ’’پاکستان ءِ اقتصادی ایجنڈا: استحکام، اصلاحات ءُ دیمروئی ءِ راہ‘‘ ءِ سرھال ءِ سر ءَ مزن تک ءِ پینل ءِ تران ءَ بھر زوری کنان ءَ کت۔ اے سیشن پاکستان کانفرنس 2026ءِ سلسلہ ءَ برجم دارگ بوتگ ات۔سیشن ءِ سروک پیسریگیں گورنر اسٹیٹ بینک ڈاکٹر رضا باقر ءَ کتگ ات وھدیکہ نامداریں معاشیات زانت پروفیسر عاطف میان (پرنسٹن یونیورسٹی) ءُ نوبل داد ءِ داد پروفیسر ڈیرون ایسیموغلو (ایم آئی ٹی) ہم پینل ءِ بہر بوتگ انت۔ اے گپ ءُ تران ءِ تہ ءَ معیشت زانت، پالیسی ساز ءُ درملکیں پاکستانی آں پاکستان ءِ اقتصادی جاور ھال، اصلاحات ءِ اولیت ءُ دراجیں مدتی دیمروئی ءِ آسراتی آنی سر ءَ گپ ءُ تران کت۔ وزیر ءِ ھزانگ ءَ وتی گشتانک ءِ تہ ءَ گوشت کہ میاں اوستمانی تک ءَ برجاھیں جیڈھ گوستگیں سال آنی تہ ءَ جھان ءِ معیشت ءِ تہ ءَ مزنیں سپلائی جھٹکا آنی تہ ءَ یکے، ایشی ءَ گوں گر ءُ چیل بوھگ ءِ واستہ احتیاط ءُ متوازن پالیسی سازی ءِ ضلورت اِنت۔ آئی ءَ گوشت کہ گوستگیں لھتیں ھپتگ آنی تہ ءَ حکومت ءِ ترندیں اولویت ایش بوتگ کہ کمیں ذخائر ءِ باوجود ھاسیں شوبگ آناں توان ءِ برجاھیں سپلائی ءَ را دل یکیمی کنگ بہ بیت، ایشی ءِ واستہ جتا جتائیں وزارت ءُ ادارگ آنی نیمگ ءَ یکجائی کوشست کنگ بوتگ۔ آئی ءَ گوشت کہ بنداتی وھد ءَ حکومت ءَ توان ءِ بہا ءِ تہ ءَ گیشی ءَ چہ الس ءَ را رکھینگ ءِ واستہ جنرل سبسڈی داتگ ات، ایشی ءَ پد مالی توان ءِ رد ءَ ٹارگٹڈ سبسڈی ءُ سرجمیں پرائس ٹرانسفر ءِ پالیسی ءَ بدل کنگ بوتگ ات۔ وزیر خزانہ ءَ اے گپ ءِ سر ءَ زور پر دات کہ پاکستان ءَ اے جاور ھال ایندگہ بازیں ملک آنی مقابلہ ءَ جوانیں رنگ ءَ دیم ءَ برتگ ءُ نہ کہ سپلائی ءِ شدیدیں بحران ءُ نہ کہ امن ءُ ایمنی ءِ جیڈھ دیم ءَ اتکگ انت۔ سینیٹر اورنگزیب ءَ درائیں مالیاتی جاور ھال آنی سر ءَ تران کنان ءَ قرضہ آنی جوانیں انتظام ءِ سر ءَ زور پر دات ءُ گوشت کہ انوگیں یوروبانڈ ءِ پچ گرگ یک روٹین جیڈھ ءِ رنگ ءَ ثابت بوتگ۔ آئی ءَ اے گپ ءِ سر ءَ دل یکیمی ءِ درشان کت کہ پاکستان وتی آیوکیں درائیں زمہ واری آناں وھد ءِ سر ءَ ادا کنگ ءِ لائک اِنت۔ وزیر خزانہ ءَ بحران ءِ وھد ءَ پیداکیں موہ آنی ذکر کنان ءَ گوشت کہ کراچی بندرگاہ ءَ ٹرانزٹ تجارت ءَ مزنیں کساسے ءَ گیشی بوتگ کہ ایشی ءَ چہ لھتیں ھپتگ آنی تہ ءَ سرجمیں سال 2025 ءِ حجم ءَ چہ ھم گیش بوتگ وھدیکہ گوادر بندرگاہ ءَ را سرجمی ءَ کار کنگ ءِ نیمگ ءَ ھم پیشرفت کنگ بوھگ ءَ اِنت۔ آئی ءَ گوشت کہ مارچ ءَ روشن ڈیجیٹل اکاؤنٹ ءِ چیر دستی ءَ ریکارڈ زرّ رستگ، ایشی ءَ چہ درملک ءَ پاکستانی آنی تہ ءَ گیش بوھوکیں دل یکیمی ءِ نشانی انت۔ آئی ءَ اے گپ ھم پدر کت کہ اگاں چہ زرّ ءِ دیم دیگ المی اِنت بلے آ دراجیں مدت ءِ دیمروئی ءِ واستہ دائمی گیواری بوت نہ کنت۔ ایشی ءِ واستہ سروسز ءِ شوبگ ءَ برآمد ءِ سروکی ءَ دیمروئی ءُ تجارت گیش پائیداریں راہ اَنت۔ سینیٹر اورنگزیب ءَ گوشت کہ پاکستان ءَ مدام اصلاحات ءِ ’’چے‘‘ ءُ ’’پرچا‘‘ زانتگ بلے اصل جیڈھ ’’چوں‘‘ اِنت بزاں وھد ءِ سر ءَ پیسلہ کنگ ءُ آھانی سر ءَ عمل کنگ ءَ را دل یکیمی کنگ۔ آئی ءَ گوشت کہ مشکل بلے المی ئیں پیسلہ آنی تہ ءَ دیر کنگ ءَ گوستگیں وھد ءَ دیمروئی ءَ را تاوان داتگ ءُ ملک ءَ را باز رند ءَ آئی ایم ایف ءِ پروگرام آناں زورگ لوٹ اتگ۔ وزیر ءِ ھزانگ ءَ ڈھانچہ ءِ اصلاحات ءِ عزم ءِ یک رند ءَ پدر کنان ءَ گوشت کہ حکومت ٹیکس ءِ نظام ءَ را گہتر کنگ، ٹیکس دہندگانی کساس ءَ را گیش کنگ ءُ ٹیکس ٹو جی ڈی پی ءِ تناسب ءَ را گیش کنگ ءِ سر ءَ کار کنگ ءَ اِنت۔ اے درگت ءَ آئی ءَ فیڈرل بورڈ آف ریونیو ءِ تہ ءَ جاری اصلاحات ءِ ذکر کت کہ ایشی ءِ تہ ءَ ڈیجیٹلائزیشن، آٹومیٹک سسٹم ءُ ڈیٹا ءِ سر ءَ کار کنوکیں کارروائی ھوار اَنت تانکہ انسانی مداخلت ءَ را کم کنگ ءُ کارکردگی ءَ را گہتر کنگ بہ بیت۔ آئی ءَ اے گپ ءِ سر ءَ ھم زور پر دات کہ صنعت ءَ را برجاھیں سبسڈی ءِ پجارینگ ءِ بدل ءَ مقابلہ ءُ برآمدات ءِ سروکی ءَ دیمروئی ءَ را گیش کنگ المی اِنت۔ اے درگت ءَ آئی ءَ گوستگیں تجارتی اصلاحات ھاسیں رنگ ءَ ٹیرف ءِ کمی ءَ را جھان ءِ مارکیٹ ءِ گوما جوانیں یکجاھی ءِ واستہ المی لیک اتگ۔ وزیر ءِ ھزانگ ءَ پاکستان ءَ قابل تجدید توان ءِ گیش بوھوکیں کارمردی ءِ ذکر کنان ءَ گوشت کہ شمسی توان ءِ پیداوار نزیک ءَ 8ہزار میگاواٹ ءَ سر بوتگ ایشی ءَ گوستگیں جھان ءِ جھٹکا آنی وھد ءَ معیشت ءِ کمک کتگ۔ آئی ءَ آیوکیں دہ سال ءَ قابل تجدید توانائی ءِ بھر ءَ را مزنیں کساس ءَ گیش کنگ ءِ جزم ءِ درشان کت۔ آئی ءَ گیش گوشت کہ کلیدی اصلاحاتی گامگیج آنی تہ ءَ چاریں صوبائی اسمبلی آنی نیمگ ءَ زرعی آمدنی ٹیکس ءِ کانود ءِ منظوری ءُ سرکاری ادارگ آناں نجکاری ءُ نوکیں رنگ ءَ جوڑ کنگ ھوار اِنت، ایشی ءِ چیر دستی ءَ 28سرکاری ادارگ نجکاری کمیشن ءِ دست ءَ دیگ بوتگ اَنت تانکہ مالی بوجھ ءَ را کم کنگ ءُ گورننس ءَ را گہتر کنگ بہ بیت۔ دیم ءَ اتکگیں چیلنج آنی سر ءَ تران کنان ءَ وزیر ءِ ھزانگ ءَ ترندی ءَ گوں گیش بوھوکیں آبادی ءُ موسمیاتی بدلی ءَ را دو مزنیں جیڈھ لیک اتگ ءُ گوشت کہ پائیدار اقتصادی دیمروئی ھما وھد ءَ ممکن نہ انت داں کہ ترندیں آبادی ءِ گیشی ءَ را کنٹرول کنگ مہ بیت ءُ موسمیاتی رسک آنی گوما گر ءُ چیل بوھگ ءِ واستہ یک مھکمیں حکمت عملی ءِ رد ءَ عمل کنگ مہ بیت۔ وزیر خزانہ ءَ اے گپ من اِت کہ ریگولیٹری اصلاحات ءُ کاروبار ءِ آسراتی ءِ وڑیں شوبگ آنی تہ ءَ گیش کار کنگ ءِ ضلورت اِنت ءُ اے حکومت ءِ کلیدی اولویت آنی تہ ءَ ھوار اَنت۔ اے گپ ءُ تران ءَ چہ جھان ءِ ماہرین ءُ سٹیک ہولڈر آنی گوما سیادی ءِ یک ھاسیں موہ ثابت بوت، ایشی ءَ چہ پاکستان ءِ وتی اقتصادی آیوکیں وھد ءِ ھوالگ ءَ شفافیت، اصلاحات ءُ جوانیں گپ ءُ تران ءِ عزم ءِ درشان کنگ بوت۔