اسلام آباد ءِ گپ ءُ تران دمگ ءَ امن ءُ ایمنی ءِ دیمروئی ءِ ھاتر ءَ یک ھاسیں سفارتی پیشرفت اِنت، احسن اقبال

اسلام آباد۔11اپریل  (اے پی پی): منصوبگ بندی، دیمروئی، اصلاحات ءُ ھاسیں گامگیج آنی وفاقی وزیر احسن اقبال ءَ گوشت کہ اسلام آباد ءِ گپ ءُ تران دمگ ءَ امن ءُ ایمنی ءِ دیمروئی ءِ واستہ یک ھاسیں سفارتی پیشرفت یے، ایشی ءَ امریکہ ءُ ایران ءِ نیام ءَ کش ءُ چیل آنی تہ ءَ کمی ءِ تہ ءَ جوانیں کرد پیلو کتگ۔ شمبے ءِ روچ ءَ سوشل نیٹ ورکنگ ویب سائٹ ایکس ءِ سر ءَ وتی پوسٹ ءِ تہ ءَ آئی ءَ گوشت کہ اے جوانیں دیمروئی ءِ سر ءَ لھتیں بھارتی میڈیا سرکل آنی منفی رد عمل افسوس ءِ گپ اِنت۔ آئی ءَ گوشت کہ اے وڑیں گرانیں جاور ھال آنی تہ ءَ زمہ واریں رپک ءِ لوٹ اِنت کہ اے کوشست ءِ ستا کنگ بہ بیت، چیاکہ اے نہ ایوک ءَ پاکستان ءِ بلکینگ ءَ سرجمیں دمگ ءُ میاں اوستمانی براتی ءِ مفاد ءِ تہ ءَ اِنت۔ آئی ءَ اے گپ ءِ پدرائی کت کہ اگاں اے کش ءُ چیل گیش بوتیں گڈا ایشی ءِ اثر نہ ایوک ءَ جنوبی ایشیا ءِ سر ءَ بلکیں گلوبل ساؤتھ ءِ ملک آنی سر ءَ ھم گندگ بوتگ ات کہ اودا لکھانی مردم بے روزگاری، مہنگائی، ایندھن ءِ بہا ءِ تہ ءَ گیشی ءُ اقتصادی دباؤ ءِ آماچ بوت کن انت۔ وفاقی وزیر ءَ گوشت کہ پاکستان ءَ یک زمہ واریں ریاست ءِ بستار ءَ مدام سفارتکاری، گپ ءُ تران ءُ امن ءَ را اولی ترجی داتگ ءُ ایشی ءِ جوانیں کرد ءَ را جھان ءِ تک ءَ منگ بوھگ ءَ انت۔ آئی ءَ گوشت کہ پاکستان ءَ را کس ءِ توثیق ءِ ضلورت نہ اِنت بلکیں وتی اصولی موقف ءُ عملی گامگیج آنی وسیلگ ءَ دگنیا ءِ تہ ءَ وتی جاگہ ​​جوڑ کنگ ءَ اِنت۔ آئی ءَ گیش کرتگ کہ لھتیں عناصر ءِ نیمگ ءَ بے سریں گپ ءُ بے بنیں ایراد درور ءَ دمگ ءَ امن ءِ کوشست آناں تاوان دیگ ءِ برابر اِنت۔ آئی ءَ اے گپ ءِ سر ءَ زور پر دات کہ وھد اتکگ کہ دمگی ملک جذبات آنی بدل ءَ حقیقت پسندی ءُ وت مہ وتی کمک ءَ را دیم ءَ برگ ءَ انت تانکہ دائمی امن ءُ مشترکہ وشھالی ءِ واب راستی ءَ را جوڑ بوت کنت۔