پاکستان جنگ بندی ءِ برجاہ دارگ ءِ ھاترا وتی کوشستاں برجاہ دار ایت، مزن وزیر شہباز شریف ءِ گوں جاپان ءِ مزن وزیر ثنائے تاکائیچی ءَ ٹیلی فون ءِ سر ءَ گپ ءُ تران

اسلام آباد۔13اپریل  (اے پی پی): مزن وزیر محمد شہباز شریف ءَ گوشت کہ پاکستان جنگ بندی ءِ برجائی ءِ واستہ وتی کوشستاں برجاہ دار ایت۔ آئی ءَ اے گپ جاپان ءِ مزن وزیر ثنائے تاکائیچی ءَ گوں گپ ءُ تران کنان ءَ کت انت آئی ءَ دو شمبے ءِ روچ ءَ مزن وزیر محمد شہباز شریف ءَ را فون کتگ ءُ اسلام آباد ءَ پاکستان ءِ میزبانی ءَ امریکہ ءُ ایران ءِ نیام ءَ گپ ءُ تران ءِ بابت ءَ آئی ءِ گوما گپ ءُ تران کتگ۔ مزن وزیر کارگس ءِ میڈیا ونگ ءِ نیمگ ءَ جاڑی بوتگیں بیان ءِ رد ءَ مزن وزیر ثنائے تاکائیچی ءَ جنگ بندی ءُ گپ ءُ تران ءِ برجائی ءَ پاکستان ءِ سفارتی کرد ءَ را ساڑاتگ۔ آئی ءَ امن ءِ جوڑیشت ءِ عمل ءِ سرجمیں حمایت ءِ درشانی کت ءُ دمگی استحکام ءُ جھان ءِ توانائی ءِ ایمنی ءِ واستہ اے عمل ءَ را المی لیک ات۔ مزن وزیر ءَ وتی نیکیں واھشتانی پد ءَ جاپانی ھمکار ءِ شگر ءُ منت گپت ءُ گوشت کہ اسلام آباد ءَ امریکا ءُ ایران ءِ ڈل آنی نیمگ ءَ بوتگیں سرجمیں گپ ءُ تران ءِ شگر ءُ منت وار آں ءُ پاکستان جنگ بندی ءِ برجائی ءِ واستہ وتی کوشستاں برجاہ دار ایت۔ مزن وزیر ءَ پاکستان ءُ جاپان ءِ نیام ءَ وت مہ وتی کمک ءَ را گیش مھکم کنگ ءِ واھشت ءِ درشان کت، ایشی ءَ را جاپان ءِ مزن وزیر ءَ ھم ساڑات۔ دوئیں رہشوناں نزیکیں رابطہ ءِ برجاہ دارگ ءِ سرا تپاک کتگ۔