پاکستان ءِ مخالفین ءَ را مذاکرات ءِ میز ءِ سرا آرگ ءَ پاکستان ءَ مزنیں کردے پیلو کتگ، پاکستان پیپلز پارٹی ءِ مزنیں رہشون سینیٹر شیری رحمان

اسلام آباد۔11اپریل  (اے پی پی): سینیٹر شیری رحمان ءَ پاکستان ءِ گیش بوھوکیں سفارتی بستار ءِ توسیپ کنان ءَ گوشت کہ پاکستان ءَ اعتماد ءِ بحالی ءُ مخالف آناں گپ ءُ تران ءِ میز ءِ سر ءَ آرگ ءِ تہ ءَ مزنیں کرد پیلو کتگ۔ آئی ءَ اے گپ ءِ پدرائی کت کہ پاکستان ءِ سر ءَ ناشرکاری ءِ الزام جنوکیں بھارت ءِ واستہ جھان ءِ امن ءِ سر ءَ دلگوشی دیگ مشکل بوھگ ءَ اِنت۔ پاکستان پیپلز پارٹی ءِ مزنیں رہشون سینیٹر شیری رحمان ءَ شمبے ءِ روچ ءَ میڈیا ءَ گوں تران کنان ءَ ایران ءُ امریکہ ءَ را جنگ ءَ چہ گپ ءُ تران ءِ میز ءِ سر ءَ آرگ ءِ تہ ءَ پاکستان ءِ سفارتی سوبمندی ءِ توسیپ کت۔ آئی ءَ درائینتگ کہ دوئیں ملک آنی وتی بنیاتی مفاد آناں برجائی ءِ ضلورت اِنت پرچا کہ ھر ملک وتی راجمانی عکس ءَ را رکّینگ ءِ کوشست ءَ کنت۔ آئی ءَ گیش گوشت کہ امن گپ ءُ تران ءِ واستہ دوئیں نیمگ آنی میزبانی ءَ پاکستان ءِ کرد المی اِنت۔ آئی ءَ اے گپ ءِ سر ءَ زور پر دات کہ پاکستان اے گپ ءَ دل یکیمی کنت کہ دوئیں ملک آنی جیڈھ آناں گوشدارگ بہ بیت، بھروسہ برجاہ بہ بیت ءُ جوڑیشت ءِ گپ ءُ تران ءَ را دیم ءَ برگ بہ بیت۔ شیری رحمان ءَ مصر، ترکی، سعودی عرب ءُ چین ءِ وڑیں ملک آنی کمک ءِ منگ ءِ وھد ءَ اے گپ ءِ سر ءَ زور پر دات کہ دوئیں دژمن آناں گپ ءُ تران ءِ میز ءِ سر ءَ آرگ ءِ تہ ءَ پاکستان ءِ سروکی مرکزی کرد ءَ پیلو کنت۔ آئی ءَ گوشت کہ پاکستان ءِ سفارتکاری ءَ یک انچیں پلیٹ فارم ءِ پجارینتگ کہ ایشی ءِ تہ ءَ دوئیں نیمگ وتی بنیاتی موقف آنی سر ءَ ھچ وڑیں سمجھوتہ کنگ ءَ ابید پرامن رنگ ءَ گپ ءُ تران کت کن اَنت۔ شیری رحمان ءَ اے گپ ءِ سر ءَ ھم زور پر دات کہ برجاھیں امن گپ ءُ تران یک مزنیں سوبمندی یے، دوئیں جنگولیں ملک نوں یکیں میز ءِ سر ءَ اَنت، اے پاکستان ءِ جھان ءِ سفارتکاری ءِ تہ ءَ سروکی ءِ پدریں گواہ اِنت۔ آئی ءَ اے گپ ءِ نیمگ ءَ دلگوش گور کت کہ بھارت ءَ یک وھدے ءَ پاکستان ءَ را ”ناشرکاری ءِ مرکز“ گْوشتگ ات، نوں وتی ناکامیں سفارتکاری ءِ آسراں چہ زھر اِنت۔ شیری رحمان ءَ امن ءُ ایمنی ءِ واستہ پاکستان ءِ کرد ءَ را منگ ءِ بھارت ءِ ناکامی ءِ سر ءَ ایراد گپت ءُ گوشت کہ نوں میاں اوستمانی براتی پاکستان ءِ سفارتی کوشست آنی تہ ءَ جوانیں بدلی ءَ را منگ ءَ اِنت۔ آئی ءَ وتی گپ ءُ تران ءِ گڈسرا اے گپ ءِ سر ءَ زور پر دات کہ پاکستان ءِ کمک ءَ چہ دوئیں جنگی ملک وتی گپ ءُ تران ءَ برجاہ دار اَنت ھمے وھد ءَ وت مہ وتی بھروسہ ءَ را برجم دار اَنت ءُ اے گپ ءَ دل یکیمی کن اَنت کہ امن گپ ءُ تران جوڑیشت ءِ رنگ ءَ دیم ءَ رو اَنت۔